去美瑛時路過旭川，艾菲就口痕問米高點解唔安排我哋去好出名嘅旭山動物園，佢嘅唯一解釋係唔鐘意嗰到勁多旅行團明呃遊客，咁帶得燒腩仔來北海道，除咗睇花都想帶佢接觸吓動物吖，之前又就唔到時間去牧場玩，於是喺艾菲不停爭取下，終於米高揀咗呢日嘅朝早帶我哋去札幌嘅円山動物園補數。
睇地圖見動物園距離地鐵站唔係好遠，米高就決定帶我哋行過去，點知行到一半先發現要上斜路上山，幾經辛苦用咗大半個鐘先到，上到去大家都feel到熱，一入場見到隔離個館有冷氣就乜都唔理直衝入去行，原來呢到有D小遊戲例如畀你試吓拉大象，同上面個木池可以畀小朋友瞓落去感受吓木嘅質感，但燒腩仔只係肯喺側邊玩碌波。
動物園話大又唔係好大，但我哋都喺到消磨咗成個上午，雖然環境同設施睇落都有D殘舊，不過動物種類都算幾多，袋鼠，斑馬，長頸鹿，駝鳥，雪豹，狼，熊人，小浣態，馬騮，猩猩，獅子，老虎（艾菲好無聊咁教燒腩仔呢隻係巧虎嘅真身，kakaka...），羚羊，同應該無乜人識嘅貘等等等等，艾菲覺得親子遊的話都真係不妨一去﹗
而艾菲最like就係入面一個小朋友動物園，直情可以畀小朋友摸吓D動物，不
第一時間帶燒腩仔去搵羊咩咩，起初以為佢會驚，點知係勁興奮，猛咁追住佢哋來摸，
之後睇鴨同鵝，燒腩仔一概都叫佢哋做鴨啦﹗自從禽流感之後，香港應該都無乜機會見到佢哋真身啦﹗
喺雞群中遊走都係香港無乜可能做到嘅事啦﹗但最搞笑嘅係睇睇吓雞，隔離隻孔雀忽然開屏，我哋一家三口都睇到O晒咀﹗
離開小朋友動物園之後都係四圍睇其他動物同影吓相咁，經過連日來嘅特訓之後，燒腩仔一見到呢D有個窿嘅展板就會自動埋位伸個頭出來，佢呢張相個樣真係好似長頸鹿BB咁溫純呀﹗叫佢企埋去扮企鵝都肯，相當專業﹗
行行吓見有個位有塊黑板可以畀小朋友畫畫，於是放燒腩仔去同D日本小朋友一齊玩吓，點知佢完全無興趣（佢此行明顯係唔同日本小朋友交流㗎，莫非佢都感受到大家嘅語言差別？），只係自己坐埋一邊睇動物書。
出口附近有個超大嘅公園，燒腩仔一見到就成枝箭咁衝過去﹗
超長嘅滑梯佢都敢滑，不過實情係一D都唔滑，反而隔離條BB滑梯就超滑，百厭燒腩仔想調轉上都上唔到冼返落來。
玩完滑梯再捉佢去爬呢個超斜假山，斜到連艾菲都差D落唔返來呀﹗但燒腩仔至愛係假山下面條隧道，來來回回咁走咗唔知N咁多次，後來要佢走時喊咗好耐都唔肯收聲呀﹗（其實都係艾菲剩機畀佢發發洩D不安情緒先由佢喊咁耐啦﹗）
去完公園玩我哋就求其入咗間餐廳到食lunch，點知...個天又忽然落大雨﹗仲要落到完全無諗住停嘅意思﹗我哋三個人得一把超細縮骨遮，又推住架只得一個頂到一陣雨嘅太陽檔嘅BB車，掙扎同等咗好耐，見差唔多有巴士到門口，就決定直衝出去跑去巴士站，難得燒腩仔喺咁混亂嘅情況吓都可以一上巴士就瞓著，Good﹗
燒腩仔瞓著就係大人嘅shopping time啦﹗但狸小路又係另一著名旅遊景點，勁多遊客亦無咩嘢啱行啱買，所以行咗陣見燒腩仔對腳淋到濕晒，就決定返酒店休息吓換褲換鞋先再出發。
最後決定留喺札幌車站行吓就算，已經唔係血拼mode，但都忍唔到手買咗套made in Japan嘅餐盤同飯碗畀燒腩仔，行過Disney Store時又帶咗隻胡迪牛仔帽造型嘅飯碗走（佢反轉真係胡迪頂帽來㗎）。
到晚飯時間，米高由落機當晚已經話想食回転寿司根
其實我哋上次來北海道時都專登去佢嘅根室老店食過，當時食lunch都要等位但唔算耐，D壽司確係幾好味會令人想返來再幫襯，但經過今次之後艾菲都忍唔住同米高講無下次，始終我哋帶住小朋友，餓親大人無所謂，餓親小朋友就唔OK囉﹗
燒腩仔遊日本@2014：
Day 1 HK>札幌
Day 2 札幌>帶廣 part 1
Day 2 札幌>帶廣 part 2
Day 3 阿寒湖>知床 part 1
Day 3 阿寒湖>知床 part 2
Day 4 知床>網走 part 1
Day 4 知床>網走 part 2
Day 5 網走>美瑛>富良野 part 1
Day 5 網走>美瑛>富良野 part 2
Day 6 富良野>蘆別>麓鄉>札幌 part 1
Day 6 富良野>蘆別>麓鄉>札幌 part 2
Day 6 富良野>蘆別>麓鄉>札幌 part 3
Day 7 札幌
沒有留言:
張貼留言