去完旅行返來之後，執屋做家務陪燒腩仔上playgroup同游水班，忙到艾菲無停手咁滯，終於游水班上完可以多返少少時間同燒腩仔玩，但就輪到佢嘅trouble 2情況喺不經不覺間升咗呢，搞到艾菲呢幾日都好唔開心，幾乎有放棄湊仔出返來做嘢嘅念頭添﹗唉...
之前一篇《 Trouble 2事件簿》都講過燒腩仔極愛摞地，但隨住佢識講嘅嘢越來越多，表達能力都越來越強，喺艾菲多次同佢溝通同堅持底下，摞地呢個情況係一度緩和過，點知就喺我哋去旅行期間，佢忽然又開始摞返地，有咩唔啱心水即刻坐低唔起身亦唔出聲，你叫佢起身佢就好得戚咁望住你，反而你夾硬捉走佢知道事敗先會嘈，由於去旅行時生活唔規律，小朋友難習慣同佢明顯表現無安全感，所以我哋當時都無好嚴厲咁罰佢，只係抱起佢行埋一邊講道理，佢肯道歉就算，點知佢返到香港都仲係咁，艾菲就決定要嚴懲，每次摞地都會即刻捉佢罰企，加事後好惡咁話佢，明顯話咗佢一星期之後係好咗少少，無再郁D就摞地。
點知佢原來唔係從此就範，而只係將佢嘅行動升級用另一個方式表達，就係直接用把口來鬧艾菲﹗有咩佢唔啱聽嘅，又或者佢知自己理虧咗嘅嘢，佢就會先下手為強「唔」一聲來話艾菲，例如佢食餅食到跌咗落地，艾菲話跌咗污糟唔食得，佢就會即刻「唔」加用對眼啤艾菲一下，如果艾菲堅持再講佢會再「唔」多聲，繼而就開始發癲大叫，艾菲stop佢叫佢冷靜，佢會用更加大聲叫來反駁艾菲，最終艾菲只得一個選擇，就係的佢去naughty corner到企，直至佢冷靜落來為止。
一般小朋友應該癲一陣見無人理就收聲（艾菲估），不過燒腩仔嘅癲係可以好徹底，艾菲唔理佢都唔會停，仲會專登整D聲扮喊（無眼淚同可以隨時收聲）來轟炸你，如果發癲期間佢忽然醒起有咩想要，例如想飲水，佢就會好歇斯底里超無禮貎咁不停重覆大叫「我要水水...我要水水...我要水水...」，有時會加埋手指指住艾菲要艾菲畀水佢飲添，由於燒腩仔平日出到街見到人係好正常好乖咁嘅樣，所以艾菲同任何人包括米高講都無人想像得到佢有幾癲，直至有一次艾菲終於忍唔住錄底whatsapp畀米高同婆婆，佢哋先信燒腩仔原來可以咁恐怖﹗
面對住呢個上咗身嘅燒腩仔，艾菲真係無晒辦法，講道理試過，惡鬧試過，打都試過，唔理佢又試過，艾菲已經聽playgroup老師教，每次都堅持要講到佢明為止，但每次收服惡魔過後，佢都好似失憶咁轉頭又來過...但最嬲係有一次佢發作期間，米高返到屋企只係同佢講一句說話勸佢起身，前一秒仲瞓咗喺地下到典嘅佢，居然可以即時回復正常爬返起身收晒聲兼答到米高問題﹗﹗﹗即艾菲之前一直以為佢發脾氣就失理智嘅諗發係完全錯晒﹗﹗﹗佢原來一直都好清醒，只係明揀艾菲來蝦﹗﹗﹗
而且好多時等佢冷靜落來之後，同佢講完一大輪道理佢都話明同知錯，只係臨尾要求佢道歉，或者只係數十聲咁簡單，講明做完呢D task就可以自由，但佢就偏偏唔肯認輸死都唔開口講，寧願選擇同你繼續彊持落去，有時甚至會因為咁再發動第二輪摞地攻勢，但如果同一時間同一地點艾菲話「你數完十聲我哋就出去XXX」，佢又可以九秒九數完十聲㗎喎﹗
除咗唔認輸之外，佢仲好要面唔衰得，已經唔止一次同佢著戒片褲戒片時，濕咗但死都唔畀艾菲同佢換條新，有次喺婆婆屋企唔小心玩玩吓跌低，大家好自然反應都會跟住「哎吔」一聲然後問佢有無事，佢就即刻好唔鐘意咁趴喺地下到用D好衰嘅眼神掃射大家，繼而喺到扮喊再起身同我哋講「我受傷呀」。
作為一個FTM，廿四小時對住小朋友，畀小朋友激當然係份工包埋嘅事啦，亦明白媽媽經常管住晒實會令燒腩仔覺得討厭，有得揀都會揀對佢寬鬆D嘅爸爸，但當你每日都好用心咁照顧佢，盡量滿足佢一切需要，為嘅只係想佢開開心心有個溫暖家庭，結果佢只係因為你唔畀佢食塊餅，佢就好輕易同你講句「我唔愛媽媽」，甚至一家三口出街艾菲話親拖佢，佢都一定話「唔要媽媽，我拖爸爸」，真係眼淚在心裡流囉﹗
沒有留言:
張貼留言