分顏色

大家仲記得呢個用奶粉罐同籌碼整嘅豬仔錢罌嗎？想當日整來畀燒腩仔學入錢罌，訓練吓D手指仔小肌肉，玩咗一排之後佢當然無興趣再玩啦，不過艾菲就一直無丟到keep咗喺到，大半年之後佢又有機會reuse啦﹗


 
今次艾菲加多四隻Ikea小朋友碗落去玩，玩咩呢？之唔係分顏色囉﹗我哋唔係谷學術嘅家長，所以ABC，數數字同認顏色認形狀呢D，艾菲一直都係hea教，只係間中記得就提吓，不過眼見K1 interview就來殺到，時間都真係無多，好記得上次去迦南個老師叫燒腩仔拎舊黃色積木畀佢，佢一舊飯咁零反應要艾菲提水，為免今年案件重演多次，即管落多少少力教吓佢啦﹗



 
咁到底要點教呢？艾菲自己都一舊雲，諗咗陣之後決定倒晒D籌碼出來，再叫燒腩仔幫手將籌碼放入同顏色嘅碗到，因為碗同籌碼顏色有小小色差，為免燒腩仔分唔到，起初艾菲喺每隻碗都放幾個同色籌碼落去至叫燒腩仔分，到佢開始OK放啱晒，就逐少逐少咁減返碗入面嘅籌碼，到最後就唔放籌碼喺碗，要燒腩仔就咁分顏色。



每次成功分完之後，艾菲都會逐個同佢講返係咩顏色，亦會間中將D碗調吓位，等佢無得靠記住D碗嘅位置來分，咁玩咗十五分鐘左右，燒腩仔已經完成晒成個task，亦唔知係真識定撞手神咁講得啱晒四隻顏色喎（不過轉個頭已經乜都唔記得晒），於是艾菲就同佢玩第二round高難度D嘅挑戰。

第二round挑戰要用返個豬仔錢罌，燒腩仔要聽艾菲指示話入咩顏色，佢就放咩顏色嘅籌碼落個錢罌到，為咗令佢唔好覺得咁悶，又有得學吓大人做指揮，艾菲都set咗個規矩係佢成功入到兩個籌碼，就可以調轉角色由佢話事，叫艾菲入返兩個籌碼落錢罌，但可能就咁聽指令認顏色真係有難度啦，佢入咗兩次，兩次都唔係好成功，之後就玩玩吓發難啦﹗（之所以呢一part無影到相啦﹗）

雖然呢個分顏色嘅game不歡而散，但估唔到燒腩仔原來真係有吸收喎﹗因為咁啱隔幾日之後上幼潛又係玩分顏色，喺屋企玩過分顏色嘅燒腩仔， 老師未教佢已經識得分顏色，仲主動舉手出去做示範，獲得眾多媽媽大讚呢﹗而艾菲後來問佢D嘢咩顏色，佢間中都會答到黃色同綠色，感覺似係開始有D concept啦﹗

而根據幼潛老師嘅說法，佢建議學分顏色，首先做物件配對，可以嘅話用實物來分，即例如拎個蘋果同士多啤梨出來分來學紅色，之後先用圖片來分，最好一開始只畀紅黃綠或者紅黃藍三隻色（即艾菲最初嘅四色教法太急進啦），因為綠同藍比較難分，所以等佢哋分到綠同藍是但一隻色先分第二隻色會好D，至於要佢哋講埋或者識聽咩顏色呢，就要畀D時間努力同佢哋玩多D唔同嘅分顏色遊戲先得啦﹗