一入Play House門口就會見到大大個火車showcase，燒腩仔除完鞋放好後就即刻撲咗埋去，望到幾乎唔捨得入去玩咁滯。
入到去好快已經見到晉晉，豬脾同波哥，本來想捉佢哋一齊影吓相，點知呢隻仔九秒九咁走咗去另一邊玩車，仲行到勁快連艾菲都幾乎追唔切，不過佢又真係好清醒，坐每一架車都會主動講畀艾菲知佢坐緊架咩車，即左邊架係單車，右邊架係火車，分得清清楚楚。
見波哥有爸爸推車周圍行，佢又唔執輸咁推住架Thomas車起勢咁追住波哥，幾次都幾乎撞落波哥爸爸到，好彩佢每次都剎得切掣，呼～
次次去親playroom都係玩推車都唔係辦法（佢之前試過兩次去朋友屋企會所玩，有波波池有滑梯都唔願玩，只係喪推點心車同BB車，推足幾粒鐘都唔悶呀），唯有夾硬捉佢入去波波池玩，其實之前去日本D playroom都已經留意到佢唔鐘意玩波波池，今次直情feel到佢係有D怯（因為日本D波波池無咁多波），或者係唔鐘意好多波阻住行同踩落去掂唔到地嘅感覺啦，果然係個感觀超敏感同安全系數超高嘅小朋友...
越驚越要幫佢克服係艾菲作為媽媽唯一可以做嘅嘢，所以艾菲都好落力咁走埋入波波池到陪佢，教佢要拎起對腳慢慢行就會行到，佢都好勇敢肯去嘗試無話喊住要走，最後仲推咗佢自己一個爬上去玩滑梯，期間好多大D嘅小朋友喺側邊爬上去，當然佢哋係唔會錫住爬得勁慢嘅燒腩仔啦，艾菲其實都肉痛佢畀其他小朋友踩到手仔，但又覺得佢總要經歴過呢D先會大，畀人踩過下次先識得諗辦法爬快D。
上到去上層，見佢走來走去徘徊咗一陣都唔肯sir落來，艾菲就知佢真係驚下面個波波池（因為滑梯佢已經克服咗一段時間），於是叫米高上去陪吓佢，終於燒腩仔都肯自己一個sir落來，仲要第二次艾菲再推佢上去佢都無嘈肯再試，只係猶豫咗一陣就自己sir落來，叻﹗
玩完波波池，本來想拉佢去另一邊同肚B同小B佢哋玩小朋友過山車，但D咁刺激嘅玩意佢又點會肯玩吖，結果又喪走返出去坐車，巧遇晉晉同BBB，諗住幫佢哋三個影返張合照，點知超臭脾氣嘅燒腩仔嫌晉晉掂到佢隻肉手，突然好惡咁大叫咗聲想話晉晉，搞到艾菲勁唔好意思（晉晉，對唔住呀，希望你唔好畀燒腩仔嚇親）﹗
之後大家話入party房影大合照，燒腩仔本身都唔多肯㗎，但入到房見到一排枱同凳，艾菲同佢講坐低就會有得食餅（因為返幼潛都係埋枱就食茶點），佢又OK肯坐好合作喎，然後大家夾手夾腳快手將一眾BB坐好，一張超完美嘅大合照就此誕生﹗真係好似影緊幼稚園班相咁呀﹗kakaka...
影完大合照，燒腩仔已經無晒電呆呆滯滯咁，艾菲剩機爭取時間留低同媽媽們傾吓偈（大家都以為燒腩仔好乖坐喺到等艾菲吹水，實情係佢已經攰到想瞓無力搞搞震咋），雖然大家唔係成日見，但真係感覺好真好啱傾呀﹗
而艾菲全日最最最開心就係成功抱到B Be﹗佢真係超級可愛呀﹗不過隔離位呷醋男就即刻打爛醋呈喺到嘈囉﹗早一日去朋友BB個百日宴時，艾菲抱B佢又係鬼殺咁嘈，宜家艾菲唯獨係抱表妹一個BB佢係唔會嘈，或者係之前已經不停同佢洗腦，話佢知佢係表哥要錫表妹，而其他BB就無特別同佢講，佢無心理準備掛，咁事後艾菲都有問佢點解艾菲唔可以抱其他BB，而得到嘅回覆就只係「唔可以」三個字囉﹗
見燒腩仔個樣攰到爆炸唔多對路，決定提早走人畀佢早D瞓晏覺休息吓，但由party房行到去門口呢段路實在太多引誘，不停衝埋去又話要坐車又話要上門口架蒸氣火車，同眾多EE同小朋友bye bye咗好耐，過五關斬六將咁先終於去到門口，其實艾菲都同佢一樣唔捨得走，但唔舒服就無辦法啦﹗唯有下次再同大家玩過啦﹗
紅磡黃埔Playhouse
地址：香港九龍紅磡黃埔花園第十一期聚寶坊商場地下G28-31號舖
電話：(852) 2330-3567
營業時間：上午10時至晚上9時
網址：http://www.playhouse.com.hk/whampoa/chinese/
沒有留言:
張貼留言