原先我哋想八點就出發，早D行完早D去藍田食飯行吓街再返屋企休息，點知...BB豆豬呢晚唔知做乜不停醒，醒咗餵完佢又唔肯瞓返，結果艾菲攰到八點先起到身，再之後燒腩仔個肚又有少少唔舒服，一波三折後終於搞到十點先出到門口，去埋油塘大本型食少少嘢，十一點先到起點。
一開初係行呢D石級路，望落都OK易行，加上呢日天陰陰無乜太陽又有少少風，其實都行得幾舒服，點知少爺兵燒腩仔行咗無十分鐘就開始發作，又話肚痛又話熱又話痕仲扭埋抱，即係咁...艾菲揹住BB豆豬行上去都行到索晒氣，仲要應酬佢D臭脾氣，堅係諗過返歸調頭走㗎啦，好彩最終都成功氹到佢繼續行。
行咗半個鐘左右就到第一個check point，華人永遠墳場同衛奕信徑嘅交匯處，有得坐又有大海景望，仲有勁清爽嘅風吹埋來。
上到來有咁靚嘅風景睇，我哋仲開埋枝珍寶珠畀佢食，少爺兵終於收聲同肯笑返。
抖咗陣我哋就起行上炮台，望見呢排樓梯其實艾菲有諗過縮沙㗎，但為咗做好榜樣畀燒腩仔睇唯有頂硬上，點知上完樓梯畀人點咗去行條捷徑，行落感覺有D危險，艾菲無信心可以揹住BB豆豬沿路落返去，所以即時叫停落返去交匯處，然後有幾個好心嘅行山友就同我哋講捷徑側邊條石屎路其實都去到炮台，但一上一落之後我哋決定唔再上去，唯有留返下次再來先去睇啦...
離開交匯處後我哋就向住藍田進發﹗
沿路可以望返落油塘。
行行吓見到呢D草好靚又影吓...
之後見到呢個橙色牆幾特別就叫燒腩仔埋去做model畀艾菲影，不過佢明顯係走騎呢路線㗎囉...
咩事呀...
再來...
就係咁行吓講吓笑吓，我哋就完成咗魔鬼山呢一段路落返山，落到山腳時米高話呢到走的話可以去藍田廣田邨，不過行過隔離五桂山，「好快」可以落返去藍田公園，一聽到公園有燒腩仔最愛嘅滑梯玩，慈母上身嘅艾菲當然gogogo啦，點知...就係咁中咗伏...
（待續...）
沒有留言:
張貼留言