蝸居地方有限，艾菲同米高一直有共識，屋企D無謂嘢少一件得一件，好似遊戲圍欄呢D大型得來又唔係用得好耐嘅家具，我哋真係好唔想放喺間屋到，想當年燒腩仔無咁早識爬，到識爬時亦只係跟住艾菲走，最鐘意喺廚房門口睇艾菲煮飯，頂多係爬去偷吓檸檬茶，所以只喺廚房同洗手間裝門欄已經OK，我哋又點會估到幾年後會遇著進擊的BB豆豬，未五個月就識爬不突止，仲要專向危險嘅地方出發，最愛洗手間張地氊同客廳把風扇，有次艾菲入廚房睇一睇火出來，佢個口已經咬住咗條電線﹗﹗﹗又有次又係入廚房半分鐘出返來，個廳空無一人嚇到個心離一離，原來佢爬咗入哥哥房搞雜物﹗嗰一刻艾菲就知道有D嘢係無得避嘅...
研究咗一輪之後，真心覺得網床唔係好啱我哋，皆因客廳再無多餘嘅空位，平日燒腩仔同BB豆豬兩個share張playmat已經有D逼，再放張網床喺到燒腩仔就會無晒位玩，又有諗過韓國可以摺成波波池款嘅playmat，但價錢貴不在講，個波波池睇落亦唔多阻到BB豆豬嘅去路幾耐，咁唯一可以揀就係遊戲圍欄，但原來香港宜家只係得返韓國遊戲圍欄賣，即膠質好似水馬一舊舊嗰款，圍完之後個廳應該會好逼，而且感覺好膠唔係艾菲杯茶，於是上淘寶搵返啱心水嘅木圍欄。
上淘寶睇見用家評價唔差就瑣定幫襯天貓嘅悠悠龍旗艦店，度完尺後發現三塊大size已經夠圍外圍成個L型，問咗客服一輪先安心落order，收貨後砌同抹咗大半個鐘就搞掂，我哋揀無漆款真係無味兼好光滑唔拮手，加埋底座之後，再喺兩邊分別用索帶同繩縛實電視櫃同梳化底，基本上都好穩陣唔會被推跌，亦因為木欄通風又通光，裝完感覺唔會太焗促，而且個欄嘅駁位可以瑣實或270度轉，必要時可以解一邊繩將個欄摺埋，Good！
從此被困嘅BB豆豬，初時都唔係好知發生乜事，只係圍住個欄爬來爬去又摸來摸去，到第二日瞓醒就開始意識到出唔到去，當我哋留低佢一個喺入面時，識得好慘咁爬咗去角落到望住艾菲扁咀爆喊，搞到燒腩仔以為我哋罰佢，仲走返學校同班主任講我哋罰妹妹添...
不過話都無咁快，佢已經習慣咗個圍欄，但無人同佢一齊喺入面時，依然唔多願玩入面嘅玩具，而係爬去個欄側邊，好好奇咁望住艾菲做家務，而艾菲宜家終於可以好安心咁做家務，唔使再吸個塵都怕呢個小朋友撲埋來搞搞震（哥哥當年勁驚吸塵機，但妹妹係勁鐘意吸塵機，仲會追住個吸塵機來玩:P）。
至於同樣被困嘅哥哥呢，就不知幾enjoy畀我哋圍，至愛係圍欄道門，由第一日裝好後即開始研究，我哋未教佢點用已經自己摸到點開，仲不停開開閂閂道門來測試個門襟唔襟用，又用專家口吻話畀艾菲知道門係可以180度打開，仲試過專登開道門放妹妹出來添，艾菲俾佢搞到都唔知好嬲定好笑啦﹗
又艾菲呢個遊戲圍欄係雙十一後兩星期先買，之前都聽聞雙十一好多間集運爆咗廠，眼見兩間之前用過嘅集運都喺facebook畀人鬧，雖然宜家用開間無乜嘢，都係唔敢用集運運落來，而係直接用順豐到屋企，點知連順豐都要用五日先送到，睇來呢個雙十一效應都幾恐怖，來緊仲話會有雙十二添，搞到艾菲有堆嘢想淘都唔係好敢落order住呀﹗
沒有留言:
張貼留言