燒腩仔係個鐘意食嘅小朋友，想氹佢開心其實好容易，花D心機同時間整吓好嘢佢食就得，不過今年艾菲唔想整紅雞蛋，於是決定整個靚靚叮噹賀壽便當就算，個餐盤係之前去旅行喺新千歲機場嘅叮噹館買㗎，擺咗成個月終於有用武之地﹗而呢餐嘅主菜有熊貓飯糰，三文魚同車車造型烚蛋（無紅雞蛋都有專登畀蛋佢食呀），配菜係蕃茄薯蓉，另外仲有水果火龍果粒粒。
忙咗成朝先終於搞掂個便當，最擺命係呢一朝燒腩仔出奇地唔合作，艾菲喺廚房忙到頭都暈，佢就喺廳勁嗌媽媽，仲不時送D驚喜畀艾菲，例如自己拎搖控開電視話要睇巧虎，然後走來廚房同艾菲投訴電視播緊嘅唔係巧虎，同自己走去艾菲個櫃拎貼紙簿出來，要艾菲即刻畀好行為奬勵貼紙佢，又唔知自己連放貼紙簿上面部surface都拉埋落地差D整欄部機，不過無論佢幾搗蛋都好，見到佢食得咁滋味個樣，艾菲個心就即刻溶化晒，注定係要畀佢食住啦﹗
個便當有咁多樣嘢食，呢個燒腩仔第一時間食嘅居然係火龍果，跟住佢好快手咁掃埋其他食物落肚，但兩個最花心機整嘅熊貓飯糰，食到尾時依然安然無恙咁放咗喺到，果然佢係唔鐘意用手拎住個飯糰來食（因為D日本米好黐手），艾菲最後唯有忍痛將兩個飯糰拆散畀佢畢來食啦﹗
食飽飯見出面開始落雨，熱咗咁多日終於都打風落雨啦，反正天氣唔好無得去公園放電，就同燒腩仔著齊雨褸水鞋拎埋遮落樓下平台玩踩水氹啦﹗可惜呢個小朋友行動實在太緩慢，D雨又一陣陣咁，我哋睇住落雨先換衫出門口，落到去居然停晒雨仲出太陽，不過既然落咗樓就唔理啦，照畀佢開遮踩水氹，起初佢仲扮含蓄話唔踩㗎（明明平日勁鐘意踩），但艾菲同佢解釋著咗水鞋可以放膽踩，佢踩多幾踩就踩上癮，後來仲邊踩邊轉圈勁hyper添呀﹗
等到夜晚米高放工返來食飽飯，艾菲就拎埋三個壽包出來同燒腩仔一齊唱生日歌啦﹗話晒都係農暦生日嘛，無紅雞蛋都要準備定D中式嘢嘅，睇到有好嘢食，又聽見艾菲同米高唱生日歌，同不停話佢大個仔，佢即刻開心到飛起，終於開始識話自己兩歲啦（但講完兩歲轉頭又話自己一歲，再過幾秒就話自己三歲囉，kakaka...）﹗
燒腩仔：嘩﹗個壽包真係好好味呀﹗
三個壽包來自鴻星，艾菲起初以為只係普通酒樓壽包，點知食落先發現入面勁足料，同東海嘅絕對有得fight，除咗蓮蓉仲有大大個咸蛋黃，基本上同食咗成個傳統月餅落肚無咩分別，為免燒腩仔會食滯，所以我哋只係求其畀咗少少燒腩仔食就算啦﹗
沒有留言:
張貼留言