22個月

「ABCDEFG...」嘻...我去完旅行返咗來差唔多成個星期啦﹗不過媽媽話旅行返來好忙，要爭取時間休息又要執屋來個大清潔，D相仲未得閒揀，遊記未咁快出得街住，咁就準時出咗我篇22個月成長日誌先啦﹗



先講飲食狀況啦，都係一日四餐早午晚加下午茶，只係朝早會飲奶，係屋企的話主打食BB餐，但出街都多咗食大人食物，尤其係之前去旅行，只得兩餐係媽媽自己煮（艾菲：仲要煮完唔食添），不過去旅行時胃口好差， 幾乎絕食咁滯每餐只肯食1/4碗飯（平時胃口好時可以食到碗半飯㗎﹗），唔肯自己食之餘，仲好鐘意摞返D食物出來，而且會揀飲擇食話唔食菜唔食粟米唔食飯只食肉，搞到肥肚腩都縮晒，直至返到香港第二日去婆婆到走一轉先慢慢回復返正常。

後來爸爸同我刷牙時終於發現我右上顎爆咗一角仔大牙出來，另外都見到下顎兩舊牙骨開始現出來，佢哋先明點解我呢排成日唔願食飯又成日咬人，媽媽話念在我22個月仲係得八隻牙，難得有牙肯生出來就姑且包容吓我喎。

超鐘意食玉子燒，雪糕，蛋糕，布甸之類嘅甜品（艾菲：始終都係為食底），就算出牙唔願食正餐都搶住要食，而咁多樣美食之中蛋糕係至愛，鐘意到食完唔夠喉會發忟，試過有次媽媽問我食唔食雪糕，我即刻九秒九拉咗餐枱碟cup cake落地，又試過有次游完水返屋企前媽媽帶我入美心買瑞士卷，第二次游完水落巴士我就拉媽媽埋去同佢講「買蛋糕」。



瞓覺就依舊唔使大人操心，夜晚十點半左右落床十一點左右瞓著，一瞓就瞓到第二朝九點幾十點先起身，少咗半夜醒咗眼碌碌唔瞓返嘅情況，但就多咗發開口夢成日話「唔要XXX」，同埋成日咋咋啼啼想同爸爸媽媽一齊瞓扭瞓大人床（艾菲：呢D要求當然係即時畀艾菲reject啦），至於晏覺就一日一次，係屋企無人騷擾的話隨時瞓到三個鐘，就算去旅行都一樣咁瞓得，只要爸爸媽媽叫我瞓一陣，我就會自己坐係car seat或者BB車到瞓，最勁一次試過瞓到兩個鐘添呀﹗



活動能力無咩特別進展，只係入字腳好似好咗少少，同玩豬仔車叻咗行得快咗，仲係未識得離地跳（艾菲：只係識原地un），宜家日日係屋企都無時停，不停來回跑同擒來擒去，出街就少咗扭抱，就算扭都係扭爸爸抱，但就成日甩開大人手唔畀大人拖，自己一支箭咁狂奔，呢D時候媽媽就會兇我話再跑就佢抱，通常我會應佢「唔要媽媽要爸爸」，之後就乖乖拖實爸爸慢慢行。



開始有大哥哥嘅風範，得閒會拎屋企個BB公仔來呵同攬，大人叫我換片時我會幫埋D公仔換，一見到表妹都會埋去錫佢摸佢，媽媽叫我幫手餵奶就拎實奶樽唔放， 試過有次大人食飯叫我幫手睇實瞓係床嘅表妹，之後姨媽抱走表妹問我表妹去咗邊，我就好緊張咁通屋走搵表妹，直至姨媽抱返表妹出來我先笑得出，而我係屋企都好鐘意幫手做家務，日日媽媽收衫都搶住同佢收衫夾，有次媽媽病咗唔願郁我就拎把私伙掃把仔幫佢掃地，同媽媽去街時又會主動幫手拎嘢，等媽媽買嘢可以買得輕鬆D。

我同好多男仔一樣係標準車迷，爸爸媽媽老遠帶我去日本周圍玩，都唔及帶我坐火車坐巴士咁興奮，自從我哋自駕遊咗幾日之後就日日叫「爸爸渣車車」，返到來經過停車場又會求其指住架車話「我要坐呢架車」，就連媽媽平日同我換片都要講數要佢應承「換咗片可以玩車車」先，有次畀媽媽罰完企聽完一大輪道理，我都只係喊住回應一句「我無車車玩啦﹗」（艾菲：講到勁可憐咁嘅聲），搞到媽媽都唔知好嬲定好笑。



基本自理能力都係keep住無退步，最叻係終於學識刷牙D水係唔吞落肚要bu出來，呢個月嘅potty training無特別點train，開始唔鐘意條片焗住pat pat，亦講到自己wee緊，就係踏唔出第一步係廁所wee，至於poo poo就畀爸爸媽媽大讚well done，佢哋已經無特別捉我去poo，而係我自己主動話poo，就算去旅行十幾日都係咁做，成個月都無出過事，有次等過馬路時同爸爸媽媽話想poo，仲可以忍到佢哋過完馬路走入商場搵廁所先poo添﹗



講嘢越來越叻， 講到唔停口咁滯，出街不停做現場直播將見到嘅嘢講返出來，就算無人同我講嘢我都會照講，宜家講嘅嘢已經絕大部分係人話，除咗畀媽媽問我點解唔聽話時先講BB話（艾菲：講完之後仲要偷笑），少講單字多數都係講句子，可以好清楚表達到自己意願，例如「唔要媽媽餵，謙謙餵」，「宜家行啦」，「謙謙要食藍莓」，「開咗冷氣唔使開風扇」，「唔使驚，爸爸係到，媽媽係到」，「媽媽受傷呀」，依然好好唱口成日唱歌，開始記得「ABC」同「Twinkle Twinkle Little Star」D歌詞，仲識得同媽媽點唱指定要佢唱某首歌添﹗



最後又係講吓我嘅情感發展，媽媽形容我呢個月嘅trouble 2情況都係反反覆覆時好時壞，有時可以好合作好聽話，有時D衰嘢又會全部返晒來，好似戒咗一陣嘅摞地轉眼又出現返，有時明知自己唔啱做咗壞事，媽媽都未出聲話我，我已經發脾氣坐咗係地下，不過好在開始聽得明道理，有時媽媽同我傾吓解釋吓都OK，已經無之前溝通唔到咁惡搞。

仲係安全意識好高，去到陌生地方要warm up吓先接受到，尤其去旅行期間就最覺，頭幾晚都要住唔同酒店，無喊但就變咗好失控咁四圍走，邊個行開就大叫邊個，就算媽媽攬實都仲係會表現好不安，直至中間有幾晚住同一間酒店，情況先開始好轉正常返，見到陌生人有時都會扮怕醜暱埋，不過有時又會好主動咁去撩D姨姨姐姐玩，氹到人哋鬼咁開心。