上回講到輕輕鬆鬆行完魔鬼山，米高就問我哋走人定繼續，艾菲一聽到「好快」落返藍田公園，可以畀燒腩仔玩吓滑梯做奬勵， 即慈母上身決定繼續，點知過咗澳景路一上五桂山，眼前出現嘅只有無窮無盡嘅樓梯同樓梯﹗﹗﹗過咗山腳位涼亭後仲要全部都係崎嶇不平嘅山脊路﹗﹗﹗艾菲出發前同米高講好嘅行山BB班去咗邊呀？？？
艾菲揹住BB豆豬行呢段山脊路堅係十萬個辛苦（定痛苦？），行到腰斷腳軟咁滯都仲未見到山頂，期間真係頂唔住要坐低休息咗兩三次，反而燒腩仔就好叻仔，無扭無嘈拖實米高一步一步行上去，不過又公道D講，呢邊D風景確係靚D，可以望到郵輪碼頭同對面海，而山嘅另一邊就望將軍澳。
行咗唔知幾多級樓梯後，我哋終於上到山頂啦...啦...啦...望到山邊張長凳，艾菲幾乎感動到喊﹗跟住就第一時間放BB豆豬出來野餐，而燒腩仔都剩機啪返幾粒M&M叉吓電。
難得上到山頂，點都要喺呢個三角網測站（據聞每個山頂都會有呢個位）影張到此一遊相。
然後呢兩兄妹得閒無事又坐喺到吹吓水。
睇佢個開心樣，點會估到佢初初上山時發過少爺脾氣呢，又其實我哋要多謝一班上五桂山時遇到嘅伯伯，全靠佢哋不停讚燒腩仔叻仔，讚到佢鬆毛鬆翼咁，佢先越行越有幹勁咋﹗
至於BB豆豬，就係最幸福嘅，全程有艾菲揹住，有風景睇又有涼風吹，舒服到晏覺都瞓咗兩轉。
離開山頂，米高話行到對面個訊號站就有路落返藍田公園，嘩﹗望落遠到呢...不過望返眼前嘅路，落山嘅路斜到艾菲要一級級扶住慢慢落，顧得自己同BB豆豬嘅安全來，都唔得閒諗遠唔遠啦﹗
一輪上上落落，又越過高山又越過谷後終於都到啦﹗點知過咗個訊號站，米高先發現我哋行錯路，原來落藍田公園條小路喺前面個分岔位到。
搵啱路後，又係一輪嘅超斜樓梯，行到尾段燒腩仔開始出現疲態行吓停吓，而艾菲都開始行到腳震，仲有個位差D失手拗柴添，好彩最終我哋都平安到達終點﹗此行連埋休息時間，全程只係用咗差不多三個鐘，只係比預定時間用多咗一個鐘。
經此一役後，我哋先發現燒腩仔原來可以咁行得，雖然有好幾次喺落樓梯時試圖扭米高抱，但我哋同佢解釋危險，佢都肯乖乖自己繼續行落去，而艾菲亦無諗過自己可以揹住BB豆豬行咁嘅山脊路，所以今次絕對係超額完成之作﹗至於仲有無下次呢...應該係會有嘅...不過到時一定唔可以再用hip seat揹BB豆豬（頂住hip位上落樓梯提腳時勁辛苦），同要帶多一倍嘅水同乾糧囉﹗
沒有留言:
張貼留言