我哋呢日又係食個late breakfast就出發，錦上路跳蚤市場喺正西鐵站出面位置超方便，雖然賣嘅嘢唔係好吸引到我哋，但勝在唔多人又有D位坐，都算係幾好行，美中不足係呢日個天無乜風，比預期中有D悶熱。
我哋一到埗行咗無耐，忽然就有個叔叔送咗枝泡泡畀燒腩仔（因為佢個小朋友太細唔識玩），由於個泡泡樽蓋爆咗，為免拎住唔方便，我哋就行去空地玩咗先。
玩完泡泡出咗身汗大家都熱，即刻去買冰菠蘿食來消暑，艾菲見都幾多檔鋪頭有賣冰水果，但檔檔都唔同價錢，有D賣到六七蚊件，而我哋幫襯呢間（喺最外邊行）就係十蚊三件，我哋三個一人一件啱啱好，當然質素無長洲D咁好味（食得出係罐頭菠蘿），不過過吓口癮都OK嘅。
行到中間位，見到有檔玩撈金魚，出面仲好似台灣夜市咁，放晒D遊戲機出來，十蚊玩一次，見一場來到都畀燒腩仔玩咗一鋪，佢自己揀咗呢部射桌球機，估唔到又幾好玩喎﹗
打完機向前行幾步，輪到米高忍唔住想買印尼大蝦片食，十蚊一包有三塊都可以接受啦﹗
最後行到近西鐵站一行，有一間賣Lego（假）商店街，像真度都幾高，而且只係$60一盒，艾菲就決定買一盒麥當勞畀燒腩仔返來試砌。
行完跳蚤市場見時間尚早，我哋就過咗對面環保農莊餵兔仔，點知有人入去前係威係勢咁話餵，入到去竟然話好驚，仲想將D蘿蔔絲就咁曬喺地下就算（仔...要錢買㗎...），艾菲唯有捉返佢出去隔住鐵絲網餵，最終喺艾菲半推半逼下都有餵晒，總算完成任務﹗
餵完兔仔擰轉面，就畀燒腩仔見到個電動車場，車迷即極力爭取去玩，於是我是車手又來啦﹗衝呀﹗
由於艾菲要幫哥哥影相，於是放咗BB豆豬出來畀米高抱住，然後無份玩嘅佢，忽然好hyper不停大笑大叫。
等到哥哥玩完返來，兩兄妹仲好似真係有交流有傾有講咁添﹗kakaka...
臨走見到棵香蕉樹，又畀燒腩仔埋去見識吓。
離開錦上路我哋就坐西鐵去元朗站，媽媽去Yoho Mall個育嬰室餵BB豆豬，爸爸就同哥哥去玩具反斗城個臨時鋪到玩lego。
玩到差唔多六點就去食米高想食嘅抵食壽司，自從燒腩仔出世後都好一段日子無幫襯過，始終鋪頭地方細又唔方便坐得耐，實在唔太啱我哋呢D帶住小朋友嘅家庭，但難得主角話想食攬實BB豆豬食都要捨命陪君子啦，不過米高又食唔到想食嘅三文魚腩（幾年前最後一次幫襯都係賣晒無得食），而且食物水準的確有每況越下嘅情況，所以食咗開心咗就算。
又其實呢，喺米高正日生日前一晚，艾菲hea hea地都有買個佢至愛嘅芒果蛋糕同佢一齊切，仲好罕有地買咗生日禮物添㗎﹗（嘻...其實係咁啱朋友導艾菲話美國Ralph Lauren大減價，仲做埋人肉速遞送貨上門，shop開咪順手買多件衫畀佢囉>.<）
仲喺生日當天嘅凌晨，扑暈兩個小朋友後，用水波爐極速蒸咗五隻大閘蟹出來，陪蟹王米高食個邪惡宵夜。
到正日當晚就煮咗個生日大餐畀佢，有南瓜甘筍牛奶濃湯，芝士焗龍蝦伊麵，大人格仔西冷牛扒同小朋友香煎三文魚，hea得來都算係好有心啦﹗希望到下個月艾菲生日時D人會識做啦﹗嘻...
沒有留言:
張貼留言