上次畀米高賣完豬仔之後，其實都無嚇窒艾菲，話咁快我哋已經plan定下次嘅目的地南丫島，等米高捱過咗公司嘅peak season，見啱啱個星期日天氣好又無特別嘢做就又gogogo，仲堅神心咁九點就出門過海去坐十點四班船入索罟灣（前一班八點幾真係無能為力去到坐啦﹗）。
由於入索罟灣嘅船少，所以我哋坐架船幾乎爆滿，我哋前面仲坐正一班六至十歲左右嘅小朋友，熱鬧到你想眠一眠叉吓電都唔得，好彩船程唔耐話咁快就到。
索罟灣呢邊一如以往無乜嘢睇，不過相對幾年前叫做多咗一兩間手信鋪可以行吓，天后廟對出又有D臨時義賣攤位可以睇吓。
去完洗手間，又hea行咗一輪，係時候出發上山啦﹗燒腩仔亦一貫作風，起行唔夠五分鐘即嘈住嗌「唔想行」，唔...綜合佢幾次嘅表現來分析，我哋覺得佢係因為新地方，未去過驚唔知會發生咩事，所以要扭擰一輪warm up吓。
好彩南丫島呢到唔難行，而且好快就可以望返落去睇到成個索罟灣嘅風景，有靚view睇再加埋珍寶珠攻勢，燒腩仔慢慢就好D。
行咗大半個鐘左右，已經見到南丫島地標之一嘅發電廠，記得N年前同米高來拍拖行過同一段路，想當年來到呢個位已經喘晒氣唔多頂得住，但今次揹住BB豆豬行都好輕鬆咁，中間仲要無停低抖過，果然體能係要練返來㗎﹗
見到發電廠即洪聖爺灣都不遠矣，原先以為燒腩仔會話去玩沙玩水，點知佢零反應完全無話想玩，咁艾菲喺更衣室同BB豆豬換條片就走。
見沙灘後面間屋個花園幾靚，有個阿媽又千方百計呃個仔埋去影吓相，但今次就交唔到D咩騎呢樣出來囉﹗:P
路過茶檔，見差唔多到食飯時間，我哋仲想繼續上去睇風車，於是入咗去坐低食個飯叉吓電，順便搵個位餵BB豆豬，點知艾菲叫個餐蛋丁中晒伏，蛋熟透都算個一丁竟然係未熟成個麵餅放湯咁，即刻諗辦法氹燒腩仔行完山先去第二到食豆腐花（米高本來應承食完飯就叫畀佢食）。
食飽就繼續行，要去睇風車先要行一大段斜路，應該係星期日嘅關係，沿路都幾多小朋友一齊行，所以燒腩仔跟住人哋行吓跑吓，都無乜點扭點嘈。
難得喺行人路見到呢D倒影鏡，埋去影返張全家幅先﹗不過呢段路堅多蚊，艾菲同米高中晒招（好彩兩個細無事），仲要艾菲出發前噴晒蚊怕水喺外露嘅手手腳腳，隻衰蚊居然咬咗艾菲塊面兩啖，勁到隔住條legging咬多艾菲膝頭一啖添﹗
行咗半個鐘左右就見到大大個風車出現喺眼前，對於燒腩仔來講應該係好神奇，艾菲估佢無諗過個風車係咁大個，仲要吹到「fit fit」聲。
入風車區行咗轉坐咗陣，我哋就上咗長樓梯去觀景亭，呢日天氣好到可以直望對面香港仔。
睇完風車我哋就落返山去榕樹灣，路過阿婆豆腐花當然要兌現承諾入去食，一人一碗唔使爭，碗豆腐花滑到呢， 個糖水底仲要有陣好香嘅薑味，正呀﹗
食完豆腐花喺榕樹灣行咗陣街，差不多三點我哋就撤退出返中環，而昏迷咗大半日嘅BB豆豬上船後即醒，仲keep住全程呱呱叫等我哋想抖吓都唔得... >.<
返出中環轉天星小輪過海返屋企，路過海港城順便影吓聖誕燈飾先，今年聖誕應該唔會再過來逼㗎啦，大時大節都係遠離人群留喺屋企避世啱我哋D，嘻...
沒有留言:
張貼留言