未入公園已經見到條人龍，都未知係玩咩米高即拖住燒腩仔埋去排隊，排咗差唔多九個字先終於到燒腩仔，原來係排隊同救護員叔叔喺救護車影相，喺警車，消防車同救護車三款車之間，燒腩仔最like就係救護車，所以排咁耐佢都無乜怨言，不過就唔肯帶佢哋頂紅色安全帽又唔肯著件反光衫，只係肯帶頂cap帽來影囉﹗
排救護車期間台前做緊表演，燒腩仔猛話想睇，但米高去咗幫佢排彈床，得艾菲揹住BB豆豬同佢排，無可能畀佢行開去睇，但好彩有一個環節係扮救火，消防員著齊裝備升起雲梯埋去台前，個個小朋友包括燒腩仔都睇到眼定定呢﹗
由於個個遊戲都大排長龍，所以艾菲同米高決定分頭行事，我哋排緊救護車時米高就去排定彈床，到我哋影完相時間就差不多，等多五分鐘即到燒腩仔入去玩，而小朋友有得玩當然係玩到癲晒啦，燒腩仔入到去係瘋狂喪跳喪笑，當佢sir緊滑梯落來時哥哥話夠鐘要走，佢仲即時想爬返轉頭玩多轉，最終當然係奸計唔得呈啦﹗kakaka...
而喺我哋玩彈床期間，米高就去咗排消防電單車，不過玩完彈床有人明顯出現疲態，仲要遇著太陽西斜好熱，燒腩仔開始等得唔耐廢不停R，米高唯有帶佢去附近士多買嘢食冷靜吓，然後返來就啱啱好到佢啦﹗
影完電單車已經四點，其他遊戲包括艾菲最想玩嘅扮消防員已經截晒龍，咁我哋唯有就咁同D消防車影吓相就走啦﹗
由於實在太熱，BB豆豬又夠鐘要飲奶，艾菲就決定帶佢去隔離九龍城廣場AEON個育嬰室到開餐，至於燒腩仔就跟米高去公園玩埋D電去。
餵完奶出來燒腩仔仲未玩夠，艾菲就帶埋BB豆豬去公園一齊玩，第一次玩底褲韆鞦嘅BB豆豬勁enjoy笑晒口咁，仲好難得地畀我哋夾到佢哋兩兄妹一齊玩（要分兩條隊排㗎），可惜燒腩仔唔多合作不停擰歪面，等艾菲同唔到佢哋影合照。
之後玩玩吓仲撞到燒腩仔嘅同班同學添，佢呢個年紀始終都係同差唔多年紀嘅小朋友一齊玩會開心D，多得同學仔嘅出現，成功將佢僅餘嘅電力都放埋去，佢呢晚返到屋企係特別好瞓呢﹗
沒有留言:
張貼留言