離開大橋櫻桃園之後，我哋就即刻揸車過去麓鄉嘅麵包超人館啦（唔記得影成個館嘅外觀畀大家睇添）﹗來呢到之前，燒腩仔都識邊個係麵包超人嘅（因為有個阿媽一直好用心咁荼毒佢嘛，hehe...），但至愛始終都係Mickey Mouse，點知來完呢到一轉，佢就已經變咗心，日日包包人前包包人後咁叫（包包人係佢叫麵包超人嘅專用叫法，但佢其實知包包人個真名叫麵包超人㗎喎），所以話呢...仔都係貪新忘舊嘅，kakaka...
第二次來嘅艾菲，一早就知超人館出面有個水池，放晒麵包超人嘅玩水玩具喺到畀小朋友玩，所以一早預咗玩水時間同帶多咗套衫來畀佢換（艾菲見有兩個日本兄妹直情換咗泳衣來玩添呀），點知佢食車厘子時已經整污糟咗之前件衫，唯有換咗衫再玩水啦，好彩佢最終都唔係玩到好濕唔使再換衫。
燒腩仔：我㩒﹗
燒腩仔：我倒﹗
咁多個玩水玩具之中，燒腩仔至愛就係呢個水車，彈到成面水都唔怕係要繼續玩﹗
著返鞋再同呢D麵包超人凳影吓相先﹗
玩完水就入去麵包超人館啦，但未入門口就先來一排扭蛋機，全部都係館內限定扭蛋呀...
燒腩仔個媽媽又點會抵受得住呢D誘惑吖，不過都好冷靜咁只係扭咗兩
第一層其實係shop來，一入門口就見到呢部麵包超人scooter，艾菲嘅心心眼已經即刻浮咗出來，不過燒腩仔連單車都未識踩，要米高幫艾菲抬架scooter返香港應該係無可能嘅事，所以艾菲完全唔敢提出呢個要求。
喺shop入面逛咗一陣，燒腩仔已經開始失控，基本上真係超級妨礙艾菲shopping囉， 然後行到尾時先終於發現館入面有個area係放晒D麵包超人玩具喺到畀小朋友玩，等媽媽們可以安心出去血拼，你話日本人真係幾貼心呢﹗
因為知道去到名古屋都會再去麵包超人博物館，所以呢次買得好克制，只係買咗件Tee，填色冊，風扇（風扇諗住名古屋熱會用得著）同衣架，當中至愛係個衣架，可以同時掛校服，
買完嘢就上二樓行gallery，呢一層放咗好多麵包超人嘅畫，另外仲有個位可以畀小朋友畫畫㗎，仲有D麵包超人漫畫任睇。
可惜燒腩仔完全唔識欣賞，全程一副不情不願樣。
因為呢日要趕路返札幌還車，所以行埋gallery就諗住走，起程前過咗去隔離果醬園開餐，燒腩仔又食到衰衰咁搞咗勁耐都食唔到半碗飯，艾菲同米高都餵到超勞氣，不過我哋就居然因為咁而遇到麵包超人喎﹗﹗﹗
話說麵包超人每日會喺指定時間出來同大家見面，我哋來呢日就係上午11點同下午2點，11點嘅時候我哋玩緊水錯過咗，到12點幾過去開餐諗住一個鐘實搞掂走人，點知畀燒腩仔玩到差唔多2點先離開到餐廳，見時間差唔多米高就決定畀我哋上去搵埋麵包超人先走啦﹗YEAH！
燒腩仔成功得到麵包超人愛的抱抱﹗佢開心到之後成日不停提住包包人呀﹗
影相前燒腩仔嘅狀態其實係好差㗎，因為佢一早七點幾起身玩到下晝兩點都無抖過，個人已經無電攰到爆炸，亦之所以佢離開麵包超人館前同食飯時都超唔合作好扭計，咁我哋再帶佢行返上gallery時，見到條長長嘅人龍，要佢乖乖排隊係完全無可能嘅事啦，艾菲唯有出動新買嘅麵包超人風扇來分散吓佢注意力。
因為燒腩仔咁大個仔都未同過呢D會郁嘅卡通人物影相，所以艾菲都擔心佢會話驚然後爆喊走咗去或者扭扭擰擰唔合作，於是見佢情緒稍為穩定艾菲就帶佢去前面睇麵包超人同其他小朋友影相係點，解釋佢知要同麵包超人握手同畀佢抱，跟住問燒腩仔得唔得啦，佢就好正經咁望實麵包超人答艾菲「得」，當時艾菲都抱住聽住先嘅心態（因為太了解佢乜都話驚嘅特質啦），點知排到佢時佢真係肯自己行埋去麵包超人到，任佢抱住仲笑得好開心咁畀我哋影相添呀﹗
嘩﹗艾菲全日最開心唔係有得同麵包超人影相，而係自己個仔原來都可以咁勇敢㗎﹗真係覺得佢好好好好叻仔呀﹗
燒腩仔遊日本@2014：
Day 1 HK>札幌
Day 2 札幌>帶廣 part 1
Day 2 札幌>帶廣 part 2
Day 3 阿寒湖>知床 part 1
Day 3 阿寒湖>知床 part 2
Day 4 知床>網走 part 1
Day 4 知床>網走 part 2
Day 5 網走>美瑛>富良野 part 1
Day 5 網走>美瑛>富良野 part 2
Day 6 富良野>蘆別>麓鄉>札幌 part 1
沒有留言:
張貼留言