由於天氣實在太好，我哋離開四季彩之丘時已經熱到溶咗，全部人嘅飲品包括燒腩仔每日必備嘅一大枝水都飲晒，呢個時候當然要去食返個雪糕降吓溫啦﹗專登開車去返呢間三年前來過，專食夕張蜜瓜雪糕嘅POPURA FARM，去到先知佢原來搬咗鋪去對面（真係賣雪糕賣到發咗達），新鋪大咗闊落咗仲多人咗，而且多咗冷氣室內位，Good!
起初落車時，燒腩仔完全唔知發生咩事（其實艾菲已經解釋咗佢知係去食雪糕），艾菲要佢同個鋪頭標誌大夕張蜜瓜雪糕影相仲樣衰衰咁，入到去見到有雪糕食，即刻雙眼發出bling bling嘅閃光，食完一啖又一啖咁同我哋搶食，食到咳都仲未肯收口呀﹗
食完雪糕見時間尚早就去埋富良野嘅富田農場，呢個花田絕大部分都係薰衣草，去到你只會見到一大片紫海，就連賣嘅手信都係以薰衣草做主題，但呢到感覺無四季彩之丘咁大，而且超多香港旅行團，我哋喺呢到聽廣東話應該係多過聽日文囉﹗
來到花田，燒腩仔又係失晒控咁狂奔，呢個樣好似好開心，但佢心底入面到底諗緊咩？真係仲難摸過女人心呀﹗
model燒腩仔失控，完全唔肯合作影相，唔係狂奔就扭米高抱，無人理嘅艾菲唯有自己影吓花來自娛。
記得三年前，喺花田嘅後山有個山坡仔種滿太陽花，艾菲同米高仲喺到影咗張好靚嘅合照添，一心諗住今次可以一家三口來影過張新，點知...想當日嘅太陽花海無咗，只係得呢D疏疏落落嘅太陽花BB，失望...
由於已經係黃昏時間，燒腩仔又成日無瞓過晏覺攰到癲咗咁滯，所以喺富田農場行咗陣就走，拿拿聲去富良野駅嘅遊客中心問D嘢，同去附近超市補返D貨就趕返民宿啦﹗
喺富良野呢邊基本上都無咩酒店可以揀，而肯招待埋小朋友嘅民宿選擇亦唔多，而呢晚我哋就住咗旅の宿 ステラ Stella，一大片田園中間嘅小屋，感覺真係好舒服好relax，而最正係呢到可以望到遠處嘅火車，燒腩仔第二朝瞓醒就識得企喺窗邊話要睇火車啦﹗
民宿主人係一對中年夫婦，佢哋好welcome小朋友，亦會拎D新奇好玩嘅玩意出來同小朋友玩，雖然言語不通，佢哋都有努力嘗試氹燒腩仔開心，而民宿入面都充滿田園風格，我哋間房算闊落，不過房入面無洗手間，沖涼亦要去出面獨立浴室，今次艾菲當然好醒咁堅持要米高同燒腩仔兩父子沖涼，自己就享受吓十幾分鐘嘅寧靜寫意啦﹗
去到民宿其實已經夠鐘開飯，所以我哋放低行李就即刻落樓開餐，呢邊嘅民宿主打都係食返佢哋嘅農產品，D菜真係特別鮮甜過平時食㗎，而呢晚我哋都一早order咗個兒童餐畀燒腩仔，但佢依然係好唔合作，食咗幾啖已經話唔食，但吸收咗之前咁多餐嘅經驗，艾菲都決定唔同佢嘈，基本上佢餓一餐之後下餐自然會食好，呢日下午佢都食得算飽又食咗雪糕做下午茶，晚飯唔食都係正常嘅（自我催眠mode >.<）。
食飽無咩好做，又帶燒腩仔落樓玩吓，樓梯口旁邊放咗兩大隻熊啤
睇完星星又來是晚宵夜啦﹗就係食雪糕時喺POPURA FARM用一百蚊港紙買返來嘅夕張蜜瓜啦﹗叫民宿主人幫我哋切開，艾菲同米高一人一邊筆來食，又甜又多汁，認真爽爽爽呀﹗
燒腩仔遊日本@2014：
Day 1 HK>札幌
Day 2 札幌>帶廣 part 1
Day 2 札幌>帶廣 part 2
Day 3 阿寒湖>知床 part 1
Day 3 阿寒湖>知床 part 2
Day 4 知床>網走 part 1
Day 4 知床>網走 part 2
Day 5 網走>美瑛>富良野 part 1
沒有留言:
張貼留言