旅程嘅第一日主要都係飛機中度過，因為asia miles換飛基本上都無可能換到直航機去北海道，所以我哋今次揀咗去名古屋轉機順便stay over玩吓，亦由於要就轉機時間而揀咗十點三早機出發，坐早機對艾菲同米高來講當然無問題，但就擔心平日慣咗瞓到九點幾先起身嘅燒腩仔會唔會扭計，好彩事前都同佢做定輔導，當日六點幾叫醒佢都好合作，仲第一句就同我哋話「坐飛機啦」，乖乖地飲完杯奶就跟我哋出門口。
甚少暑假peak season出門嘅我哋，去到機場先知呢D月份原來係咁多人， 就連落的士都要排隊等位，寄行李條隊更加係打晒蛇餅，不過我哋架機delay咗成個鐘，所以搞完一輪仲有大把時間剩，過完關食埋早餐去埋gate 23玩，埋到閘口仲有時間同燒腩仔慢慢影相，佢見到架飛機即刻超興奮咁撲埋塊玻璃到，叫咗好耐先叫到佢擰轉身畀艾菲影吓相呀﹗
話晒都係燒腩仔第一次坐飛機，而佢個人安全意識特別高又慢熱，艾菲事前都跟足幼潛老師教路，係youtube搵咗D關於機場嘅片畀佢睇，由入閘過安檢過關到坐飛機，逐個step話定佢知會做D咩等佢安心，結果佢過關時都真係好安定好合作，上到機都無嘈無扭計乜滯，只係有個位見到隔離妹妹喊唔停佢又跟住喊（可能係艾菲叫過佢安慰妹妹，但佢發現妹妹唔睬佢而喊掛），艾菲仲可以爭取時間睇到大半套《金雞3》添（嘻...都特別鳴謝幫手湊仔陪玩等艾菲安心睇戲嘅米高啦）。
國泰D飛機餐越來越難食，不過燒腩仔個兒童餐就有驚喜，至少有布甸同果汁先啦，燒腩仔上機無耐就瞓咗，所以我哋等自己食完先叫佢起身食嘢，佢出發前幾日胃口都已經開始麻麻，不過都食咗1/3個餐，算叫做好畀面啦﹗
話咁快就到名古屋中部機場，我哋要過關拎行李出閘再上樓上check in轉內陸機，內陸機安檢無咁麻煩，就連水都只係畀佢哋聞吓就過得關唔使倒，check in收BB車去寄倉時，JAL嘅地勤姐姐就換咗架BB行李車畀燒腩仔坐，艾菲同燒腩仔都超鐘意呢架車，可以推BB又可以放手提行李係車底，點解香港機場唔引入呢款車㗎？
入咗閘之後見到有個遊樂場，又見未咁快上得機，即刻帶燒腩仔過去放吓電，大人就食吓下午茶爭取時間休息吓。
日落之下再次起機，上到天空仲見到好厚嘅棉花雲。
呢程機唔full，燒腩仔仲可以偷雞自己坐一陣，不過撞正佢嘅午睡時間，所以起飛後無耐佢已經無電，趴係米高身上瞓到就來落機先起身，等艾菲可以輕輕鬆鬆咁抖吓。
雖然無飛機餐食，但有飲品提供，推介呢杯艾菲坐JAL必飲嘅skytime柚子汁，酸酸甜甜超醒胃。
國泰要坐長途機先有禮物畀小朋友玩，反而坐JAL內陸
落機已經七點幾，事前米高已經check過新千歲機場D餐廳八點就last order，所以求其搵間仲開又似樣嘅就入去食，專登叫咗個燒魚定食畀燒腩仔，至於大人就梗係食好嘢啦...啦...啦...
呢個燒腩仔全日出盡力咁冧女，先係香港機場過安檢時呃到個安檢姨姨送貼紙畀佢，再係名古屋機場引咗大班地勤姐姐同佢玩，來到餐廳又不停大叫姐姐，見姐姐無反應就越叫越大聲（你講廣東話人哋點會識應你...），終於畀佢呃到個飛吻同碟夕張蜜瓜返來，搞到艾菲同米高都勁唔好意思。
食飽係機場逛咗個圈，影吓相買埋宵夜同燒腩仔盒奶就返上酒店房啦﹗
因為太夜落機，米高話唔想拎住行李四圍走，決定第一晚住機場酒
唔知點解艾菲去親日本都要食宵夜先安樂，而呢晚就揀咗puff
沒有留言:
張貼留言