有過之前一年嘅經驗，加上燒腩仔又大個咗知道有得玩（老師同佢哋提過），早一星期已經開始日日提住返學校食雪糕車雪糕，所以艾菲都唔敢唔出席呢個活動，仲專登叫埋米高放半日假來幫手排隊，不過崇拜下午一點就開始米高趕唔切join，艾菲無得揀要一拖二出席，好彩BB豆豬都好合作，開始無耐飲咗陣奶就瞓咗，崇拜完先起身一齊玩。
崇拜完我哋就跟大隊一齊返學校玩，燒腩仔當然第一時間話要食雪糕，但條人龍已經長到轉咗幾個彎，好彩米高及時趕到幫手排隊，艾菲就花盡口水先氹到燒腩仔趁未係好多人時上二樓玩攤位遊戲，而其中一個遊戲係由燒腩仔嘅新班主任負責，總算有人幫手搞吓扭擰中的燒腩仔（唔...我哋一喺佢老師同學面前出現佢就會有D情緒）。
玩完樓上嘅game我哋就落返地下，拎杯爆谷再睇吓咩情況，眼見仲要等一段時間先有雪糕食，艾菲又諗辦法氹燒腩仔去排另一個game玩，但燒腩仔始終心掛掛杯雪糕，所以排到就來有得玩時又發作，嘈住話唔玩要搵爸爸，好啦好啦...勉強無幸福，就由佢跟爸爸排雪糕，等多五分鐘左右終於有得食啦﹗
雪糕車係是日嘅重點項目，而同校長影相更加係「重中之重」，皆因校長繼之前便服日著咗夏季校服返去，今次就著咗冬季校服揹埋書包仔同佢哋影相，上次艾菲唔得閒接放學miss咗，今次實在不容有失，趁燒腩仔食住雪糕心情好時拿拿聲埋去影相，真心艾菲好喜歡佢哋嘅校長，好有heart搞好間學校，錫小朋友之餘又玩得，仲要唔介意小朋友叫佢花名（有次燒腩仔大大聲叫佢花名，艾菲仲問佢叫邊個時，校長就笑住回頭同艾菲講「佢係叫我XXX㗎」）。
食完雪糕艾菲就帶住燒腩仔四圍行吓，順便又同D同學仔家長傾吓偈，燒腩仔除咗好畀面咁同妹豬影多張相之後，就邊個都唔肯再一齊影相，然後艾菲喺遠處發現咗佢至愛嘅舊班主任，即拉佢返去K1個班房玩拋豆袋，點知玩埋呢個遊戲佢竟然話玩夠，主動叫我哋走人返婆婆到（佢知道呢晚我哋會返去做節），咁我哋都唯有尊重佢嘅意願啦。
一年比一年做得好嘅慶祝會，燒腩仔只係hea玩三個遊戲，都已經拎咗三份好實用嘅小禮物，而聖誕節假期前一日放學，老師仲派咗一人一袋小禮物，有聖誕party小玩具，手指畫顏料同DIY聖誕掛飾套裝，氹得我家燒腩仔好高興呢﹗
沒有留言:
張貼留言