六個月

Happy Birthday to me, Happy Birthday to me, Happy Birthday to me, Happy Birthday to me! 媽媽話我終於夠半歲，而且去咗聯合醫院見兒科醫生兼磅重， 宣布我追磅大成功，體重達標不特止仲爬返上之前條成長線，所以喺前一個星期六，即我半歲當日買咗個蛋糕返來同我慶祝，不過個蛋糕我都無份食嘅，枝爉燭仲極速地畀哥哥吹咗添，你哋到底係慶祝緊邊個生日㗎...



呢個月我繼續全人奶放題，只係戒咗半夜餐夜奶，一日埋身食足八餐，每次大概十至十五分鐘啜晒兩邊就放口，媽媽話我宜家體重回覆返正常，來緊開始食固體之後應該會慢慢減餐，佢宜家半夜仲有起身泵奶，泵出來嘅奶會畀哥哥早餐時飲，如果有事要出街就留起180-200ml畀我用樽飲一餐（艾菲：但佢用樽飲得麻麻，有時飲120ml就停口），佢話只係眼瞓D但無乜壓力算係餵得好舒服，不過都考慮緊泵到我之後食到兩餐固體就停泵。



至於食固體方面，由於之前見聯合醫院個姑娘，佢建議我搞返好體重先開始加固（姑娘話七個月先加固都未遲喎），所以媽媽一直都唔太心急，但見我每次陪佢哋食嘢飲嘢都眼甘甘望到實喪吞口水，就喺十月尾時畀我試食咗人生第一口固體蘋果蓉，不過我原來未係好識食，不停用條脷頂返D蘋果蓉出來，搞到媽媽餵咗幾啖就收工，佢叫我到正式加固時要努力練習吞嘢喎...



對比起上個月，今個月瞓覺又進步咗DD，宜家每晚十二點左右食完最尾一餐奶就瞓，「無事無幹」的話可以一覺瞓到第二朝七點半媽媽叫我起身食奶（艾菲：但一星期會有好幾日朝早五點幾六點就自己醒囉>.<），再極速瞓返到十一點先起身，然後等哥哥返咗學我下午兩點左右就會再瞓到四點先起身，之後夜晚多數會再瞓多半個鐘至一個鐘不等，無再好似之前咁易畀哥哥嘈醒，但好多時眼瞓會喺到大叫，死都唔肯自己瞓，亦唔肯食奶咀，要啜住媽媽或者出街揹住先肯瞓，而且同哥哥一樣鐘意趴喺到瞓，仲要唔肯用睡袋嫌困住手腳郁唔到。



一度好嚴重嘅䅻媽症逐漸消失，宜家至愛依然係媽媽，佢行開咗或出咗街會四圍望去搵佢，不過都肯跟其他人畀人抱吓，特別鐘意同哥哥玩，亦識得主動拍人同講嘢撩人玩，出街唔怕陌生人，人哋撩我一定會甜笑回應， 笑點奇低好易氹，求其一個怪樣或怪聲都會笑到咔咔聲，繼續做開心寶寶深得大家歡心。



已經識得自己扶住坐一陣，同哥哥一樣五個幾月大出街就可以坐high chair，等爸爸媽媽唔使抱實我食飯，順便free返對手出來照顧吓哥哥，媽媽話來緊要挑戰超級市場BB車，剩機唔畀哥哥再坐叫佢負責推車。



除咗識得自己坐之外，我仲已經識得䅻住地下四圍爬（嚴格來講應該叫冷），媽媽話我動作好靈敏同快手，已經識得將D嘢由一隻手轉去另一隻手，唔使一秒就反到身，又可以輕易地喺bumbo chair到擒出來，兼極速爬出playmat，或者伸手去搞哥哥D寶貝車或媽媽對拖鞋，最鐘意乜都塞入口試味，而隨住我嘅活動能力越來越高，宜家多咗自己一個四圍探索嘅時間，等媽媽可以偷雞快手做吓其他嘢。

~~~~~~~~~~~~~~~~~~~~~~~~~~~~~~~~~~~

半年母乳媽媽有感：

一轉眼就做咗半年母乳媽媽，唔覺唔覺我哋就到咗第一個check point，由BB豆豬出院開始，艾菲就用全母乳餵佢，一罐奶粉都無開過，對於上一胎試過乳腺炎到要入院抽針放膿，畀醫生勸停嘅媽媽來講，成件事真係好amazing。

雖然未生前已經盤算住要全母乳餵哺，但衰過一次點都有D心理陰影，再加上BB豆豬開初唔肯埋身食，兼坐月後奶量忽然離奇下跌，艾菲堅係諗過放棄唔再餵，但餵吓餵吓又一日，餵吓餵吓BB豆豬就學識埋身食，餵吓餵吓我哋就越夾越順，餵吓餵吓就撐到今時今日，除咗輕磅D佢其他發展都相當理想。

全母乳餵哺從來唔係一件易事，要成功不得不多謝米高嘅全力支持兼鼓勵艾菲多D出街，就算BB豆豬之前要追磅一日食足九餐，佢都盡力配合去街時間同安排邊到餵奶，而另一個要多謝嘅就係BB豆豬，無佢嘅強力奶泵咀幫手吸啜，睇怕艾菲會重蹈覆徹瘋狂塞奶同發燒（好幾次都係塞塞地畀佢啜一陣就通返），更加完成唔到當母乳媽媽嘅心願。

宜家艾菲已經練成一條餵奶巾走天涯嘅身手，基本上真係行到邊餵到邊，坐巴士餵試過，喺餐廳邊食飯邊餵試過，等位時餵試過，去超市排長龍等找數時餵試過，行街時邊行邊餵都試過，呢D經歷都係前所未有，亦值得艾菲好好去記住一輩子嘅。

艾菲唔知自己嘅母乳路仲可以行到幾長，現階段只可以話餵得好舒服所以會繼續落去，下一個check point應該係一歲，希望我哋兩母女能夠好好享受落去。

（寫於凌晨十二點幾餵奶期間）

P.S: 大家無睇錯呀，埋身餵奶時兩隻手係好free㗎，可以打機玩電話整手作仔甚至寫blog，又大家終於明點解艾菲一湊二仲做到咁多嘢啦﹗嘻...