Red Bull飛行日2016

上星期五晚上網時，忽然畀艾菲發現星期日就係Red Bull飛行日，見地點喺郵輪碼頭近住我哋，燒腩仔又應該會幾鐘意睇，同米高夾咗踢波比賽時間唔撞就即刻登記去玩，眼見星期六忽然降溫又落晒大雨仲以為無得去，點知一覺瞓醒竟然係大晴天，咁就梗係即刻gogogo啦﹗



一入場遠遠就望到呢個Red Bull嘅booth，不過艾菲想搵嘅Red Bull送你一對翼嘅車就唔見。



起飛時間係十二點，我哋十一點左右到，無所事事就喺D booth到玩吓遊戲，呢個game係掟波波贏機票，咁呢D機會當然唔係屬於我哋㗎啦﹗哈哈...



見仲有時間就畀燒腩仔喺草地跑吓，呢日天氣真係超好，可惜前一晚落完大雨草地好濕，如果唔係就可以喺到邊野餐邊睇飛機。



差唔多時間就去搵位睇飛機，我哋呢D平民當然入唔到VVIP靚位區，不過來遠望都望到嘅，如果霸唔到靚位可以睇大電視直播。



準時十二點MC出場，吹咗一陣就開始起飛啦﹗每架飛機起飛前都有三十秒表演，基本上都係跳一輪舞跟住直飛落水，第二架出場嘅係angry bird，係艾菲影得最清而燒腩仔又最記得嘅飛機，點解印象咁深係因為佢有三隻緣色豬跟尾，臨飛落水前佢哋將angry bird層皮剝咗得返排骨，都幾搞笑㗎﹗



睇咗四架左右我哋就無再睇落去啦，跟尾嘅基本上都係差唔多模式，寧願四圍逛吓等燒腩仔走動吓。



最後排埋呢枝免費雪條我哋就走啦，而呢個為食小朋友全個朝早除咗四圍走就係不停飲飲食食，返到屋企連午餐都唔使食。>.<



臨走忍唔住拎iphone影返個鯉魚門全景，平時喺上面空中花園玩水就玩得多，第一次來下面嘅大草地，原來個view咁靚。