學踩單車＠九龍灣公園

燒腩仔已經就快23個月大，見佢最近都高咗少少，艾菲一直想佢正式學踩單車，無謂浪費咁大咁靚嘅單車來擺吖﹗於是啱啱過去嘅星期六，襯米高下晝有時間就即刻take action，原先艾菲諗住求其喺樓下平台踩吓就算，點知米高就雄心壯志咁話帶燒腩仔去九龍灣公園個單車公園踩，貪心嘅艾菲一廂情願地以為踩完單車，可以畀燒腩仔去埋隔離遊樂場玩吓都好，所以就好開心咁跟住出發啦﹗



上年差唔多時候我哋都來過呢個單車公園，知道呢到唔多人，亦有兒童及初學者專區，帶燒腩仔來都唔怕會阻到人，而帶佢來呢到嘅另一個好處係，多D小朋友一齊踩有氣氛之餘，等佢可以觀察吓D哥哥姐姐點踩，從中領悟吓對腳點郁先啱。



老實講，艾菲同米高都已經唔記得自己想當日係點樣學識踩單車，只係識教燒腩仔邊個腳踏高就踩落去，兩隻腳要好似行路咁輪流郁，再加用手幫佢隻腳郁等佢感受吓道力，但呢D咁抽像嘅理論燒腩仔又點會明吖，佢識得將兩隻腳放喺腳踏上面已經好叻，要佢用啱力踩落去仍然係好有難度囉。



後尾米高都試吓將燒腩仔推上斜，然後叫佢自己用力踩落斜，可能因為落斜真係容易D發力啦，佢好似開始領悟到點踩咁，識得將個人烏向前同用力un，踩到好似想poo poo咁嘅樣，終於成功畀佢un到........半大步﹗﹗﹗﹗（啪啪啪啪...掌聲鼓勵﹗）



由於呢幾日嘅天氣實在太好，艾菲呢個啦啦隊隊長企咗成個鐘之後已經唔多頂唔住，見時間都差唔多，亦從來無諗過燒腩仔會一次就學識，所以話咁快就收隊走人留返下次再試過，至於原先以為會去嘅遊樂場呢，就當然因為大家都已經無晒電而去唔成啦﹗hehe...