DIY泥膠

自燒腩仔足歲半之後，艾菲一直都想畀泥膠佢玩，因為泥膠可以訓練手掌，手腕同手指仔嘅小肌肉，又可以畀佢發揮吓創意，之前上網見過人介紹可以DIY泥膠之後，就決定自己整畀燒腩仔玩，仲一早買齊麵粉同色素，連玩泥膠用嘅工具都已經淘咗返來好耐，但前排實在太多嘢忙，拖吓拖吓就無咗件事...

直至早幾星期上幼潛玩手指畫，燒腩仔玩到爆喊唔肯畫（其實佢之前一直唔鐘意玩手指畫，但捉住佢手都勉強畫到，諗住有機會試多D就OK，點知越大就越識反抗），眼見其他小朋友都超級鐘意手指畫，艾菲明佢又係感覺統合嘅問題，唔鐘意顏料喺手個視覺效果同質感，或者都同艾菲平日怕污糟，成日佢隻手一掂到D飯餸or其他污糟嘢，怕佢由對手捽到去成身，就拿拿聲同佢抹乾淨有關，同燒腩仔婆婆同姨媽講開，佢哋問艾菲上次同佢整蛋糕同搓包咩反應，艾菲先醒起自己無畀佢直接用手搓過麵糰，於是拿拿聲開工整泥膠畀佢玩來訓練吓。

撐得太遠都係講返整泥膠先，整泥膠其實一D都唔難，做法求其上google search就搵到，而且價錢平過街買好多，可以要幾多整幾多同要咩色有咩色，仲可以當親子活動同小朋友一齊整，不過最重要都係全部用食得入口嘅食材整，就算小朋友唔小心吞咗都唔使驚，好似燒腩仔咁已經識得分邊D先係食物，唔會隨便放嘢入口食，都有一刻試過誤會舊泥膠係搓麵包嘅麵糰想放入口試味，所以畀佢哋玩嘅嘢都係小心D好。



艾菲求其喺網到搵咗個無用他他粉嘅做法（有D人話用他他粉可以增強佢嘅彈性，但艾菲覺得唔用都OK），首先預備2杯麵粉，2杯水，半杯鹽，4茶匙油同食物色素，然後將所有材料攪勻變糊狀，之後就開火加熱，不停攪拌到攪唔郁，冷卻拎出來按自己喜好分割，最後加幾滴食物色素搓勻就OK，不過呢個份量做出來原來都幾多，艾菲總共做咗四隻色，每隻色有200g，對燒腩仔呢D初學者來講實在太多玩唔晒。



艾菲咁神心整完泥膠，當然要安排時間畀燒腩仔試玩啦，但叫佢玩泥膠佢就好開心咁把口一直話「整麵包」（呢個小朋友實在係睇艾菲整包整蛋糕睇到上晒腦，玩完泥膠之後成晚都同米高話佢朝早整麵包>.<），然後就不停玩枱上面嘅工具...



燒腩仔：呢舊嘢叫泥膠？等我拍吓佢先﹗



燒腩仔：等我搓吓佢先，嘩﹗整咩咁黐手㗎﹗



燒腩仔：依？原來可以用刀仔切開佢㗎﹗



燒腩仔：又可以吸吓印仔整一閃一閃小星星﹗



燒腩仔：媽媽仲整咗條蕉畀我食添呀﹗um...好味道﹗

舊泥膠整好時明明都幾好搓，但唔知係唔係跟咗個網教嘅小tips，未完全乾透就將舊泥膠放咗入雪櫃一晚，結果出水令佢變軟身呢，搓上手有D黐手黐枱，好彩艾菲用廚房紙索咗D水之後搓多幾搓都變返正常玩到，亦好驚喜第一次玩泥膠嘅燒腩仔居然大愛，但只要細心留意就會發現佢個人好精，係用工具多過用手搓，所以到第二次玩，舊泥膠雪多幾日再濕D軟D黐手D，艾菲又收起大部分工具逼佢用手搓就出事，玩唔夠幾分鐘就瓜瓜嘈要艾菲同佢洗手，艾菲唔肯只係教佢將泥膠搓返埋一齊就會自然甩，佢唔識用道力結果搞到成手都係，最終係爆喊收場﹗

事後艾菲唔太忿氣決定要急救舊泥膠，不停加麵粉落去搓都係好軟好黐手，最終把心一橫搏一搏，將舊泥膠放落pan到壓平烘一陣等D水份蒸發，烘完再搓返好佢至彈手，再等佢風乾一晚先入盒/保鮮袋，估唔到出來效果又work喎﹗燒腩仔再玩都無投訴，唔黐手玩得勁開心，所以下次再整嘅話，應該要減少少水嘅份量，同埋一定要等舊泥膠乾透先放入盒/保鮮袋，而且放陰涼位已經OK，變乾先好加水落去搓返軟，真係要記緊先得﹗