偷酒飲？﹗

細路﹗你做咩偷啤酒飲咁大膽呀？？？？？



仲飲到成口泡，偷食都唔抹咀？？？？？



飲勝到一滴不留添？？？？？



各位姨姨見到唔使擔心， 實情呢杯啤酒係要好豪氣咁大啖大啖食嘅啫喱來㗎，kakaka...



之前喺facebook見好多人整啤酒啫喱，搞到艾菲一直心思思想試整，不過原食譜係用蘋果汁加魚膠粉，仲要開爐煮一煮熱D蘋果汁先得，艾菲就決定用現成啫喱粉來個簡單版，材料就只係一盒啫喱粉同跟盒指示嘅凍水熱水各一碗，菠蘿味個色整完出來都勁似啤酒，如果用堤子味應該就會變咗做黑啤。


 
準備好材料同工具就叫我家大廚燒腩仔出場啦﹗第二次畀佢幫手整嘢食，都好開心但明顯無第一次整蛋糕咁興奮（因為佢整嘅時候都唔係太知啫喱係咩），而且D工具已經知點用，一埋枱就搞搞震唔理艾菲叫停，好彩碗熱水放最開佢掂唔到，唔係就實出事啦﹗



燒腩仔：事不宜遲，即刻開工，首先將盒啫喱粉倒落個大碗。



燒腩仔：之後等媽媽倒碗熱水入去溶咗D粉，我就幫手撈勻佢哋。



燒腩仔：跟住就倒D凍水入去等佢一陣快D凝固。

呢個step艾菲都有掙扎過好唔好畀佢幫手倒水，因為好怕倒瀉水量唔返個份量唔知點收科，點知佢又OK一滴不漏咁倒得又準又快喎，所以做媽媽嘅有時真係要學吓放手，畀多D信心同機會小朋友去試，先會知小朋友嘅能力到底去到邊。



燒腩仔：撈勻之後就可以畢入杯到啦﹗（預留大半碗啫喱水之後用）

完全唔使艾菲教，就咁畀齊工具話佢知裝滿個杯就已經識做﹗仲要係一滴不漏咁完成任務無製造浪費﹗Like!



燒腩仔：燈...凳...我嘅製成品呀﹗

如果整普通啫喱做到呢個step，將啫喱杯放入雪櫃雪到凝固已經OK，不過整啤酒啫喱就多個step，而呢個step係需要由大人來做，因為小朋友仲未夠力自己完成。



燒腩仔：將之前留低嘅大半碗啫喱水倒返入大碗到，用打蛋器打到佢起泡，不過媽媽話我呢D係完全唔合格㗎喎﹗



燒腩仔：媽媽話佢打到呢D又厚又多泡嘅先合格喎，等我睇過...

打好泡用枝鐵匙逐少將D泡筆落去啫喱杯面到就搞掂啦喎，不過呢個要用陰力筆先唔會整散D泡，一定唔可以畀咁細嘅小朋友幫手，而且喺雪凍期間D泡會不停縮，不妨倒多少少泡落杯，如果打一次唔夠泡就打多次啦﹗



燒腩仔：雪兩三個鐘就得啦﹗連爸爸放工返來打開雪櫃都問做咩有幾杯啤酒喺到呀﹗飲杯﹗