日本嘅民宿一般都係一泊兩食，指定時間去食堂就自然有得食，一般都係日式飯，魚同麵豉湯無咩特別，不過船長之家嘅早餐就竟然好似晚餐咁一貫嘅豐富，一朝早就有刺身同炸帶子食，好記得第一次來時食到嘩嘩聲㗎﹗
食飽就準備出發啦﹗呢日嘅天氣係我哋來北海道咁多日以來最好嘅一日﹗亦好好彩我哋咁啱安排咗呢日去花田﹗真係天公造美呀﹗我哋由網走出發，經旭川去美瑛，就來到美瑛時見到公路隔離有條火車路，艾菲呢個電車女已經覺得好好feel，後來見到有火車經過仲超hyper添﹗米高見艾菲勁想影火車，唯有開快D架車幫艾菲追（因為呢條路太多車唔可以話停就停），終於喺其中一個燈位可以停到一陣車，艾菲超興奮咁叫米高拉埋燒腩仔落車睇，自己就專心影靚相，一心諗住燒腩仔咁鐘意車實會好開心，點知火車極速駛過之後，燒腩仔居然話「唔使驚」（即係驚）﹗O...艾菲事後花咗好多口水先令到佢唔再驚咋...
去到美瑛已經十二點，第一時間走去搵食啦，可能因為餐廳入面同時坐咗兩個中國同台灣小朋友，佢哋都邊食邊扭嘈到拆天，相對燒腩仔呢餐喺艾菲嘅打氣同貼紙引誘下，總算好乖好靜咁食咗大半碗飯（但最後一啖唔知點解係要摞出來>.<），食飽就去美瑛駅吸印仔，點知又撞正成團中國遊客嘈到爆炸，所以吸完印影張到此一遊相就即閃啦﹗
之後就開車去四季彩之丘睇花田，但路上忽然見到有幾個單車遊客停晒車喺到影相，即刻跟風停車望吓，原來係個好大好靚嘅粟米田，再配埋田中央間屋仔，仲有極好天嘅藍天白雲，艾菲真心覺得呢個畫面靚到似幅畫，勁唔真實囉﹗
影完粟米田無耐就到四季彩之丘，由於七月尾呢個時候係花田嘅旺季，真係多人到連泊車都幾乎要等位咁滯，但單睇呢個必影七彩花田位就知係絕對值得來㗎，而且呢到勝在地方夠大容易影相，亦相對無咁多旅行團，雖然撞口撞面都係普通話人，但感覺係無咁滋擾。
來花田主打都係睇薰衣草啦，上次我哋八月初來D薰衣草已經濃晒或者割晒唔多睇到，但今次撞正花期正正係盛開mode，超級靚呀﹗
大家搵唔搵到薰衣草海中狂奔嘅燒腩仔呀？
當日有對香港情侶喺到影結婚相，大熱天時企定定影足成個鐘，但艾菲個model燒腩仔就失晒控咁越叫越走（艾菲估佢係有D不安，因為走到好遠時見唔到媽媽，佢又會突登跑返轉頭搵艾菲，唔會真係自己走咗去，只係我哋喺佢後面叫住佢，佢聽到我哋聲知我哋喺到就唔停囉），連捉實佢影張合照都難， 後尾全靠一樣神秘武器，先終於成功呃到佢企定一陣畀艾菲影返張相，大家估吓呢樣神秘武器係咩？嘻...
所謂嘅秘密武器，之唔係花田入面不停行來行去嘅觀光車囉﹗D車每次經過燒腩仔都會眼甘甘咁望到實一實，仲好乖咁識得行埋一邊讓路畀D車行先。
花田本身係無收入場費嘅，不過如果唔想喺烈日當空下慢慢行山嘅話，可以畀錢坐呢D觀光車行一個圈，另外山後面仲有個太陽花田，但入場睇花都係要額外收費。
人哋來花田明明係睇花，但燒腩仔來到花田居然係睇車﹗﹗﹗見佢真係咁鐘意D車，臨走時見到正門附近放咗兩架車喺到畀遊客影相，艾菲就即刻叫米高放燒腩仔上去扭軚盤，佢即刻開心到好似執到金咁呀﹗kakaka...
燒腩仔遊日本@2014：
Day 1 HK>札幌
Day 2 札幌>帶廣 part 1
Day 2 札幌>帶廣 part 2
Day 3 阿寒湖>知床 part 1
Day 3 阿寒湖>知床 part 2
Day 4 知床>網走 part 1
Day 4 知床>網走 part 2
沒有留言:
張貼留言