來咗呢個商場行街咁多年，艾菲都係第一次專登行上來公園，之前一直以為只係個普通小公園，點知來到先發現地方都幾大，同埋都叫做幾多嘢玩，基本樓梯，滑梯同轉轉轉玩意都有，只係小朋友入面有唔少數係講普通話呢一點扣咗分（唉...自由人家陣連葵芳都攻陷埋，我哋就來唔使出街啦）。
經過多次嘅特訓之後，宜家已經愛上咗滑梯，仲要只揀呢條最高難度嘅旋轉滑梯玩。
燒腩仔自一歲開始去公園，唔願爬高，唔肯玩搖搖馬，唔鐘意玩滑梯，玩親韆鞦都爆喊，之前上幼潛時玩fitball練平衡，燒腩仔驚到掂都唔肯掂個波，又之前玩毛巾飛氊時都係勢死唔肯玩，幼潛老師已經提艾菲要特別注意佢D感觀，可能係比較敏感好怕D會搖嘅嘢，要多D帶佢去公園訓練，之後同老死Ice媽媽傾開先知Oscar哥哥都有類似問題，仲開始咗接受感覺統合嘅治療，艾菲見燒腩仔已經成功克服到滑梯，應該未嚴重到要接受治療，所以就拿拿聲同佢特訓埋其他嘢，見到呢到有D簡單D嘅爬高玩意，就拉燒腩仔去試，估唔到佢又忽然肯玩喎﹗仲鬼咁鐘意玩添﹗
難得呢到有底褲韆鞦玩，艾菲一來到已經決定就算佢爆喊都要捉佢上去玩，對上一次去荔枝角公園玩時都仲係喊住口上去，今次竟然奇蹟地超級順攤，乖乖地跟住艾菲排隊等玩，就算排隊期間見到其他小朋友玩吹泡泡，佢明明好想埋去拍泡泡，艾菲只係同佢講玩埋韆鞦先玩泡泡，佢都好合作無走咗去，全情表現期待同enjoy，雖然有幾次艾菲將佢推得高時都會話「唔使驚」（即係驚），但只要艾菲唔再將佢推得更高，佢都OK無再話驚，又成功挑戰一個項目，叻仔呀﹗
成功喺公園將燒腩仔D電放晒之後，佢話咁快就喺BB車到瞓著咗，等艾菲同米高可以拍吓拖行吓街，然後過咗去葵涌廣場行，果然見到呢把近期大熱嘅芭蕉扇（葵涌廣場出名係淘寶嘅現貨區，好多時艾菲想淘D嘢又驚實物唔OK，都會來呢到搵吓有無摸吓質地先淘），之前Ice媽媽借畀艾菲試玩時，艾菲已經想淘一把返來，淘寶賣緊五十幾蚊人仔一把（未計運費），呢到居然$70有交易（艾菲喺大埔見過賣$140﹗），即刻現貨成交啦﹗
（註：請認明共田牌方為正貨，艾菲見有好多雜嘜A貨會再賣平D，D鋪頭仲會好衰咁用個價錢牌遮住中間個logo等你望唔到係咩牌子，但Ice媽媽千叮萬囑話個摩打係有唔同，驚買咗A貨效果唔夠好同無咁襟用）
呢把芭蕉扇有咩咁勁？之唔係就係夠大風囉﹗聽講話叉夠電可以吹足六個鐘（用插頭orUSB叉電都得）﹗大家睇吓燒腩仔D頭髮，真係吹到勁飄逸飛起晒，就知佢嘅風力係超級強勁啦﹗kakaka...而佢另一賣點就係設計安全，就算燒腩仔D咁細隻嘅手指，都唔會篤到入去可以好放心咁畀佢拎住慢慢吹﹗宜家D天氣熱成咁，艾菲仲要成日陪燒腩仔周圍去放電，真係要放定一把喺媽媽袋到隨時拎出來用先掂呀﹗;P
沒有留言:
張貼留言