Home Salon

燒腩仔天生多頭髮，好係細細個已經可以梳個一九分界蛋撻頭夠型仔，唔好係大熱天時頂住成堆頭髮超大汗，艾菲睇見佢不停R都覺得熱，勁想用個剷一口氣同佢剷走晒D頭髮就算。

自從佢六個月大，喺公公婆婆嘅幫忙下，艾菲同佢剪過一次頭髮之後，公公見艾菲剪到雞手鴨腳咁，以後每次艾菲話親燒腩仔要剪頭髮，佢都會自薦幫燒腩仔剪，難得有人肯主動幫艾菲手做D咁艱巨嘅任務，艾菲何樂而不為呢，更何況艾菲細個時個頭都係公公剪，所以絕對放心將燒腩仔個頭交畀佢。

每次同燒腩仔剪頭髮，艾菲同公公婆婆三個大人都會出盡法寶，公公負責剪，婆婆負責抱，艾菲負責做支援，但隨住燒腩仔反抗能力越來越大，佢已經由原先氹吓都會乖乖坐定畀你剪，到宜家會喊到拆天，周身郁同出手想撥走公公隻手，家陣我哋又開巧虎佢睇，又畀餅佢食，又唱歌又氹，搞一場大龍鳳先剪到少少，搞到公公都剪到無晒心機。



睇見燒腩仔搞到公公咁唔開心，艾菲做阿媽同做阿女嘅都唔好意思，但又知道燒腩仔宜家嘅狀態，再突然帶佢去街畀陌生人剪就更加係mission impossible，唯有把心一橫聽婆婆個髮型師教，帶佢返屋企一星期剪一次剪到佢慣啦﹗

然後艾菲抱住打死把就嘅心態同燒腩仔試剪，估唔到原來得艾菲同佢兩個獨處，無咗公公婆婆時佢又無咁扭喎，叫佢自己坐喺凳到圍埋垃圾袋做圍巾都無嘈（平時來到呢個位已經喊到拆天﹗），之後艾菲慢慢同佢由後面剪起，每剪一吓佢就喊幾聲，但艾菲解釋D頭髮根本無整到佢塊面，佢望吓鏡見艾菲無呃佢，唯有收聲坐定定由艾菲繼續剪，到修耳仔邊時佢就扭得勁少少（艾菲估佢應該係唔鐘意鉸剪開合嘅聲），不過艾菲同佢講數話好快剪完，跟住同佢一齊數十聲佢都勉強OK，最終第一次喺自己屋企試剪，燒腩仔剪完眼濕濕鼻紅紅咁，都叫做成功透薄咗D同修到兩邊耳仔位，有進步呀﹗！



雖然艾菲都好唔想一星期同佢剪一次頭髮（每次準備同善後真係好甘），不過為咗個仔唯有頂硬上，而燒腩仔試過第一次之後都開始識得反抗，艾菲一邊剪佢就一邊喊住叫「唔剪」，但艾菲一直堅持同佢慢慢剪，最多佢喊得勁時就停一停同佢抹咗眼淚先再繼續，佢郁手就解釋佢知好危險同塞兩件玩具畀佢要佢拎住，一邊剪一邊話佢知剪完好靚仔，終於燒腩仔喊到豬頭咁嘅樣，艾菲都成功剪到個公公唔肯再同燒腩仔剪嘅冬菇頭（因為公公上次剪到個陰好平，之後畀朋友話公公剪到個孫咁薯，佢以後就唔肯同燒腩仔再剪呢個頭啦）﹗

剪完之後艾菲第一時間影相whatsapp畀公公婆婆睇，佢哋回返手指公嘅emoji返來，艾菲即刻畀返燒腩仔睇話公公婆婆讚佢叻同靚，好彩呢個小朋友讚多兩讚就飄飄然，洗完頭沖完涼好快就平伏返心情，艾菲叫佢坐定定畀艾菲影相做record都好合作，最開心係第二日上幼潛時，一眾同學媽咪同老師都讚佢個頭靚，仲問佢係唔係好乖坐定定咁畀媽媽剪頭髮，搞到佢都唔好意思答人問題﹗

經此一役之後，燒腩仔似乎對艾菲呢個髮型師都多咗信心，婆婆問佢以後想畀公公剪定媽媽剪，佢都話要媽媽同佢剪，雖然艾菲萬般唔願意（點解唔揀阿公剪...），不過都覺得係好事來，至少佢對剪頭髮呢樣嘢無再咁抗拒，剪頭髮前仲識得主動問艾菲拎個化妝掃來掃走面上D頭髮碎（實情係拎來玩），宜家艾菲嘅短期目標係令佢坐定定剪頭髮唔再喊，長遠嘅目標就係令佢接受剷頭髮D刨嘅聲，等艾菲可以喺出年夏天幫佢剷返個清爽型仔頭﹗