北海道名古屋之旅～Day 7 札幌

原來已經成三個星期無寫遊記，但實情個遊記仲未完㗎，而艾菲亦好想堅持唔好畀佢爛尾，希望最終真係如願啦﹗:P



呢朝喺酒店食完早餐我哋就出發去馬場啦﹗我估大家去日本旅行都應該無諗過去馬場玩，但基於米高係個超級馬迷（唔係買馬D職業賭徒，係真係鐘意馬鐘意到會上網睇國際賽同睇書研究馬種嗰種），艾菲都唔係第一次同佢去日本馬場，而我哋今次去呢個札幌競馬場就係咁啱呢日裝修完重開，入場仲有個紀念匙扣送添﹗



香港嘅馬場係唔畀小朋友入場，但日本呢到嘅馬場就超級family friendly，除咗有家庭專用餐廳，大大個小朋友專用廁所，超舒服嘅換片區同餵奶區之外，場外仲有呢D扮到靚一靚嘅小馬畀小朋友近距離望吓。



而場內就有兩層遊戲室畀小朋友玩，下層係D波波池要走動嘅玩意，上層就有圖書同卡通任睇，可惜燒腩仔呢日狀態超差，異常不安嘅佢只係不停圍住個場跑，其餘咩都唔肯玩，叫佢唔好跑就轉陣去玩上落樓梯，再阻止佢就大叫發癲，結果艾菲覺得唔對路抱佢埋一邊傾偈，然後佢喺艾菲旁敲側擊吓終於表達咗好驚同好攰嘅message出來，嗰一刻艾菲真係忍唔住喊咗出來，帶佢來旅行一心諗住一家人開開心心玩，點知大人嘅快樂竟然建築喺小朋友嘅不安身上，唯有寄望來緊一星期都唔使再日日轉酒店，佢會感覺安心D啦﹗



安撫完燒腩仔之後就畀佢上返BB車瞓陣啦，而佢瞓咗我哋大人就去沙圈見識吓，向來鐘意相馬亂點嘅艾菲都貪得意買咗一場，但好可惜呢次乜都唔中賺唔到手信錢。



見到場中間有隻吹氣馬彈床，勁想畀燒腩仔入去玩吓，於是就行隧道過去，順便買D嘢食等燒腩仔醒，不過呢日天氣好差，朝早已經keep住落毛毛雨，到我哋買完嘢食更加變咗做大雨添，吹氣馬彈床畀工作人員收起無得再玩，燒腩仔瞓醒一覺亦寧願絕食，都唔肯食我哋買嘅炒麵同飯糰...



場雨稍為細返D，我哋就拿拿聲過返去馬場，諗住仲有兩分鐘就開跑，想畀燒腩仔見識吓跑馬係咩啦，點知場雨又忽然變返大，唯有急急腳走返入室內地方避雨。



瞓醒一覺嘅燒腩仔心情好返好多，仲肯自己行埋去同呢隻人扮嘅馬仔影相，而艾菲亦爭取時間買咗對馬仔船襪畀佢做手信就閃人啦﹗



離開馬場之後原先諗住又去附近嘅西松屋掃吓貨，點知太大雨根本落唔到車行唔到，最終坐返免費shuttle去車站，先帶燒腩仔去便利店買嘢食（佢入到去乜都話想食，最後揀咗袋牛油餐包，嗰一刻艾菲都已經半放棄狀態，但求佢肯食嘢落肚就得啦），再去車站對面嘅AEON行陣，來遠見到有小朋友坐呢D卡通購物車，起初都怕燒腩仔會扭計唔肯落車想唔畀佢坐，但又覺得有得坐佢會勁開心，最終同米高一輪商議後決定畀佢坐，果然我哋嘅決定係無錯，佢一坐上車已經笑晒口勁扭軚盤，仲任由我哋喺到行咗成個幾鐘都無投訴過半句，所以話呢...日本人設計D嘢真係超級貼心㗎﹗而此行嘅最大得益者都係燒腩仔一個， 買咗對鞋，一條冬天legging同兩set熨印名字貼for之後返學用。



