北海道名古屋之旅～Day 3 阿寒湖>知床 part 2

離開摩周湖之後我哋就全速趕去知床民宿，由於呢朝實在太早起身焗飯畀燒腩仔，所以一上車就同燒腩仔雙雙瞓到隻豬咁，瞓咗好一段時間之後忽然畀米高拍醒問艾菲使唔使落車影相，艾菲用未瞓醒mode望一望出面，心諗都無咩特別姐，跟住求其影咗幾影就叫米高開車走，點知佢將架車調頭艾菲先見到對面原來有一大塊麥田，喺日落嘅太陽照耀下變咗金黃色超級靚，米高先話頭先見到有兩個龍友專登停車走落田影相（艾菲：咁你又唔早D講清楚...），艾菲即刻跟隊跳車影咗陣相，嘻...呢個就係自駕遊嘅好處，鐘意喺邊停就喺邊停。



啱啱好傍晚六點前到達是晚民宿航燈，呢間民宿出名咩呢？就係海邊睇日落，米高話佢有間三人房係有個對住海嘅露台好正，但我哋今次就book唔到，不過間房都係全海景嘅。



唔知係因為三年前已經喺到睇過最靚嘅日落，還是天氣實在不似預期太多雲，艾菲對喺呢到睇日落嘅興趣唔太大，反而好開心一入民宿就見到兩隻海鷗企喺lobby露台到迎接我哋，至衰燒腩仔啱啱瞓醒心情不佳變咗樹熊，如果唔係可以帶佢出去近距離睇吓海鷗。



呢晚住塌塌米房，地方唔算好大但都好舒服，而最開心就係燒腩仔，因為終於有地方畀佢走動，仲係咁逼我哋陪佢圍住張枱氹氹轉跑，跑到我哋頭都暈咁滯﹗

呢晚大人挑戰毛蟹同其他海鮮（顧得燒腩仔艾菲就顧唔到影相，所以完全影唔到靚靚食物相），Yummy﹗只可惜燒腩仔呢餐都係食到衰衰咁，仲不停咁想走同大叫搞到我哋勁唔好意思，艾菲同米高只可以輪流快食快閃。



我哋無特別同民宿order兒童餐，不過佢哋知我哋有小朋友，都好細心咁準備咗矮凳同小朋友餐具，至於燒腩仔呢碗烏冬就係艾菲放低行李之後用象印保溫壼焗出來嘅，預熱咗保溫壼就可以將烏冬，鰹魚碎，魚乾仔同菜倒晒落去焗，大約十分鐘左右就搞掂，個味都OK唔難食㗎，但向來好like烏冬嘅燒腩仔就零興趣，食咗幾啖已經開始摞出來再用手捽，最終艾菲要剪到碎晒直接倒入佢個口，都係勉強食到半碗。



呢到D房無洗手間，沖涼就更加要去大浴場（有分男女浴），唔知點解艾菲又會中咗米高計，聽佢話帶燒腩仔去沖涼畀佢喺房整床鋪，明明呢幾日都係佢同燒腩仔沖涼，而床鋪艾菲都識整同搬到啦...

入到去女湯見到兩個婆婆同一個十幾歲嘅孫女喺到沖緊，因為之前都試過咁樣沖涼艾菲又唔覺尷尬，只係燒腩仔見到佢哋即刻走返轉頭想衝出門口，但當時大家都已經除晒衫，艾菲捉唔住佢嘅話都唔知點算好﹗最後都成功夾咗燒腩仔入去沖涼，不過佢入到去就樹熊上身麻麻煩煩咁，輕輕淋水落佢身到都叫晒救命，人哋梗係話佢好「卡娃兒」啦，艾菲就自覺好滋擾同大殺風景，所以拿拿聲沖完身落浴池浸咗陣就捉佢著衫走人。




民宿無wifi提供，所以沖完涼之後我哋都無嘢好做，就決定帶燒腩仔落返lobby影吓相，不過艾菲今次想影嘅唔係件浴衣，而係民宿提供對麵包超人拖鞋，人哋知道我哋有小朋友一齊來，專登拎定對麵包超人拖鞋出來等我哋check in，燒腩仔鐘意到邊行邊甩都仲要繼續著呀﹗


 
又來是晚宵夜，喺7-11無意中發現呢件超好味芝士蛋糕﹗艾菲返到札幌都忍唔住再買多件來食多次呀﹗而艾菲呢晚就好衰咁專登喺蛋糕怪燒腩仔面前食（平時明知佢無份會等佢瞓咗先慢慢食），等佢知道唔正經食正餐嘅後果就係無蛋糕食，可惜佢we嘩鬼叫過後好快就唔記得呢個教訓...

 
 
唔知點解兩次來知床都好醒瞓，而呢到亦同三年前一樣，凌晨三點幾已經開始天光，艾菲瞓到矇矇鬆鬆咁，都忍唔住拎相機出來影張相來同天光後影嘅做對比圖。

燒腩仔遊日本@2014：

Day 1 HK>札幌 
Day 2 札幌>帶廣 part 1
Day 2 札幌>帶廣 part 2
Day 3 阿寒湖>知床 part 1