期待咗幾個月嘅四日三夜台灣宜蘭之旅，話咁快就玩完返來，今次連遊記都好快手就寫完，唔知係唔係因為成個行程都係艾菲主力去plan（通常去台灣都係艾菲plan，但去其他地方特別日本就由米高plan），所以覺得特別好玩絕無搵笨位（嘻...自己讚自己），唯一係嫌時間太少好多嘢都玩唔到食唔到，米高成日去完旅行都話要留D遺憾留返下次再去玩，希望呢次去唔到嘅地方，真係會有機會再來啦﹗
對比返上次嘅北海道名古屋之旅，今次真係好明顯睇到燒腩仔大個咗，宜家會識得咩叫去旅行，出發前一晚仲興奮到瞓唔著喺到八卦我哋執行李，然後返到來問佢坐飛機去咗邊都會好開心咁答台灣，有日仲忽然同艾菲講「不如我哋再去台灣」，問佢點解原來係掛住宜蘭民宿條「黃色隧道滑梯」，又記得自己去牧場餵咗羊BB飲奶同跌親，唔似上次去完旅行返來十問十一都唔記得，今次係直情feel到佢有幾開心，感覺真係抵玩好多。
不過呢幾日入面，佢其實都有因不安同肚仔唔舒服而鬧情緒，好多位艾菲諗住佢會玩得開心嘅，最終佢係喊住口咁畀我哋逼佢玩（邊有阿媽要逼個仔去玩㗎>.<），但諗返轉頭其實艾菲都有責任，成日以為佢大個就將戒備心降低，少咗brief佢下個景點去邊做乜玩咩（佢係個唔可以玩驚喜嘅人，否則佢實會令你有驚無喜），再加上佢怕熱怕多人，好多時去到D熱門多人嘅旅遊點就會扭抱（喺香港係唔會㗎），再來就發忟周身R到損晒（佢D濕疹喺呢個夏天都爆發得幾密），結果要辛苦米高抱住佢四圍行，連埋要做貼身洗手間專員（燒腩仔呢個trip成日話肚痛，台灣又勁多踎廁啦...），米高話感覺攰過上次好多。
食方面今次表現都比上次好好多，無再玩絕食甚至識同我哋爭食，艾菲亦唔需要帶象印同電熱水壺出門，更加唔需要去買餸煮飯，台灣D嘢食絕對啱佢口味，我哋基本上咩都俾佢食俾佢飲（汽水奶茶除外），係後來見佢有D肚痾先停食雪糕凍飲（返到香港第二日就連燒幾日加瀉咗兩日，不過佢其實出發前已經日日叫住肚痛但poo唔出，所以都唔知係之前未病好定水土不服啦），而我哋仲衰到連朝早餐奶都cut咗，就咁畀佢飲豆奶或橙汁就算， 至於晏覺都無再好似之前咁要預定時間畀佢瞓，基本上佢玩到攰就自動波會瞓，瞓半個鐘定兩個鐘都得，完全唔需要我哋操心勞氣。
而最值得一讚嘅係燒腩仔喺呢四日入面，完全無賴過vee，出發前怕難搵洗手間，所以要佢全程著學習褲，但佢喺呢方面真係好乖好合作，一急就會主動話畀我哋聽，仲肯忍到去洗手間先vee，今次日數少加埋佢已成功戒片，艾菲執行李時輕鬆好多，只係帶多幾套後備衫褲畀佢就OK，另外艾菲都好羨慕台灣嘅媽媽，好容易就搵到哺乳室同親子洗手間，就算去到宜蘭呢D算鄉郊嘅地方都有，真心覺得香港政府喺出廣告叫人生仔前係唔係應該檢討吓呢D政策先呢？知嘅明嘅...土地問題嘛...唉...
