呢日酒店唔包早餐，所以我哋一早check out去咗附近餐廳食牛丼，之後就出發去阿寒湖，有D人會喺阿寒湖住一日浸吓溫泉，不過我哋就只係路過性質。
呢到有條愛奴村同溫泉街，不過實在太遊客區feel，完全唔係艾菲杯茶，唯一係呢間龍貓專門店比較吸引，但行咗陣都無買到嘢。
咁一場來到，都循例要派燒腩仔做代表影返一兩張相，唔太合作都叫做成功影到。
但站喺燒腩仔嘅立場來講，肯定係行樓梯會吸引過睇呢D旅遊景點囉﹗
之後行咗入去睇阿寒湖，仲好好彩咁見到傳說中嘅阿寒岳添﹗
個湖其實好大，冬天可以玩冰釣，夏天都可以坐船遊湖，但我哋帶住燒腩仔就免啦...
睇完湖見差唔多時間就去搵食，呢到唔食鹿肉都無乜選擇可以揀，所以求其揀咗碼頭對面手信鋪樓上間餐廳，勝在有阿寒湖靚view，咁呢碗天婦羅烏冬，都OK嘅。
至於燒腩仔都有艾菲愛心靚粥食，係艾菲前一晚用個象印暖壼焗定D豬肉，切定D菜，再一朝早起身加米焗嘅，艾菲事前好擔心焗唔成，仲專登喺香港時試咗兩次先領略到成功秘訣（秘訣其實係預熱時一定要狂搖，同埋D食物溫度一定要係室溫），打開見到成功時不知幾開心，但餵燒腩仔時佢居然話「唔食」﹗﹗﹗
米高一邊餵，佢一邊合實個咀加用手狂推，整到周身周地都係粥，結果艾菲決定換人自己餵，佢依然耍手擰頭加大大聲話「唔食菜﹗」「唔食飯﹗」，艾菲當堂著晒燈勁嬲，最終艾菲係用強權逼燒腩仔食咗大半先罷休，但就浪費咗成個半鐘喺呢餐飯到，食完大家都好唔開心，勁唔值得﹗
食飽就離開阿寒湖向住摩周湖走，但上山無耐已經大霧到睇唔到路，艾菲仲即刻覺得有D頭痛添，莫非係高山反應？
落返山忽然見到有大堆乳牛喺到食草，即刻泊埋一邊帶燒腩仔落去望啦﹗第一次見乳牛嘅佢超開心超興奮呀﹗不過返到香港已經唔記得晒佢哋。>.<
最終太大霧無落車去睇摩周湖，但路過摩周溫泉嘅道之駅居
起初有對老夫婦喺到浸，燒腩仔見到即刻怯一怯，但有邊個小朋友敵得過玩水吖，好快就已經浸到踢晒腳咁，玩到連塊面都濕埋呀﹗
臨走仲歎咗杯超好味galeto，亦全靠呢杯雪糕，艾菲同燒腩仔先難得溫馨吓，大家睇吓呢個為食燒腩仔，對眼係完全無離開過杯雪糕㗎﹗kakaka...
燒腩仔遊日本@2014：
Day 1 HK>札幌
Day 2 札幌>帶廣 part 1
Day 2 札幌>帶廣 part 2
沒有留言:
張貼留言