要燒腩仔去隔離房瞓，首先要預備好佢張龍床﹗由於燒腩仔出世前我哋請過姐姐，亦專登訂咗張上下格床畀姐姐瞓， 可惜姐姐做唔夠兩星期已經畀艾菲叮走咗，張床就一直放咗喺到擺，到後期燒腩仔出世後更加變成雜物架，米高曾經建議掉咗張床，買過張小朋友床畀燒腩仔瞓，但張床瞓都未瞓過就掉實在太浪費，反正燒腩仔過兩三年大個仔可能又有另一D新嘅需要，經一論商議後我哋決定宜家畀燒腩仔照瞓下格床，過多幾年先按佢需要再大執間房畀佢瞓啦﹗
於是艾菲用咗一個上午，好努力咁將床褥由上格床搬落來，然後將下格床嘅雜物全部搬晒去上格床，再徹底清潔成張床，喺窗台位置貼好防撞膠，換好新床單，再裝埋淘寶訂返來個床欄，鋪好好耐之前淘寶買落嘅大大塊超厚地墊，終於成功變返張床出來畀燒腩仔瞓。
整好張床之後當然第一時間叫燒腩仔入來過目啦﹗不過呢隻馬騮興奮到襯艾菲行出房拎D嘢，膽生毛咁自己爬上條梯到，仲連自己已經被卡住唔上唔落都唔知，後尾當然係要艾菲救返佢落來再訓話一論啦﹗
跟住就輪到畀佢試瞓啦﹗知道燒腩仔個人要安全感，艾菲都唔敢太進取，起初叫佢入去試吓瞓晏覺先，夜晚就去返我哋房瞓BB床，因為係日間出面有陽光，佢呢覺只係瞓兩三個鐘，艾菲又一定會陪到佢瞓著咗先走，所以喺呢到瞓晏覺係完全無問題。
瞓醒一覺鬼咁開心，仲話夜晚要再返來瞓添，不過到夜晚知道艾菲會熄燈，佢見到閂門後間房黑晒，就拿拿聲改口話要去返我哋房瞓BB床啦﹗
其實燒腩仔19個月大開始喺呢邊瞓晏覺，艾菲好應該一鼓作氣咁要佢喺呢邊瞓埋夜晚一覺，不過諗到我哋仲未裝好盞夜燈，又醒起之後我哋要去兩星期旅行，再加上佢成日瞓瞓吓半夜爆喊要我哋拍背先肯瞓返，同艾菲有D懶起身同唔捨得，於是拖吓拖吓就無咗件事，後期去完旅行返來仲索性連晏覺都去返我哋房瞓BB床添（因為瞓BB床唔會顧住玩會快D瞓著）。
直至上星期，連燒腩仔農暦兩歲生日都過埋，艾菲先突然醒返起自己瞓呢件事，都有擔心過燒腩仔已經因為就來返學有D不安，再逼佢自己瞓會有反效果，不如等佢適應咗返學先再訓練佢自己瞓，但另一方面又諗佢如果宜家成功自己瞓獨立慣，到下個月返學時可能會無咁難適應，而且一拖再拖只會拖到出年都未肯自己瞓，長痛不如短痛就決定試咗先算。
要佢自己瞓嘅第一日，艾菲一早執完床就將佢D枕頭同公仔搬晒過去隔離房，預告佢知由今日開始要自己喺呢邊瞓，見佢都好受落仲即刻跟艾菲跑入房望窗睇車，然後到瞓晏覺時間佢都自動自覺咁入自己房瞓，到瞓醒時艾菲就再同佢講夜晚都要喺呢到瞓，艾菲會叫月亮姐姐（佢床頭盞夜燈）出來陪佢瞓，仲教佢如果半夜醒咗想搵爸爸媽媽，可以開門過隔離房搵我哋。
結果到夜晚瞓覺時間，佢都好順攤咁拉艾菲入自己房瞓，艾菲講明陪到佢瞓著就會走佢都話OK，好開心咁喺床到碌咗一陣就瞓著咗，雖然瞓到打大風咁由床頭碌到床尾，但到半夜都無爆喊過，直至第二朝晨早醒咗（米高七點幾返工前入去幫佢熄燈佢已經醒咗），居然自己喺房到hea到九點半艾菲起身都無嘈，實在係超級抵讚﹗
起初艾菲都擔心燒腩仔只係貪新鮮唔知好得幾多日，但佢呢個星期以來嘅表現都非常好，除咗頭幾日好早就醒，呢幾日已經可以照常瞓到九點幾十點，半夜都無再出現爆喊情況，只係因為佢超級反瞓，間中聽到房入面有D呯呯聲，同試過一次碌咗落地喊咗兩聲但無醒到（好彩鋪定軟墊），希望佢以後日子都可以keep住咁好表現啦﹗
燒腩仔成功自己瞓，艾菲都曾經諗過自己會唔會唔捨得，點知最後係一D唔捨得都無，反而覺得好開心好free，夜晚喺房上網睇吓片聽吓歌都唔怕會嘈到燒腩仔，唔使朝朝早偷偷摸摸咁走出房預備早餐，只係半夜起身要記得去隔離房望吓佢瞓成點，記緊鎖返實洗手間同廚房門口道安全閘，以防燒腩仔半夜醒咗偷走入去玩姐﹗
至於燒腩仔原先張BB床點算呢？宜家就成為咗伍餐肉哥哥嘅新床啦﹗其實艾菲只係見燒腩仔既然都唔瞓張BB床，就好隨手咁將呢年幾以來一直同我哋同床瞓嘅哥哥放落去，等艾菲同米高多返D位瞓唔使咁逼，點知燒腩仔第二日過來發現咗，就指住張BB床話呢張床係哥哥嘅（艾菲一直教燒腩仔叫佢做哥哥，kakaka...），咁艾菲就打蛇隨棍上問佢自己張床喺邊，佢就好開心咁走返自己房指住張床話「喺呢到」，難得佢終於接受張BB床已經轉移咗畀第二個，知道自己已經無得返轉頭再瞓張BB床，咁艾菲就決定畀伍餐肉哥哥繼續喺到瞓多一排啦﹗
沒有留言:
張貼留言