中秋節快樂＠維園綵燈會

正所謂一年容易又中秋，話都無咁快就來到中秋節嘅正日，原先今日已經過晒期，要寫燒腩仔嘅23個月成長日誌，不過中秋節大晒讓一讓路（實情係艾菲最近成日顧住去玩懶得寫住啦，hehe...），喺到先祝大家中秋節快樂﹗



今年係燒腩仔第二年過嘅中秋節，亦係一個好神奇嘅中秋節，神奇之處在於向來都好鐘意中秋節嘅艾菲，今年忙住搞燒腩仔報K1嘅事忙到頭都痛，完全無閒情準備過節，幾乎連今日係正日都唔記得，但屋企居然會出現咁多個月餅同咁多個燈籠，真係要多謝四大長老嘅熱心準備，各買一個發聲燈籠畀燒腩仔都未夠喉（左邊兩個係返幼潛嘅勞作同中秋禮物），仲猛塞月餅畀艾菲怕佢哋個孫無得食喎... >.<



咁艾菲其實都唔係hea到乜都唔做嘅，上星期四先發現今日係中秋節，就拿拿聲決定星期五晚帶燒腩仔去維園嘅綵燈會，呢個小朋友平時見到街邊D慶回歸同國慶嘅老土燈飾都會指住話靚，呢晚一入場見到咁震撼嘅燈飾，就即刻好興奮咁不停發出嘩嘩聲嘅讚歎聲。



今年綵燈會嘅主題係懷舊玩具，有西瓜波，太空槍，釣魚遊戲同木馬等，都整得幾靚㗎﹗



而對燒腩仔來講，最正就係場中間有個位，放咗幾隻搖搖木馬畀小朋友玩，佢唔知由幾時開始唔再驚搖搖木馬，仲玩到唔肯起身畀其他小朋友玩添呀﹗之後帶佢去另一邊玩跳飛機，啱啱學識跳嘅佢懶醒咁，真係跟住前面D姐姐跳，但又唔知自己跳加un得勁爆趣囉﹗



玩完搖搖木馬同跳飛機就捉佢去扮吓踢毽先﹗



去到維園咁大地方，燒腩仔當然又喪跑唔停啦，但見到D靚燈飾又真係好想捉佢去影吓相留念，好彩呢晚影相要用閃燈，佢一見到艾菲個相機會彈個閃燈出來仲會閃就覺得好過癮，艾菲索性叫佢行去遠處企定幫艾菲望吓閃燈有無閃，影完就奬佢幫手㩒返個閃燈入去，艾菲先終於同佢影到幾張企定定望鏡頭兼唔係無奈樣嘅相咋﹗



唯獨係呢個展板，艾菲唔使叫佢都主動走埋去，塞個頭出來畀艾菲影相超級專業，真係全靠之前去日本旅行嘅特訓呀﹗kakaka...



之後行埋去近天后嗰邊，開始係D比較傳統嘅燈飾，有一part係介紹大坑舞火龍，感覺都幾特別。

由於我哋呢日來係平日，又係展期嘅第一日，所以人唔多可以輕輕鬆鬆咁慢慢行，場內有人賣燈飾（成功吸引到燒腩仔走埋去睇，但我哋已經帶咗燈籠兼屋企有太多燈籠所以無諗住幫襯啦），亦有唔少人帶埋小朋友拎住私伙燈籠出來行，都真係幾有節日氣氛，但呢幾日假期兼近中秋就大概會逼爆，不過佢個展期去到14號㗎，大家有興趣嘅不妨去睇吓吖，而除咗維園之外其他地區都有類似綵燈會，詳情可以參考康文署網頁 。