離開知床之後，我哋就向住網走嘅方向走，期間路過斜里超長超直嘅國道334同244號線，全長大約有18km，係日本旅遊書推介嘅影相位來，可惜當日一直落雨天陰陰，影唔到
而來到網走嘅第一站就去咗北浜駅，呢個站係個對住鄂霍次克海嘅無人木造車站，亦係《非誠勿擾》入面笑笑佢哋來到北海道落車嘅車站，只可惜燒腩仔午睡中畀我哋整醒，keep住屎面無mood欣賞。
今次已經係艾菲第二次來北浜站，呢到幾乎每隔一個鐘先有一班火車，但艾菲居然好好彩連續兩次都撞正火車埋站呀﹗
之後上到天都山，燒腩仔依然係屎面心情不佳，所以無畀錢帶佢入流冰館睇流冰天使，只係行上觀景台望吓風景就算。
因為天都山個toilet麻麻乾淨，決定落返去網走嘅道之駅幫燒腩仔換片，小朋友一落車就乜都唔理自己走咗去，畀我哋話完之後就摞地以示不滿，艾菲要係呢到同佢講咗陣道理先肯同米高道歉，原來帶小朋友去旅行除咗要預時間畀佢哋放電，仲要預埋時間用來教仔... >.<
呢個道之駅最驚喜之處係入面有個遊樂場仔，放咗大堆玩具同公仔喺到畀小朋友放電，Good!
來網走唔睇流冰天使，唔去能取岬（即《非誠勿擾》入面笑笑跳崖個地方），又唔去網走監獄（因為上次已經去過，覺得唔太適合燒腩仔去），基本上都無咩嘢好做，見時間尚早魔鬼米高就引誘艾菲去行西松屋，今次有一個鐘慢慢行，連側邊間Daiso 100 yen店艾菲都殺埋添﹗
又執到平嘢啦﹗199yen三條靚靚毛巾仔﹗艾菲買咗兩pack畀燒腩仔來緊返學用，幾蚊條唔見咗都唔使肉痛呀﹗ 仲有100yen店靚靚Mickey Mouse餐具，個水杯仲要係made in Japan，認真抵到笑呀﹗
夠鐘就起程趕返去近期好出名嘅民宿船長之家啦﹗呢次係我哋第二次來，所以一來到呢個影相位就即刻叫米高停車畀艾菲影相，有田有海仲有日落睇，勁好feel呀﹗
去到放低行李就即刻走去湖邊睇靚靚日落，因為呢日天氣一直都麻麻地，艾菲對今日嘅日落都不抱任何厚望，點知來到見到D厚雲已經散得七七八八，就堅持要睇晒成個日落先走，終於艾菲成功畀燒腩仔見識到太陽伯伯返屋企嘅一刻， 但代價就係畀D日本蚊咬咗八
睇日落期間，艾菲實在頂唔住要返去車再噴花露水同帶蚊帶（不過都係無用，繼續畀蚊喪咬），返到來就見到呢兩父子好sweet咁騎住膊馬睇日落，燒腩仔開心到呢...
講返船長之家有咩特色先，佢最出名就係以超平價錢（一泊兩食都係8640yen一個人咋﹗）食到眼前呢一枱影極都影唔完嘅海鮮大餐啦（因為開餐時仲會有食物繼續上枱）﹗主角當然係雪場蟹，長腳蟹同毛蟹，另外仲有松葉蟹腳shabushabu，同各式刺身同海鮮，我哋三個人用咗成兩個幾鐘時間（燒腩仔都好合作咁食咗成個海鮮飯同茶碗蒸落肚），最終都成功清咗3/4枱嘅食物，真係算係咁啦﹗
食飽返房抖咗陣又來是晚宵夜，山梨縣產白桃，超香超多汁，燒腩仔食到停唔到口呀﹗
呢晚又係住塌塌米房，唔知係唔係呢晚太多人呢，我哋被安排住尾房，間房好似仲細間過三年前來住間房咁，而且房入面D設施明顯有D殘舊（點解三年前來又唔覺呢？），但好在房入面有洗手間，勉強可以同燒腩仔沖涼，但大人都係出返去大浴場沖會舒服D。
而最騎呢係呢晚瞓覺時燒腩仔爆咗個大笑話出來，話說燒腩仔一向都怕黑，我哋瞓覺係要開住夜燈畀佢瞓，喺屋企時會等佢瞓咗就熄燈，出去旅行艾菲就會keep住開以防萬一，咁呢兩晚嘅民宿都無夜燈，我哋唯有開電視閂聲畀佢當夜燈，點知瞓到凌晨五點幾矇矇鬆鬆嘅時候，忽然見到燒腩仔一個人坐咗喺到，起初艾菲都有D驚唔知佢搞咩（大家可以想像下當時個畫面其實都有D似恐怖片咁㗎），好自然反應就問佢喺到做咩，然後佢好輕鬆咁答艾菲「我睇電視」，艾菲即刻成個人安樂晒，到熄電視叫佢瞓佢會扭計就更加知佢肯定無問題，因為佢唔聽艾菲話去瞓，最終唯有好殘忍咁叫醒佢至愛嘅米高陪佢瞓返，大家先可以齊齊瞓多陣咋﹗
燒腩仔遊日本@2014：
Day 1 HK>札幌
Day 2 札幌>帶廣 part 1
Day 2 札幌>帶廣 part 2
Day 3 阿寒湖>知床 part 1
Day 3 阿寒湖>知床 part 2
Day 4 知床>網走 part 1
沒有留言:
張貼留言