由於呢次旅程，負責book酒店嘅米高話日本D酒店唔興加BB床（好似話關消防條例事喎），所以我哋呢十二晚都要同燒腩仔一齊瞓，向來都係同燒腩仔分床瞓嘅艾菲當然好唔慣，而呢一朝起身只係去個洗手間出來，就見到呢個小朋友已經瞓到大字型碌咗出來床中間，大家可以想像平日夜晚佢有幾反瞓，畀佢踢醒都已經係小事，最經典係有一晚矇矇朧朧間呯一聲畀佢個鐵頭撞咗落艾菲隻眼到，痛到艾菲叫晒救命﹗第二朝眼角仲明顯瘀咗一撻添呀﹗自此以後艾菲打死唔瞓佢隔離﹗一見佢轉身已經驚到即刻醒﹗
大人準備好先叫燒腩仔起身，每朝先係房畀盒奶佢飲再帶佢出去食早餐，第一日飲日本奶嘅佢仲開心到不停話「好飲」，但到最後幾日已經飲到唔願飲囉，而呢日酒店有包早餐buffet，D食物都好豐富同好味，最欣賞就係佢放咗一大棟麵包超人碟同杯畀小朋友任用，讚﹗
食飽就check out去機場搵租車公司個負責人，再坐巴士去拎我哋架戰車，今次米高揀咗Honda嘅Freed，貪佢尾箱夠大可以放晒兩個大喼同BB車，可惜揸唔夠半日佢已經投訴架車上山唔夠力，至於個GPS都係入電話就work，但就成日老點咗佢行city路多燈位浪費時間喎﹗不過不得不提係今次畀米高誤打誤撞下搵到間超級抵嘅租車公司，佢哋應該係專做日本人生意，起初send email問佢哋嘢佢哋係因唔識英文而想reject唔接我哋生意，後尾米高覆返話識睇日文先無問題，我哋租車五日只需＄2000左右﹗絕對係超值之選﹗
check完車就出發啦﹗海天一色靚到呢...就算第二次去都仲係咁鐘意北海道呢個地方呀﹗
中途去咗靜內食飯同行AEON入貨，米高睇人哋介紹去咗間叫Victoria Station嘅餐廳，專食鐵板餐但價錢又唔係好貴喎，艾菲叫咗個漢堡扒拼雞扒都不過係990yen加稅，而個漢堡扒係估你唔到咁juicy超好味，至於燒腩仔就叫咗個兒童餐畀佢食菜食烏冬。
睇上一篇時，大家都以為燒腩仔好乖好合作，但實情係第二日佢已經開始發作，食飯係其中一件令艾菲超頭痛嘅事，平日食飯好合作嘅佢，呢一餐仲肯乖乖坐定自己食..........一陣，食唔夠五分鐘已經話唔食係到玩嘢，大大聲嗌話唔食呢樣唔食嗰樣都算，最討厭就係D嘢一唔食就摞出來整到周圍污糟晒要我哋善後囉﹗>.<
食飽之後就過隔離行AEON入貨，幫燒腩仔買餸買片買濕紙巾，見到成堆限定口味Haagen Dazs，不過D味實在太新奇，艾菲唔敢挑戰自己味蕾而無買，只係買咗北海道產車厘子畀燒腩仔做下午茶，無乜食正餐嘅佢當然追住來食啦﹗
之後上車轉個灣就到下一站西松屋，米高只係畀咗半個鐘艾菲行，艾菲都成功敗到成堆戰利品返來，呢間鋪比較多減價貨，相入面後排D衫平均都係廿幾至四十幾蚊一件，平到唔買都對唔住自己，但最抵都係買畀燒腩仔表妹嘅長袖底衫同包肚褲，199yen/pack咋﹗幾蚊條包肚褲同底衫，香港都未必買到啦﹗
另外艾菲都買咗一早target要買嘅冰涼BB車墊，1set四條星星戒片褲（連本身有嘅3條麵包超人戒片褲都應該夠用），1pack兩件返學底衫，1pack3對返學白襪（因為想試清楚先再買，所以兩樣都係買住一pack先），同埋香港未見過嘅麵包超人游水手袖，啱晒燒腩仔宜家上游水堂用，等艾菲唔使抱佢抱得咁辛苦嘛﹗
燒腩仔遊日本@2014：
Day 1 HK>札幌
沒有留言:
張貼留言