離開麵包超人館之後，我哋就開始趕路返去札幌還車，一上車艾菲同燒腩仔就齊齊瞓晏覺抖吓（上車即瞓係艾菲同親米高去旅行都會做嘅指定動作，嘻...），去到輪厚PA大家都終於捨得起身，米高就建議落車換片抖吓，難得見到有熱辣辣北海道粟米賣，即刻買咗枝畀燒腩仔食，艾菲亦終於買到本靚靚貼紙書畀燒腩仔添﹗
由於我哋三個人嘅行李實在太多，還車嘅地方又同酒店有一定距離，為免米高搬得太辛苦，大家就決定還車前先去酒店check in放低行李，但之前喺麵包超人館用多咗時間，返到札幌又不停畀GPRS點我哋行D勁多燈位嘅路，再加上札幌唔係周圍都可以停車，仲要黑仔到酒店匙卡有問題要換張新，最終我哋趕極都係遲咗十鐘先還到車，真係勁唔好意思囉﹗
還車之後，我哋就要開始用雙腳去完成餘下嘅旅程，燒腩仔有BB車坐當然無問題啦，係艾菲同米高兩個辛苦D姐...我哋行吓行吓就行返去札幌北十条，陪米高去上次去過嘅Golf用品鋪睇衫，之後就去咗隔離十勝豚丼 いっぴん食呢碗喺帶廣食唔到嘅超級好味正宗十勝豚丼啦﹗期待咗好多日嘅艾菲同米高都超級like，正宗炭燒真係唔同D㗎，不過燒腩仔就唔多欣賞，最終因為我哋要趕去參加花火會，就索性唔再氹佢由佢食咗半碗飯都無都照走啦（好似好衰咁，不過佢唔乖乖地食飯又無理由要我哋花時間去氹吖，而且我哋夜晚都有補返盒奶佢飲）﹗
花火會係事前大家都無諗過參加，我哋當日五點幾六點返到札幌市內，沿路艾菲都見到好多日本女仔著晒浴衣，好自然就問米高係唔係有咩特別活動（我哋三年前來落機嗰日都係咁啱遇著夏祭㗎），然後米高答話好似有花火會，聽到有煙花睇艾菲即刻叮一聲勁想去，皆因燒腩仔之前睇巧虎學識咗s
點知我哋七點入到餐廳時，居然見到幾枱客人都係著住浴衣，明顯係食完飯就去睇煙花，艾菲就唔忿氣同米高講人哋都趕到有咩理由我哋趕唔到，米高見艾菲唔多心熄唯有問侍應花火會幾點同喺邊到搞，然後就急急查地圖睇吓可以點去，起初佢都有D大艾菲話要去就要坐的士去，咁大家都知喺日本坐的士係出名貴啦，坐幾百蚊的士趕去睇煙花，而D煙花隨時比香港迪士尼煙花差，咁就真係唔多抵，突然慳媽上身嘅艾菲就好無奈咁話放棄唔去。
正當艾菲繼續努力氹燒腩仔食飯時，米高就忽然話仲有另一個方法去會平D，就係即刻埋單（當時已經七點半，但花火會八點開始）喺餐廳坐的士去最近嘅地鐵站，再坐兩個站地鐵去中島公園駅，可以搏一搏睇唔睇到水尾咁話，既然米高話有機會睇到（通常做唔到嘅嘢佢都唔會講，講得出即都有幾大機會成功），艾菲梗係即刻gogogo啦﹗
於是我哋七點半左右離開餐廳，坐的士去到地鐵站之後，一個拎BB車一個抱仔極速跑落去坐車，終於成功喺地鐵到追上參加花火會嘅人潮，七點五十五分左右已經順利落咗車，跟住人潮上地面再向住豊平川行，無幾耐就已經見到好靚好靚嘅siu...boo啦﹗由於花火會只係歴時半個鐘，我哋又唔知行去豊平川到底仲要幾耐，亦見沿路已經好多人坐低咗喺路邊睇，我哋就揀咗個稍為空曠同睇得清嘅位停咗喺到睇就算。
起初艾菲都以為D煙花只係普通貨式，點知原來成件事一D都唔流，咁當然無香港新年煙花咁勁啦，但密集式咁放半個鐘煙花又確係幾靚同好好feel，真係好慶幸自己堅持去咗﹗
至於燒腩仔呢？第一次現場睇煙花，又咁近同大聲，全程擺出一個呆樣，仲時不時就同我哋講「唔使驚」（即係驚囉），起初艾菲都有D驚佢會嚇親，點知佢事後又好開心咁不停同我哋講自己睇咗siu...boo喎﹗真係太估佢唔到啦﹗kakaka...
睇完煙花見時間尚早，我哋本身都諗住喺附近行吓先返酒店，點知行咗陣發現都無咩啱行就決定早D返酒店休息啦，我哋今次揀咗住喺札幌站北口對面嘅Hotel Route Inn，仲一住就住足四晚（終於唔使再晚晚捱眼瞓執行李），貪佢過條馬路就到車站夠方便，又有免費早餐提供，雖然間房唔係大，但都叫做幾舒服同設備齊全，至少兩個大人一個BB瞓同一張床都OK嘛（不過艾菲就喺呢到瞓瞓吓畀燒腩仔個鐵頭撞瘀咗隻眼囉 >.<）。
燒腩仔遊日本@2014：
Day 1 HK>札幌
Day 2 札幌>帶廣 part 1
Day 2 札幌>帶廣 part 2
Day 3 阿寒湖>知床 part 1
Day 3 阿寒湖>知床 part 2
Day 4 知床>網走 part 1
Day 4 知床>網走 part 2
Day 5 網走>美瑛>富良野 part 1
Day 5 網走>美瑛>富良野 part 2
Day 6 富良野>蘆別>麓鄉>札幌 part 1
Day 6 富良野>蘆別>麓鄉>札幌 part 2
沒有留言:
張貼留言