之前佢篇22個月成長日誌都有提過，燒腩仔本身係超鐘意食蛋糕，跟我哋去完日本食咗咁多好味蛋糕之後，就更加係無蛋糕不歡，鐘意程度係佢上咗成個幾月嘅游水堂，無論教練同艾菲點氹佢都唔肯試吓潛落水，不過上一堂艾菲只係講一句「你肯潛落水媽媽請你食蛋糕」，佢終於勉為其難咁畀艾菲將佢個頭潛落水，仲要一共潛咗三次添，雖則每次上返水都鬼殺咁嘈，但都已經好叻仔有突破啦﹗
而為咗履行承諾，艾菲襯早幾日有時間又有精神，就決定整蛋糕畀佢食，然後唔知邊到來嘅勇氣，居然夠膽問燒腩仔想唔想一齊整蛋糕，蛋糕怪燒腩仔梗係即刻好興奮咁答「想」啦﹗艾菲聽完佢嘅答案先知死，即刻頭痕到底有咩可以畀佢幫手...＞.<
諗咗陣之後艾菲決定豁出去啦， 雖則自己一個整一定快靚正好多，但畀燒腩仔一齊玩佢又肯定會好開心同滿足感大D，於是執好材料就成堆工具搬出廳啦，D工具都無咩特別，只係畀小朋友一齊玩，就盡量揀D打唔爛同大D嘅碗來用，不過都要讚吓燒腩仔真係好乖，知道有份幫手整蛋糕之後，即刻坐喺廚房門口等艾菲慢慢準備，仲無手多多咁將全部嘢拉落地，艾菲叫佢做咩就做咩超合作。
燒腩仔：好開心呀﹗媽媽話畀我幫手整蛋糕呀﹗
燒腩仔今次明顯係堅開心，一聽到艾菲話可以去洗手準備埋位整蛋糕，即刻仆到咁跑入廁所等艾菲開水喉，企到埋枱仲開心到望住D工具喺到偷笑添呀﹗
燒腩仔：等我幫媽媽檢查吓D工具有無問題先﹗
燒腩仔：嗱﹗我唔怕你㗎﹗
一直好怕喺燒腩仔面前整蛋糕，因為艾菲每次喺廚房用親打蛋器，燒腩仔都會喺廚房門口喊足全程，試過兩次因為要招呼爆喊中嘅佢，搞到艾菲D蛋打唔起添，已經同佢解釋咗好多次要食蛋糕一定要用打蛋器，但佢每次用之前話唔驚用嘅時候都係爆喊，不過今次同佢一齊拎住個打蛋器先開機，佢又克服到唔再喊喎，仲肯自己拎住畀艾菲影相添﹗叻叻﹗
燒腩仔：睇得媽媽整蛋糕多，一拎起個篩已經識用啦，連媽媽都讚我
呢個真係不得不讚燒腩仔，艾菲完全無諗過佢會知道個篩點用，一拎上手已經識得係側邊拍，但就好好笑咁拍拍吓見D麵粉未落晒個碗到，就索性全部直接倒晒落大碗就算囉，搞到艾菲要即刻倒返出來又再畀佢篩多一次。
燒腩仔：撈嘢簡直係我強項啦﹗
燒腩仔：筆多D﹗筆多D﹗
個樣專心同認真到呢...望住眼前呢個燒腩仔，艾菲對心心眼忍唔住係咁閃啦﹗
燒腩仔：嘻...我嘅製成品呀﹗準備拎入焗爐焗啦﹗
今次整蛋糕其實都想試吓日本買返來嘅叮噹模同星星模到底得唔得，結果發現真係好得叮噹樣相當清楚，咁下次可以放膽倒多D蛋糕糊落去焗見埋佢個鈴鈴啦﹗
燒腩仔：唔...自己整嘅蛋糕真係特別好味㗎﹗
沒有留言:
張貼留言