秋高氣爽去行山~山頂>HKU

啱啱個星期日天氣好好，少少涼唔太曬又有風，艾菲唔知挑起邊條筋忽然想郁動吓，於是提議去山頂行山落HKU，難得米高唔介意辛苦話好（皆因佢要負責拎袋拎車），咁我哋食完個late breakfast就出發啦﹗



艾菲初時以為要揹住BB豆豬行，但米高話呢段路全程無樓梯可以推BB車，咁艾菲就可以輕鬆D free返對手出來幫佢兩兄妹影吓靚相，Good﹗



我哋由山頂出發，行咗無耐就到瀑布位。



再行前少少見到有堆人圍住塊葉影相，原來有隻大蝴蝶停咗喺到，又幾靚喎﹗



繼續向前行多陣就到晨運區，呢個小朋友走咗去吊臘鴨，艾菲都係第一次見佢成功將自己吊起，之前佢一直唔肯爬公園D馬騮架，仲以為佢唔夠力玩添﹗

 

晨運區出面仲咁啱有好靚嘅陽光同草地，用來影背光相簡直一流，可惜...燒腩仔話佢唔想影兼不停避鏡頭，如果唔係就可以同佢影多幾張靚相，唉...



行咗半個鐘左右就到分岔口，我哋落山去HKU就要轉入龍虎山郊野公園。



一轉入去就開始落斜，沿路有樹叢遮住完全唔曬仲好涼爽，去到中後段會有個位望到少少風景，而最讚嘅係最尾嘅克頓道休憩處，個女廁入面有塊換片板，啱晒我哋呢D帶住個B去行山嘅家庭﹗



行咗個幾鐘就順利到達HKU，難得燒腩仔咁合作，全程自己行無咋型，只係食咗一粒珍寶珠就夠，梗係要奬佢去canteen食返個薯條點茄汁啦﹗艾菲都叫咗半件邪惡西多士同碗仔翅畀自己， 但就不停畀對面個小朋友搶食囉﹗>.<



一場來到爸爸母校，點都影返張相留念，唔...如果你哋將來是但一個入到大學阿媽就安樂啦﹗



見個環境幾舒服，就搵張長凳畀BB豆豬出來坐吓，順便畀燒腩仔望吓松鼠，呢日係Halloween嘅前一日，艾菲特登同BB豆豬夾個自製Halloween髮夾出來應吓節，好開心個夾好吸睛，沿路不停有途人讚靚呀﹗



玩咗大半日，係時候返歸，呢期個個搶住去新開嘅黃埔何文田站，估唔到我哋家陣先去香港大學站，嘻...