七個月

Hello!我今日七個月大啦﹗無乜幾何媽媽可以準時出到blog，所以笑得特別燦爛囉﹗



由我足半歲嗰日開始，媽媽就畀我食糊仔，不過我初頭唔係好識吞，媽媽仲以為我唔鐘意食嘢，不過練咗一個星期之後我就pick up到吞嘢嘅技巧，仲識拍枱追嘢食同叫媽媽餵快D添，最近呢個星期已經進展到食粥仔，平均20分鐘會食完一碗粥，除咗正餐之外間中佢都會畀D甘荀條同咬咬樂我玩BLW，短短一個月我已經食過蘋果，雪梨，香蕉，甘筍，南瓜，蕃茄，菜芯，薯仔，雞肉同豬肉，so far係菠菜唔係好受得，食完噴射式咁嘔返出來之外，其他全部無問題。

媽媽見我固體進展都理想，呢兩日就正式同我轉咗食兩固，宜家「正常」來講一日四奶兩固，唔正常時半夜醒兩轉要食多兩餐，最唔正常係媽媽上星期初腸胃炎，我成日keep住每隔兩個幾鐘就食一次（艾菲：連半夜都係咁﹗即我病咗但完全無得抖﹗估係因為戒口無乜食嘢飲水所以佢唔夠飽）， 媽媽話成功由八餐轉到六餐，體重keep到喺自己條生長線到，佢已經好滿意（艾菲：但如果可以轉到三奶兩固會更好囉）。



瞓覺繼續係我嘅弱項，可能開始食固體減奶，D生理時鐘有D亂仲未適應，呢排成日食完夜晚十一點餐奶唔願瞓或瞓一陣就醒，玩到凌晨一點先肯正式瞓，又成日半夜四五點醒，仲要啜完都未必即刻瞓返，搞一大輪倦極入睡都係頂多瞓到十點半（哥哥十點醒佢多數跟住就被嘈醒>.<），就連晏覺都醒瞓咗，以前一瞓就兩個幾鐘，宜家個零鐘就自己起身，而夜晚一nap就成日眼瞓到捽晒眼都仲要死頂，寧願嘈嘈閉喺到大叫都唔肯瞓（艾菲：喺街到大叫堅樣衰），肯食返奶咀但當玩具，啜完會即時醒晒更加唔瞓，最鐘意瞓爸爸媽媽張床，搞到媽媽已經練成側身餵住瞓嘅絕技來暗我瞓（艾菲：怕壓親佢都會較定鬧鐘叫醒自己再抱返佢落BB床，唔可以同小朋友一齊瞓喺我嘅小小堅持）。



黐媽症開始有回歸嘅跡像，尤其扭眼瞓同肚餓時邊個抱都無面俾，一返媽媽身就收聲含住泡眼淚笑，識得媽媽帶hip seat就係出街，見媽媽搞呢搞路都仲未抱我會爆喊驚媽媽賣甩我，開始有D認人，唔再隨便俾人抱，出街陌生人撩我會望實佢，但唔一定個個都畀反應，不過骨子裡依然係個笑點低嘅愛笑寶寶來，仲要係勁怕人吱嗰種。



已經可以唔使扶住就咁坐，坐超級市場BB車識得緊握扶手，仲識腳fing fing好enjoy咁款， 重點係好似知道自己終於爭贏哥哥咁，識望住爸爸媽媽展露勝利嘅笑容（艾菲：哥哥無得再坐超市BB車喺後面嘈生晒）。



活動能力A++，日日BB自由行咁喺屋企四圍爬，主要攻擊洗手間塊地氊同各樣電器嘅電線，基本上快手到媽媽入一轉廚房出來就唔見咗個女，終於佢頂唔住買咗個圍欄返來招呼我（呢個下篇blog講），除咗爬之外另一強項係快手，成日趁哥哥唔為意就埋去佢個停車場到，拎晒佢D靚車出來推同咬（艾菲：開始識同哥哥爭嘢玩），有次去餐廳食飯仲手快快拍跌成碗麵（艾菲：好彩已經食完D湯都唔熱），淋到自己同爸爸成身濕晒添，自此以後媽媽就警告爸爸如非必要，食飯時都唔好心軟抱我啦﹗