我哋今次都有兩日係自駕遊，喺
和運租要NT$4250，另加路費大概NT$180（還車時先畀），桃園機場店拎車，台北車站店還車，呢到同香港揸車嘅最大分別就係左軚，米高出發前都要做定準備功夫睇吓有咩要注意，不過實戰半個鐘後已經適應到，租車公司都有GPRS提供，不過我哋最後嫌佢嘈無用，改用電話Google Map，入啱地址就OK都好方便，唯一唔係幾好就係無car seat提供（租車時request咗但只回覆盡量提供），搞到燒腩仔要用大人安全帶，全程呱呱嘈話唔舒服。
喺台灣揸車，D司機唔似日本D咁禮讓，個個都車手上身揸得好狠，特別係高速公路，所以一定要一眼關七小心駕駛（其實喺香港揸慣車應該都無問題，係雪藏牌即艾菲呢D幾年無揸嘅就會驚D），另外佢哋嘅塞車問題都幾common，尤其係星期五六日傍晚往返宜蘭台北，撞正呢D日子要預多D時間，好似我哋咁就塞咗兩個鐘先喺宜蘭出返台北，然後返到台北市內又喺D路到兜來兜去先去到酒店，所以之後喺市內都係坐捷運代步就算。
仲有個題外話係大家有無覺得宜家喺台北截的士好似難咗？我哋喺師大夜市同上引水產想截架的士都唔容易，不過司機叔叔一般都好熱情，知我哋喺遊客都即刻推介地方畀我哋又問使唔使車我哋去機場。
而為咗方便Google Map搵路，艾菲今次落機之後都有喺機場出上網卡，之前搵料時睇過三間電話公司嘅plan同質素都係差唔多，所以求其見邊間無人唔使排隊就埋去，最終出咗遠傳嘅5日無限上網加$300通話費，盛惠NT$450，如果唔使講電話的話仲有個Plan係5日無限上網加$50通話費（問過話得5分鐘通話時間），收NT$300，真係收得幾好同快，咁多日以來唯一係去到位處山頂嘅朱銘美術館時唔係好上到網，D職員都好快手加熟手，畀錢show passport之後好快就幫你換好卡兼set好所有嘢，不過用iphone嘅就記得要帶定枝iphone針喺身，方便上機返香港時換返自己卡。
至於影相裝備方面，艾菲今次係勁大膽，只帶一枝定焦鏡就走天捱（因為主打想影人），不過根據上次經驗，就算帶多枝變焦鏡過去（上次貪心D影人之餘又想影風景啦），湊住燒腩仔又要隨身代住佢D嘢，艾菲基本上都唔會有閒情換鏡，結果另一枝鏡係白帶，所以不如輕便D就算，係就係唔夠wide同要人肉zoom㗎啦，但影風景都唔係完全唔OK㗎﹗
同埋艾菲有另一個法寶back up，就係自己部iphone，有D位唔容易對焦或者唔夠wide嘅時候就用佢補影，加埋佢個全景拍攝就實無走雞。
來台灣基本上都唔係好預shopping會買到D咩，一般D衫同日用品都同香港差唔多價錢，據講買日本化妝品同文具會平，但日本化妝品之前已經叫米高幫手掃咗堆存貨返來唔使買，文具又無時間去光南大批發睇，唯一重頭戲就係買繪本圖書，價錢肯定平過香港書展價，只可惜得一個鐘時間買，但上次撞到波媽講開，佢教艾菲可以出發前上網買定過到去喺便利店拎，下次一定要試試先﹗
最後想講就係經過今次由夜機delay到變凌晨機嘅體驗，艾菲同米高都覺得以後帶住小朋友去旅行，盡量都唔好再揀全日最後一班機走，除咗delay夜返搞到小朋友辛苦，亦係萬一班機有咩事取消就肯定無機可以返香港，焗住留喺當地多一日，始終小朋友唔同大人，食咩用咩著咩都唔可以太隨意，尤其係D未食得大人嘢嘅小朋友，買唔到啱佢哋食嘅嘢斷糧都幾大獲㗎﹗
Day 1 HK>宜蘭 part 1
Day 1 HK>宜蘭 part 2
Day 2 宜蘭>台北 part 1
Day 2 宜蘭>台北 part 2
Day 3 台北>野柳>台北 part 1
Day 3 台北>野柳>台北 part 2
Day 4 台北>HK part 1
Day 4 台北>HK part 2