喺AEON食埋下午茶我哋就坐車去next station Ario札幌血拼啦﹗本身落車之後米高話轉的士㗎，但見停咗雨涼涼地就決定慢慢行過去，呢到其實係Sapporo啤酒園隔離，我哋上次誤打誤撞吓都已經去過，好多小朋友用品同家品鋪，價錢仲要唔係貴，重點係呢到無乜香港人，行得超級舒服﹗



一入商場又見到呢D卡通購物車，燒腩仔一見到已經嘈住要坐，仲識得指明坐麵包超人車添，咁麵包超人車又的確好玩過其他卡通人物嘅車（其他只係普通軚盤，得呢款有咁多嘢玩），奈何麵包超人喺日本實在太受歡迎，想搵架麵包超人車要眼明手快先拎到返來，好彩佢一入商場無耐就無電瞓咗， 艾菲都叫做有D時間可以邊血拼邊幫佢搵，最終搵咗成個鐘先見有小朋友棄車，艾菲就即刻撲過去拎車，而艾菲一推走架車，已經有另一個小妹妹指住架車喺到喊啦，可想而知佢真係好搶手㗎﹗



艾菲此行主要係為咗去阿卡將朝聖，不過相對西松屋D嘢真係貴同唔齊（之前上網買仲多嘢揀），最終只係買咗D出發前已經target要買嘅嘢就算。



之後再隨意咁喺其他鋪頭逛吓，居然買到又平又靚嘅口水肩，用來送禮實在一流，而後面個野餐籃亦係艾菲大愛之物，之前喺馬場見到有人拎住已經想搵來買（D日本人係好興帶齊嘢食同野餐用品去馬場草地野餐㗎），佢嘅主要賣點係超輕同可以摺起收埋，入面仲有保冷層放食物入去都唔怕變壞（即好似放冰皮月餅D袋咁），來緊秋天去野餐就一定用得著。

等燒腩仔瞓醒我哋就去開餐啦，呢晚去咗每次去日本都必食嘅和幸，佢哋係專做吉列餐勁好味㗎，尤其個蜆肉麵豉湯，正到艾菲同米高都各自飲咗兩大碗（佢白飯，湯同沙律菜都係無限添食），不過最抵都係燒腩仔個兒童餐，咁啱做promotion半價只需廿幾蚊港紙咋，仲要有玩具同零食送（燒腩仔鐘意架跑車鐘意到不得了，每餐食飽都要我哋拎出來畀佢玩，仲自己話要帶埋佢返屋企添呀），而呢餐可能因為燒腩仔全日都無咩食過嘢落肚，佢話都無咁快就掃咗大半碗飯落肚，我哋見到呢個場面都覺得好驚訝呀﹗



食飽飯見反正都趕唔切坐shuttle返札幌車站，米高就建議行埋地庫超市先返酒店，艾菲終於路過藥房買到飛滋膏，仲順手買埋BB無比膏同地上最強防曬，而行超市時就畀艾菲見到Glico隻BB夾心餅原來都有出叮噹version，個罐夠靚罐入面又有叮噹貼紙送（之前個叮噹百力滋就可以玩app變個叮噹出來喺屋企飛），即買﹗

燒腩仔遊日本@2014：

Day 1 HK>札幌 
Day 2 札幌>帶廣 part 1
Day 2 札幌>帶廣 part 2
Day 3 阿寒湖>知床 part 1 
Day 3 阿寒湖>知床 part 2 
Day 4 知床>網走 part 1
Day 4 知床>網走 part 2 
Day 5 網走>美瑛>富良野 part 1 
Day 5 網走>美瑛>富良野 part 2 
Day 6 富良野>蘆別>麓鄉>札幌 part 1 
Day 6 富良野>蘆別>麓鄉>札幌 part 2 
Day 6 富良野>蘆別>麓鄉>札幌 part 3