一年一度又+1

湊住兩個D時間好似火箭咁運行，唔知做過咩咁又過咗一日，一轉眼上星期三就係艾菲嘅生日，再加上生日前兩星期米高公司peak season忙到嘔，留低艾菲日日同兩個高需求小朋友單打獨鬥，仲要打敗仗一個星期內又腸胃炎塞奶同大傷風緊接住來病，所以今年真係對自己生日無咩特別期待，只係希望一家人開開心心健健康康地過。



作為一個FTM，生日無假放是常識吧，呢朝燒腩仔無發作跳掣仲識同艾菲講生日快樂已經執到，所以成功趕咗佢出門口上校車後，艾菲即去買個下午茶請自己食，然後就用盡方法扑暈BB豆豬畀自己抖一抖，等到米高下午三點幾返來接更（艾菲嘅生日優惠就係米高請半日假返來幫手湊仔），先叫做鬆一口氣可以放鬆心情做吓自己想做嘅嘢。



等燒腩仔放學返來做完功課，我哋就出發去食飯，因為知道米高會後補生日飯，正日呢餐艾菲就決定hea食，去咗食宜家假期基本上係無可能搵到位嘅Ikea，貪佢食物OK又夠baby friendly，唔...阿媽連諗食咩都係諗小朋友先，呢個應該係天性來除非唔係。



好似好hea咁就過咗個生日，不過忙到爆炸嘅米高其實都早有安排嘅，一早喺生日前兩日訂咗蛋糕返來同艾菲切，仲日日三催四請咁捉艾菲去鞋鋪㨂波鞋，話要送對波鞋畀艾菲做生日禮物，順便鼓勵艾菲行多D山喎...



又記得艾菲講過生完BB豆豬坐完月睇完中醫調理後要食返餐buffet做奬勵（之前連續食咗半年中藥堅係食到口都啖），專登book定上星期六嘅九龍酒店buffet同艾菲慶祝，皆因佢有艾菲勁like嘅生蠔，又有六歲以下小童免費優惠，咁艾菲為咗報答佢當然係出盡力地食啦，就算BB豆豬中場扭眼瞓艾菲依然邊抱邊食，反而燒腩仔食力明顯無以前咁強勁，只係主打食雪糕同糖，正餐都只係點到即止食少少就話夠，好彩佢係free姐。



一年一度嘅生日就係咁平平淡淡地過咗， 生日後到底幾多歲艾菲已經唔記得咗，只知道上星期五難得同米高喺娘家附近拍拖，買格仔餅時畀個哥仔問「阿妹，你要咩醬呀？」，幾乎驚喜到唔識畀反應囉﹗kakaka...