釣魚友

艾菲細個時極鐘意玩會轉嘅釣魚機，仲珍藏咗部迷你版喺屋企，不過收得好到艾菲都唔記得放咗去邊，好彩燒腩仔都唔弱，表姨媽喺佢幾個月大時送咗成套釣魚玩具畀佢，有齊魚網同魚竿勁專業（表姨媽應該喺香港買，不過淘寶見過廿蚊有交易），但見佢當時仲細就一直無畀佢玩，只係將D魚拎晒來做沖涼玩具，沖涼時隨手放幾隻落水畀佢捉吓魚就算。

直至之前帶燒腩仔上幼潛，老師拆開一張地墊扮水池畀佢哋玩釣魚（木質嘅釣魚玩具），燒腩仔居然第一次釣就成功釣到好多魚，仲可以好專心咁坐定定喺「池邊」釣魚無跌落「水」（佢D同學釣咗陣就走晒佬或者踩晒入去個「水池」到徒手捉魚），於是艾菲就決定返屋企拎返呢套釣魚玩具出來畀佢玩，仲決定增加難度加水落去等D魚浮吓浮吓難釣D﹗



燒腩仔：等我表演徒手捉鴨仔啦﹗
艾菲：釣魚係用魚竿㗎﹗



燒腩仔：釣到啦﹗
艾菲：但你釣咗幾次都係釣同一隻鴨咋喎﹗釣條魚來食吓得唔得呀？



燒腩仔：媽媽﹗魚呀﹗
艾菲：Well Done! 今晚有餸加﹗



燒腩仔：依？呢條都幾靚喎﹗



燒腩仔：嘻...乜咁容易又有一條上釣？



燒腩仔：呢條清蒸好定煎好呢？

燒腩仔知道有水玩當然開心到暈，仲成日咋咋啼啼伸手落去捉魚，又扮唔識用枝魚竿要用手放個魚鈎落水，初時佢都的確唔係太控制到枝新魚竿，但好快已經上手想釣邊條就邊條，雖然只係裝咗極細盤水畀佢，最終都彈到佢成身同成個廳濕晒，不過艾菲畀得佢玩就豁咗出去預咗，專登喺燒腩仔沖涼同艾菲抹地前玩，玩完先同佢沖涼換衫同抹地，感覺唔使再做多重功夫嘛﹗

幼潛老師話呢個遊戲可以幫佢哋訓練手眼協調，有D小朋友起初未得，會用手捉住個魚鈎去吸魚就算，陪玩嘅就要教佢拎住魚竿釣，等佢多D練習先會成功，既然個game咁益智，燒腩仔又咁鐘意玩，就算玩完要做善後功夫，簡中佢乖拎出來畀佢玩當奬勵都OK吖，遲D大個可以畀佢試用另一枝有得攪返D魚絲上來嘅魚竿，呢套玩具睇來都有排玩啦﹗