23個月

中秋節過咗，媽媽終於都可以畀到個位我出來見吓大家啦﹗媽媽話我下個月就兩歲，雖然佢仲未有idea點同我慶祝，但生日之後就要開始返學，所以呢個月要爭取時間同我四圍玩多D喎，正呀﹗



飲食狀況都無咩轉變，一日照舊四餐，朝早飲奶加餅乾麵包之類，早晚就一碗飯，下午茶就食吓生果零食咁，媽媽得閒會照煮BB餐我食，不過有時去街就會跟大人食就算，我都開始習慣呢個飲食模式，至愛依然係蛋糕，其次就係雪糕，一有甜品零食我可以食唔停口﹗

因為我去旅行時玩絕食，所以返來之後媽媽為免我唔食嘢都會餵我食，後尾見我逐漸正常就開始放手畀我自己食返，但我多數食一半夠飽就會停手喺到玩D飯（艾菲：搞到成枱成頭都係勁污糟囉 >.<），逼爸爸媽媽出手餵我（艾菲：直情要我哋求佢食咁滯，搞成粒鐘先食得完），但有一日媽媽終於頂我唔住，頒布新家規要我半個鐘內自己食晒成碗飯，否則即刻收碗無得再食，中咗兩次招被收碗之後，我唔敢再亂搞事啦，宜家餐餐都自己食飯，出街都會坐定定食晒自己D飯先玩or摞其他嘢食（艾菲：咁先係我哋個乖仔來㗎嘛，等爸爸媽媽可以安心食飯同傾吓偈），來緊我四隻大牙都出埋來，一定會再食快D㗎啦﹗



瞓覺都無乜問題，夠鐘媽媽叫我去瞓就會乖乖收玩具入房瞓覺，但呢排去得街多D時間就有D亂，有時會搞到夜晚十一點幾十二點先瞓得著， 朝早就瞓到十點半先起身（艾菲：但有時未九點就醒囉），keep住都係半夜三、四點左右會發開口夢大叫，如果我醒咗媽媽仲未起身我會自己坐喺床到唱歌自娛（艾菲：嘈到呢...），跟住一聽到媽媽鬧鐘響就會好興奮咁叫「起身啦﹗」，搞到媽媽都唔知好嬲定好笑，至於晏覺就一日一次，喺屋企嘅話可以瞓到兩個幾三個鐘，出街瞓到半個鐘都夠㗎啦，基本上都係差唔多時間就自動無電要recharge，唔使特登逼我去瞓。



活動能力方面有些少進步，就係終於識得離地跳啦，不過暫時只係間中跳到一兩吓，媽媽話我仲要多D練習先得喎﹗ 至於入字腳嘅問題，行路心急時會比較嚴重，但慢慢行時又會好D，媽媽都諗緊使唔使等我夠兩歲打去健康院book期再做檢查，至於上落樓梯已經可以完完全全自己來，平日同媽媽去街我都會好乖唔扭抱同拖實佢，行入地鐵車廂同搭扶手電梯都做得到，不過一有爸爸喺到我就會扭抱加甩大人手自己走咗去。



宜家越來越鐘意扮大人，喺婆婆屋企見到媽媽餵表妹飲奶之後，返到屋企就拎BB公仔出來餵奶同掃風， 每朝食完早餐之後又會放D食物上high chair，輪流擺D公仔上去同佢哋開餐，朝朝媽媽執床我都會幫手搬返好D被同cushion，佢吸完塵會幫手收返好部吸塵機，佢摺衫又會幫手收衫夾同摺毛巾，佢落街買完廁紙都會主動幫手拎，仲會好似管家咁拎拖鞋畀大家著，雖然我手腳係慢D，但媽媽都讚我係佢嘅小幫手㗎﹗



自理能力方面，最大嘅進步係終於唔使好似BB咁抱住洗頭，宜家D水照頭淋都會嘈但已經接受到， 同埋收玩具唔使媽媽篤住都可以自己放返晒去原位，potty training因為成日去街而無乜點train，對條片又愛又恨，嫌佢焗到pat pat痕成日R，但又踏唔出第一步喺廁所wee，至於poo poo大致無問題，不過呢個月有幾次因為情緒問題出過意外，其餘日子都係好正常，自己主動話畀爸爸媽媽知要poo。

越來越多嘢講，由朝早起身講到夜晚瞓覺先肯停，但出街見到陌生人就會忽然靜咗，宜家講嘅絕大部分係句子，同大人一問一答完全無難度，成日跟大人同電視口水尾講嘢（艾菲：要勁小心講嘢啦﹗），識數1-10，A-Z都已經認得絕大部分，common嘅動物同生果都識講，分別講到爸爸媽媽嘅中英文名，識得話畀媽媽知我「開心」同「唔開心」（艾菲：又真係用得啱㗎喎），但就未識答點解嘅問題，依然好鐘意唱歌，開始記得D比較長嘅歌詞，成首刷牙歌嘅歌詞都記得，最離奇係唔識英文但唱到「Twinkle Twinkle Little Star」（艾菲：聽佢D騎呢英文真係笑爆咀）。



最後又要講吓我嘅情感發展，媽媽話呢個月超級難頂，因為我摞地同發難嘅次數實在多到數唔完，成日做唔到D嘢就發脾氣，試過有次返屋企除唔到對襪，結果失晒控咁喊咗兩個半鐘，疲勞轟炸到媽媽頂唔住一齊喊，要打畀爸爸搖控安撫我嘅情緒先好D，又試過幾次畀媽媽話得我勁，之後就poo咗喺片都唔出聲，搞到媽媽要即刻反省自己係唔係對我太harsh，最終佢決定提早同我進行好行為奬勵計劃（艾菲：本來諗住等佢足兩歲先開始），每晚臨瞓前媽媽都會拎本好行為紀錄冊出來，如果我乖就會有一個叻叻貼紙，唔乖就會有一個大交叉同媽媽嘅扁咀公仔，只要我儲夠五個貼紙就可以有一個奬勵，計劃開始咗差唔多兩星期，我已經成功換到一架巧虎車啦﹗YEAH！

至於安全意識依然係超高，去到陌生同人多嘅地方都要warm up吓先適應到，最近媽媽同我去唔同學校交報名表，我入到去就會話驚拉媽媽走，返到屋企又會成日叫住媽媽，發脾氣時喊喊吓會大叫「我要媽媽」，夜晚仲指明要媽媽陪瞓（艾菲：自從開始同佢講遲D要去新學校返學就變成咁，以前佢唔會咁黐身，感覺佢似有D不安），媽媽已經做咩之前都話定我知，但D嘢同我預期嘅唔一樣我就會唔鐘意。