離開靜內坐咗兩個鐘車，差唔多五點先終於來到十勝附近嘅道之駅，本來過來係一心諗住買新鮮粟米食，點知D檔攤已經開始收，得返呢D賣蛋機同汽水機，雖然燒腩仔好鐘意佢哋不停狂㩒狂扭，不過就完全填唔飽我哋嘅肚，最後艾菲連水尾軟雪糕都照殺，即人哋一個普通街邊軟雪糕都真係好香好好味喎﹗
搞咗日幾，終於來到第一個正式景點，幸福駅﹗其實艾菲同米高三年前已經來過，呢到係一個停用咗嘅火車站來，由前一個站愛國（即愛之國度）來到幸福站，一聽就知係sell浪漫啦，不過我哋今次就帶埋個強力電燈膽燒腩仔來，成件事即刻變得一D都唔浪漫囉﹗>.<
呢到好似火車博物館咁，放咗兩架舊式火車係到畀人上去參觀，燒腩仔上到車即刻周圍跑周圍擒，追到米高氣到咳呢...
好彩都有D影相位有嘢玩，可以令燒腩仔停一停，例如捉佢去扮吓站長，同埋畀張超大車飛佢任玩，唔係去完都唔知佢來過﹗
之後諗住叫燒腩仔行路軌畀艾菲影吓相，點知路軌相就因為燒腩仔喪走而影唔成，只係影到呢張好浪漫嘅父子背影，話說呢個小朋友第一日自駕遊唔係好慣，每次落車都話「唔使驚」（佢一咁講即係驚啦），去到唔同地方都會好失常咁亂跑亂叫完全唔理我哋講咩（艾菲覺得呢D係佢好不安嘅表現來），每次艾菲想埋去拖佢或者抱佢都會大大聲咁話「唔要媽媽要爸爸」，結果呢十幾日就唯有辛苦米高啦，揸足全日車之後落車仲要招呼失控嘅燒腩仔，忽然受寵嘅米高都忍唔住叫辛苦呀﹗
至於艾菲有無不是味兒呢？頭一日都有DD嘅，不過有次燒腩仔又大大聲話唔要媽媽時，艾菲問返佢媽媽唔要燒腩仔得唔得，佢諗都唔使諗就答「唔得」，咁艾菲知道佢其實仲好在乎媽媽就無再呷醋啦，即刻由佢黐到米高實一實，就連幫燒腩仔poo poo同沖涼呢D重任，都好放心咁交晒畀米高做，自己就樂得清閒抖吓四圍行吓影吓相，因為我知道去完旅行之後回到現實世界，就唔輪到燒腩仔話唔要媽媽啦﹗kakaka...
其實幸福駅附近仲有個花畑牧場可以去玩，我哋上次去過有超好味芝士食，有得睇表演同玩遊戲，又有真嘅草泥馬同馬睇，都幾適合小朋友去玩，不過佢哋四點半就閂門，所以今次無緣帶燒腩仔去啦，唯有直接返帶廣酒店check in，我哋呢晚住Richmond Hotel，泊車要泊去隔離火車站停車場唔太方便，不過酒店都好baby friendly，艾菲同燒腩仔係lobby等米高泊車返來時，好容易就係書架到搵到本之前好想買畀燒腩仔嘅圖書嘅原裝日文版，check in時仲送咗set小朋友套裝畀我哋
放低行李就出去搵嘢食啦﹗帶廣最出名係食十勝豚丼，但我哋太夜趕唔切食老鋪嘅豚丼，唯有改去第二間食普通定食嘅餐廳，咁個味當然即刻變得普通D啦，就連米高個天婦羅蝦蕎麥麵都只可以話係不過不失。
米高又叫咗個兒童餐畀燒腩仔，上枱時佢好開心好興奮㗎，不過食咗唔夠一半意粉，半隻蝦，少少漢堡扒就大叫食蛋糕，點都唔肯再食正餐囉﹗
過咗夜晚八點之後嘅帶廣，除咗夜店之外都無乜鋪頭開，難得有間超市仲開就入去掃多個烏冬，魚仔同鰹魚碎，連埋朝早係靜內AEON買嘅菜同肉，準備第二日兩餐都自己煮畀燒腩仔食，結果佢食唔食？睇埋下一篇大家就會知。
第二晚繼續食宵夜，而今次主角係超甜超多汁嘅月雫蜜瓜，重點係價錢超級抵，計返大約三十幾蚊港紙一個，係香港買個雷電蜜瓜都至少要百幾蚊啦﹗而最搞笑係個瓜淋同甜到燒腩仔當咗佢係蛋糕，一邊食一邊大嗌「食蛋糕」囉﹗;P
燒腩仔遊日本@2014：
Day 1 HK>札幌
Day 2 札幌>帶廣 part 1
沒有留言:
張貼留言