幾經辛苦先揹住BB豆豬同拖住燒腩仔穿過樓下嘅人群入到朗豪坊，上到四樓中庭位就見到大大個Lego城堡，人流無想像中咁多喎，而且幾個主要影相位都有職員喺到維持秩序，排一陣隊就到我哋影呢架Lego馬車啦﹗Good!
影完馬車當然要影埋Lego聖誕樹啦﹗艾菲真心覺得好靚呀﹗
而聖誕樹後面就有張Lego凳俾大家坐低慢慢影，呢到無職員維持秩序，不過大家都好自覺地排隊影。
影完相就直上12樓Lego Store，星期六黃昏時間都幾多人，不過已經唔使排隊可以直入，一入去即見到呢個好靚仔嘅迪士尼城堡，不過個價錢原來仲靚﹗
入鋪頭後艾菲第一時間去巡鋪，米高就同燒腩仔喺到砌Lego消磨時間，其實鋪頭入面有個area係砌Duplo㗎，但大家可以想像個area一定係圍晒無數小朋友同家長喺到，米高話反正呢邊無乜人，就由燒腩仔留喺呢邊慢慢砌喎。
來得朝聖艾菲都預咗要消費，我哋揀咗$199大杯裝Lego，價錢都算合理，不過好多艾菲想要嘅色同款都無囉﹗失望﹗失望﹗最終只係集中揀D平時少見嘅色同車軚車轆之類嘅配件，求其塞滿個杯就算﹗
我哋玩咗成個鐘，等到BB豆豬都唔耐煩扭食奶，所以畀完錢匆匆忙忙喺鋪頭行個圈，畀燒腩仔望吓用Lego砌嘅旺角，影張到此一遊相就閃人啦﹗
難得一場來到朗豪坊，點可以唔探埋Line Friends先走呢，又係逼爆鋪頭咁滯，好彩大家都守規矩肯排隊，不過燒腩仔唔知點解唔肯同熊大影相，然後影隻熊貓時見人哋姐姐拎個cushion影佢又照跟，kakaka...
行行吓畀艾菲見到D Line Friends嘅頭飾，夠晒浮誇勁得意，即刻畀BB豆豬試帶吓先﹗
~~~~~~~~~~~~~~~~~~~~~~~~~~~~~
朝聖後記：
又其實呢...艾菲忽然朝聖係有原因嘅，就係為咗買料砌呢棵Lego聖誕樹，唔知點解艾菲一直都好想砌一棵Lego聖誕樹畀自己，但拖咗幾年都唔捨得郁手，終於今年決定去馬，點知Lego Store D Lego竟然唔齊款，搞到艾菲砌唔到心目中想要款聖誕樹，就連呢個次選款都只係得返青色，慶幸砌出來嘅效果都似模似樣。
而為搏個仔一笑，艾菲仲好無聊咁喺個底到加個轉盤落去（佢一向對識轉嘅嘢有情意結），所以棵聖誕樹係轉得㗎，第二朝瞓醒燒腩仔即勁興奮咁同艾菲講「爸爸砌咗棵會轉嘅聖誕樹呀」（仔...棵聖誕樹係媽媽砌㗎﹗），至於聖誕樹下面D小禮物呢，好明顯係求其亂砌，由於無乜啱款又啱色嘅Lego得揀，唯有將就吓啦...
BTW，睇來下次再買Lego要去皆旺或者現時點先得啦﹗
沒有留言:
張貼留言