喺課室同同學仔玩咗一輪之後我哋就上車出發，先去第一個地點大埔珀麗高爾夫球會打golf，學校旅行去打golf真係第一次聽，去到會有教練做簡單示範（即睇完你都無可能會識打嗰種），然後就兩家人（約六至七人）share一條球道任打一個鐘，主力當然係畀兩個小朋友玩，燒腩仔睇見同學仔打又好興奮咁跟住試打，不過睇相就知佢係有姿勢無實際啦﹗枝球棍亂咁飛，打完個波都唔知畀佢掃咗去邊﹗kakaka...
小朋友玩完，艾菲都有放低BB豆豬打咗幾球，差不多五六年無打過波，喺無帶任何私伙裝備下，仲打得郁兼打得起個波，都算係咁㗎啦，至於米高就終於恨到，可以親自教燒腩仔打golf（佢應該期待咗呢日四年），而燒腩仔為咗喺同學仔面前威威打遠D，亦罕有地乖乖聽爸爸教導，最搞笑係事後公公問燒腩仔知唔知爸爸識打golf，佢即答「我打得叻過佢啦」﹗得戚得佢呢...
一個鐘轉眼就過，等集合期間叫燒腩仔同同學仔影吓相，個個合照嘅女同學都笑到勁開心勁甜，唯獨佢一個全程屎面，唉...扭擰大師又上身，又想我哋出席佢嘅學校活動，但我哋出現喺佢D老師同學面前佢又鬧情緒，乜都唔好唔得唔可以，尷尬事小破壞一家人嘅心情事大嘛。
離開高爾夫球場後我哋就開車去第二站嘅天水圍綠田園，學校安排咗三個鐘任食BBQ畀大家，但呢個安排感覺有D玩家長feel，小朋友邊有可能乖乖坐定定燒野食，佢哋個心一早畀門口嘅電動車吸走咗，好似燒腩仔咁枝燒烤叉都唔知有無拎咗一分鐘就話唔燒，仲不停嘈住要食棉花糖同去玩，最終食咗一塊麵包一條腸仔就話夠，艾菲都無奈屈服畀佢棉花糖放題先叫做好少少。
而我哋除咗要應付一個扭擰燒腩仔，仲要招呼呢個上車即瞓落車即起身搞搞震嘅陪玩BB豆豬，帶住佢哋對住個火爐，仲要遇正大太陽加廿幾度高溫，堅係大家身心都熱到跳舞﹗艾菲只可以講句難為了爸爸，如果無米高頂住熱不停燒嘢畀我哋食，我哋三母子餓死都似。
天氣熱到個個小朋友都除剩件底衫（好彩呢日著咗短袖底衫），而燒腩仔都快手R到手臂損兼出血，但好彩嘅係佢食完棉花糖心情漸好，呆坐咗陣後忍唔住出去沙地同同學仔玩，無無聊聊咁追逐吓行吓石頭砌嘅平衡木，已經開心到不得之了，好一班充滿童真嘅小朋友呀﹗
米高快手燒夠食飽後，我哋就帶燒腩仔去玩其他嘢，由於知道呢到樣樣計錢，又知道燒腩仔實係乜都話想玩，唔想佢倒錢落海唔識咩叫珍惜，所以出發前先同佢約法三章，講明只玩兩樣嘢，佢當然係揀車同彈床啦，但為免佢後悔先帶佢行一圈再玩，呢到其實同其他假日農場一樣，都係有餵動物，畫沙畫，撈金魚，電動車，彈床同船仔，種類都算多，價錢亦叫合理。
行完一圈依然堅持玩電動車，艾菲唯有乖乖付鈔，但唔知係燒腩仔唔識踩油定架車問題，架車仔行得勁慢同唔順，不過難得可以同同學仔一齊玩車，燒腩仔都唔多介意呢個問題，睇佢又我是車手上身就知佢好enjoy啦﹗
玩完電動車燒腩仔本身話想玩彈床，艾菲都準備排隊畀錢㗎啦，但唔知米高同佢講咗咩，佢忽然轉軚話玩早幾日喺南丫島買架飛機仔，據聞呢個係米高嘅兒時玩意來，艾菲就聞所未聞啦，細個邊有閒錢玩呢D玩一次半次就爛嘅嘢，最多都係玩吓一蚊吹波膠。
嘩嘩嘩﹗阿仔你型到呢﹗好有姿勢咁喎﹗不過架機都係極速墜地﹗但公平D講，艾菲都有試玩過，又確係需要D技巧先飛得起同飛得遠嘅。
玩咗十五分鐘左右，架飛機就畀燒腩仔玩爛咗啦，呢個仔一知道無飛機玩，第一時間又話要玩多次電動車，仲講明呢次要揸電單車，但唔知搞咩架車又係行吓停吓，如果係踩油問題佢之前去其他地方玩又無咁嘅問題㗎喎，問負責人佢就只係行埋去拖返架車向前行就走，奇怪奇怪﹗
玩完車燒腩仔好自然就話想玩返隔離個彈床，當艾菲提醒佢應承咗只玩兩樣遊戲時，扭擰大師即時歸位，來個淚灑當場，學足妹妹扭計嘅樣，扁咀加兩滴眼淚，呢吓艾菲堅係有D火（因為之前講過好多次叫佢做返自己，而佢亦明知呢D方法係唔會令艾菲心軟），堅持唔玩兼帶佢返去搵試圖燒第二轉嘢食嘅米高，亦好彩一眾老師正正喺我哋個爐附近燒緊嘢食，燒腩仔都唔係好敢再扭落去，然後扭扭擰擰咁陪佢去咗搵現任同前任班主任影相後，米高都相當識趣買咗一人一枝雪條畀我哋兩母子食順便歎冷氣（下火﹗哈哈哈...），而中途忽然無電嘅BB豆豬都瞓醒開餐。
瞓醒又食飽飽，心情大好咁笑晒口畀艾菲任影，唔...媽媽真係要好好珍惜你仲咁細個，可以任由大人擺布嘅日子，過多一年連你都加入埋扭擰行列，媽媽真係無眼睇啦﹗（我知我知，哥哥其實都好乖，只係比較多情緒姐...）
歡樂嘅時光特別快過，又係時候講bye bye，臨走米高提先記得要影返張到此一遊嘅全家幅，學米高話事頭我哋仲有幾多年可以親子旅行吖， 唔開心嘅扭擰嘢忘記佢吧啦，只記住開心嘅時刻就夠，期待明年K3學校旅行，燒腩仔再大個D懂性D能夠表現更好吧﹗
沒有留言:
張貼留言