DIY母乳皂

之前整母乳cream時都提過，艾菲屋企有大堆過期冰奶要清，整cream每次只清到90ml，長遠來講都係整母乳皂比較實際，但上網睇過代製母乳皂價錢唔平，如果整一次半次用來做紀念還好，好似艾菲咁真係諗住整來長用嘅，睇來無幾千蚊都成唔到事，咁慳家嘅艾菲當然主力研究自己DIY嘅可行性啦，所以好早之前已經喺圖書館借咗兩本書返來。



睇完書，上過DIY護膚品嘅速成班，再上網睇咗D片，發現整母乳皂其實唔難，但需要D時間同技巧，亦需要一堆專用嘅工具（因為整過皂嘅工具唔可以再用來煮食），為怕自己縮沙打退堂鼓，之前淘寶時好順手咁淘咗一堆工具同模落來，又專登去億世家買咗個平價手提攪拌器（神仙棒），好﹗一切準備就緒就等東風吹啦﹗



千辛萬苦先終於等到一晚，燒腩仔同BB豆豬都乖乖地喺十一點半前瞓著，問准米高後就執材料開工啦（因為艾菲一開工就唔停得，期間有事就要靠米高頂住）﹗艾菲今次第一次試做，做入門級嘅蜂蜜馬賽乳皂，材料都係最基本嘅，氫氧化鈉，冷壓初榨橄欖油，椰子油，棕櫚油，母乳冰，水同蜂蜜。

配方參考自娜娜媽本《自己做100%保養級乳香皂》：

extra virgin初榨橄欖油 260g（因之前浸咗D金盞花浸泡油有剩，所以今次用埋佢）
椰子油 45g
棕櫚油 45g
氫氧化鈉 50g
母乳冰 105g
開水 10g
蜂蜜 10g



量好全部材料後，艾菲先將全部油加熱撈均，油溫控制喺大概40-50度左右，撈均（變透明）就可以放一邊等佢降溫，之後就著好防護裝備（鹼液屬於強鹼容易𤆥傷，所以安全眼鏡，口罩，手套手袖同圍裙係基本配備），再閂好房門同打開廳嘅窗甚至門確保空氣流通（氫氧化鈉遇水時會有白煙要避免吸入），然後就逐少逐少咁將氫氧化鈉加落母乳冰到撈勻，直至兩者完全混合就OK，量溫度確保溫差同油溫喺十度以內就可以將D油倒埋落去開始打皂。

打皂其實有D似整蛋糕打蛋白咁，皂化後會變深色同變得杰身好似沙律醬咁可以喺上面寫字留痕，但又唔可以單靠電動攪拌器去打，因為會打咗好多泡落去令到塊皂出來效果唔夠滑，所以要邊用手打再間中落神仙棒落去打，據講全手打分分鐘要打一個鐘打到手軟先搞掂，艾菲有神仙棒幫手只係打咗20分鐘左右，差不多完成時加埋撈好嘅蜂蜜水落去打勻。

打好皂液就可以倒模，因為艾菲無信心自己切皂切得靚，所以寧願花錢淘矽膠模返來，之前速成班個老師教想出來個效果靚D，落咗三分一皂液就要搵D工具篤一篤個模，等D皂液均勻D去到個模嘅花紋位，又矽膠模係比較軟身，艾菲倒好模後移佢入箱時出咗D意外幾乎全部倒瀉，結果要全部倒返出來抹乾淨，將個模放好入箱倒多次先成功。



母乳皂唔使衡溫處理，所以入模後放喺廳到風乾已經OK，等兩至三日左右就可以脫模啦﹗不過呢個時候塊皂依然好軟身，脫模時要溫柔D小心D呢﹗而由於係第一次整，艾菲用咗比較有紀念價值嘅模，脫模出來效果好唔錯呀﹗風乾多一個月，等佢完全皂化後就用得，書寫話呢款皂有全面滋潤保濕殺菌嘅功效，希望真係幫到濕疹底嘅燒腩仔啦﹗



講開DIY，艾菲又順便介紹吓呢樽金盞花浸泡油，相信唔少小朋友有濕疹嘅媽媽都聽過金盞花膏呢樣嘢，網上搵返來資料話佢有修護皮疹痕癢，瘡疤炎症和鱗屑等等嘅功效，艾菲之前都買過畀燒腩仔同BB豆豬搽，對燒腩仔好似唔太起到作用（因為只係修護軟化傷口唔係止痕），但對BB豆豬又幾work喎，佢D敏感起粒粒位置一搽就好，無意中發現原來可以自己浸油整，艾菲當然又即刻買D金盞花返來試啦﹗

艾菲幫襯開間原材料鋪$10就有一大袋金盞花乾，先用水波爐蒸氣消毒加烘乾要用嘅寬口玻璃樽，再落金盞花乾同倒橄欖油去浸，書教嘅比例係1花 : 3油，不過艾菲實際浸完發現根本唔夠油，唯有再不停加到浸到全部花乾為止，搞掂就可以封口放好，頭一星期每日都搖一次，之後就每星期搖一次，一個月後就可以開封，隔咗D花乾拎D油來用。



金盞花膏嘅配方係超簡單，只需金盞花浸泡油同蜜蠟呢兩樣嘢，艾菲今次都係參考網上嘅配方：

金盞花浸泡油 75g
蜜蠟 12.5g



就咁用熱水將兩者座溶撈勻，就可以倒落小盒，等佢凝固後就OK㗎啦﹗由於係全天然自己整，可以好放心畀小朋友用，亦由於無添加任何防腐劑，所以要放陰涼位置，用時都要不時聞吓有無變壞，而為咗唔好浪費，今次艾菲自己都有用到，搽喺手指出濕疹嘅位置（真係想唔認老都唔得，生完BB豆豬抵抗力大不如前，今年D濕疹出得特別勁），感覺比搽普通cream更滋潤，而且有傷口嘅位置真係無之前咁硬同痕（D疤就好時皮膚特別硬同痕，然後一痕就好易又R返損），不過就要密密搽否則就前功盡廢。