由燒腩仔15個月大開始上幼潛，話咁快就上完最後一期嘅課程，本來燒腩仔可以升班讀佢哋嘅幼兒樂園，等佢哋慢慢習慣上堂同自己返學，不過因為已經有學校收咗佢讀N，所以我哋唯有同呢到講bye bye啦，最後一堂早咗到，叫佢喺大門口同走廊到影返張相留念。
一個月前已經開始同佢洗腦，解釋上埋呢堂就要升班去另一間學校返學，燒腩仔明顯出現不安情緒，最近發脾氣時最鐘意講嘅「唔要媽媽」已經變成「我要媽媽」，發癲時一定要艾菲攬返實佢先肯平伏情緒，但艾菲堅持出門口前同佢再講一次等佢接受現實，所以今堂keep住都有D唔捨得嘅情緒。
最後一堂有個簡單嘅考核，第一樣考嘅係吸印仔，因為之前去旅行miss咗兩堂，之後艾菲懶無同佢返屋企練習，仲以為佢實吸得唔靚，點知佢喺不知不覺間已經無師自通，由上一期唔夠力或者拖住吸，到今次吸得好四正，仲要全部吸喺格仔入面。
之後再考物件配對同分顏色，全部都係燒腩仔強項，話咁快就已經完成﹗正如幼潛老師所講，佢喺學習方面真係無咩問題，只要肯做一學就會識，主要問題都係情緒方面，連老師都睇得出佢受軟唔受硬，所以艾菲每日教佢都要鬥智鬥力，太寬鬆會令佢越來越過份，太嚴厲又會有反效果，呢條中間線真係好難拿捏﹗
艾菲同老師傾偈交流，佢就拎住個波喺呢條滑梯到碌咗成十幾次都唔厭，連同學仔媽媽都話佢勁，只要D嘢係佢鐘意嘅，佢就可以好專心好投入咁做，亦正正係老師話佢個人都幾主觀，好多嘢都唔鐘意同話驚，艾菲就要絞盡腦汁去幫佢去試同克服。
拎埋畢業證書就要離開呢個充滿美好回憶嘅課室啦﹗講真...連艾菲都好唔捨得呀﹗最懷念就係每次落堂之後，同燒腩仔好開心咁拖住手去車站坐車嘅專屬時光，兩母子有講有笑咁講返上堂學嘅嘢，真係諗起都覺得sweet﹗
未返幼潛時艾菲都十五十六，覺得返playgroup未必有用，但原來只要返到好嘅playgroup，遇到好嘅有心嘅老師，同肯交心嘅同學仔家長，真係會令小朋友同媽媽都獲益良多，燒腩仔由起初上堂無耐性周圍走，到宜家幾想食茶點都知要等齊大家唱埋歌先准食，知道玩遊戲要排隊守規矩，艾菲知道多咗燒腩仔嘅強弱項，理解燒腩仔有時搗蛋係因為佢覺得D嘢自己已經識無心機玩，明白佢係個感觀好敏感同好需要安全感嘅小朋友，有時佢唔肯玩D大部分小朋友都鐘意玩嘅嘢，乜都話驚唔係佢特別麻煩搞事，而係佢覺得唔舒服同不安...
最後一堂都堅持自己同同學仔排住隊落樓梯唔畀我哋拖，希望你去到新學校都能夠快D適應學校生活，遇到好嘅老師同啱玩嘅同學仔，媽媽會同你一齊加油﹗一直喺你身邊支持你﹗
幼潛回顧：
幼潛＠15M
幼潛＠18M
沒有留言:
張貼留言