喺香港出發前睇天氣都知呢幾日北海道會落雨，呢日瞓醒一覺見到天陰陰就知避唔過，即刻放定燒腩仔件雨褸落袋，果然出車無耐就開始落雨，不過旅行嘅嘢就係咁，邊有次次大晴天好風景，好彩上次艾菲同米高來過，要玩嘅出海睇岩石同睇熊人，仲有上山睇瀑布都去晒，今次帶住燒腩仔只係想簡簡單單，hea吓回味吓呢個被列為世界自然遺產嘅地方。
呢日行程嘅第一站係去知床五湖，睇五湖有兩個方法，第一個係畀錢申請入湖行山（只開放部份月份，同有機會撞到熊人），咁就可以慢慢行慢慢欣賞晒五個湖，第二個就係行呢D輪椅同BB車都推到入去嘅高架橋，不過只係會睇到一湖同多人，因為我哋上次已經行過晒五湖，今次又帶住燒腩仔，所以就揀咗後者簡單D，但就超好彩咁一落車就撞到個強國團，嘈到呢...
為咗避開班強國人，我哋唯有摩打腳唔停咁向前行，終於早過佢哋到達一湖，原先以為可以靜靜地欣賞吓風景一陣，點知有幾個先頭部隊嘅強國阿叔到咗，仲堅到對住個山扮雀仔大叫，真係咩事呀？有病唔該睇醫生啦﹗
對住呢D強國人真係乜mood都無晒，好彩小朋友完全不受影響，心情大好咁由一湖一直跑返出去，呢段路超級長佢又跑得勁快，追佢追到我哋氣咳咁滯，出到去停車場幾乎出汗出到全身濕晒﹗
來咗北海道咁多日，終於都喺離開知床國立公園嘅路上見到小鹿斑比啦﹗上次來幾乎周街都係，今次搵得好辛苦先見到三大隻，唔知係天氣影響定佢哋產量下降呢？
下一站去咗知床峠，呢到係知床半島嘅最高點，上次來都已經係超大風同大霧，今次本身落緊雨就更加差啦﹗
如果天氣好係可以望到對面俄羅斯嘅北國四島，今次就只可以勉強提供。
知床峠上嘅路邊野花。
因為時間尚早，所以又落返山去知床國立公園嘅教育中心玩吓，無記錯呢到應該係《非誠勿擾》入面，笑笑佢哋學遇到熊人要點做嘅地方。
夠鐘就去開飯啦﹗呢日米高睇旅遊書介紹來咗間海膽飯好出名嘅鋪頭，碗海膽三文魚籽飯正到無朋友﹗我哋另外叫咗個豚肉生薑燒畀燒腩仔食，好彩佢經過兩餐絕食之後，呢餐都叫做食到半碗飯，而為求令個仔食多D嘢，伍生仲後加咗碟超大隻炸蝦，四大隻長過電視搖控都係港紙一百蚊唔使﹗﹗﹗至衰艾菲來到北海道嘅第二日已經開始生飛滋，個咀痛到唔係好享受到...
食飽去埋知床嘅道之駅玩，順便上吓網whatsapp吓燒腩仔公公婆婆（絕大部分道之駅都有免費wifi提供），呢到有一邊係專門介紹知床嘅保育，有熊人就一定會有三文魚，因為佢哋最鐘意就係食佢哋D三文魚籽，亦之所以北海道呢邊D三文魚籽真係特別新鮮同好味㗎﹗
大家唔好以為燒腩仔瞓喺地下到玩，實情係佢唔知因咩挑動到佢條神經（應該係佢想喪跑唔畀大人拖艾菲唔畀之類啦），就瞓咗喺地下到唔肯起身（佢摞地甚少會喊㗎，只會好得戚咁瞓or坐喺到望住你，當你傻咁叫極起身都唔理，反而夾硬拉佢走知道事敗先會嘈），唉...佢呢十幾日嘅情緒真係好失控，連好耐無再出現嘅摞地都出返來，返到香港都仲係keep住一有不滿就坐喺地下...
離開知床時順路去埋睇呢個知床八景之一嘅瀑布，知床絕對係個好值得一遊嘅地方，咁靚嘅自然景色宜家已經買少見少，夏天來主要都係睇吓自然風景同動物（上次來見到好多鹿㗎，仲見到孤狸添），冬天來就可以玩吓流冰漫步，不過學米高話事頭，呢D地方來兩次已經好夠，我哋應該未必會再來
燒腩仔遊日本@2014：
Day 1 HK>札幌
Day 2 札幌>帶廣 part 1
Day 2 札幌>帶廣 part 2
Day 3 阿寒湖>知床 part 1
Day 3 阿寒湖>知床 part 2
沒有留言:
張貼留言