一年前用aisa miles換嘅機票，終於都畀我哋等到出發呢一日，雖然有時都覺得米高想當日嘅決定好瘋狂，到宜家仲係有D擔心來緊呢十幾日搞唔搞得掂隻燒腩仔，不過一望到個長長嘅手信list艾菲又暗暗地覺得好興奮，畢竟我哋以前拍拖一年至少去一轉日本，但自從三年前暑假去完北海道補度蜜月之後，就一直無再坐過飛機去旅行啦﹗
按照慣例都係由米高做領隊，負責book機票，買旅遊保險，安排酒店，行程交通同飲食，艾菲呢個團友只需要帶齊行李準時出現機場check in就得，所以到目前為止艾菲其實都唔係好知自己會去邊玩（嘻...:P），只係同領隊講低咗想行西松屋，阿卡將，搵麵包超人，同行吓outlet睇LC咁，不過今次就肯定無以前咁輕鬆，始終係帶多咗個燒腩仔同行嘛。
以前執行李，用一晚時間就搞掂晒，但今次艾菲都嚴陣以待，一星期前開始諗定執D咩，雖然日本真係好方便乜都有得買，又雖然艾菲真係好想吉喼出發爆喼返，但淨係燒腩仔嘅衫褲鞋襪同用開嘅日用品已經唔少嘢，再加埋一大堆濕星嘢，就算唔帶片同濕紙巾打算過到去先買，依然係未出發已經塞爆喼咁滯﹗（咁艾菲仲點買嘢？）>.<
宜家日本同樣係夏天，就算北海道無咁熱，個太陽都唔會弱咗，再加上燒腩仔唔肯帶帽，所以防曬一定唔少得，另外仲要帶定雨褸備用，而且始終係戶外活動多，防蚊措施都唔可以懶（特別係艾菲呢個咁惹蚊又咁敏感嘅人），花露水同蚊貼之外仲專登買咗pack卡通防蚊手帶，希望燒腩仔會畀面帶吓啦﹗
平安藥又係一定唔可以漏，之前帶佢去醫生到做入學前身體檢查已經順便拎埋，基本上都已經要乜有乜，仲準備埋保嬰丹同洗鼻水，退熱貼都只係帶兩三塊以防臨時臨急搵唔到藥房，不過我哋兩母子其實係出發前一星期相繼病咗，好彩都已經好返九成，斷估呢十幾日唔會咁邪再中招掛...
至於燒腩仔嘅一日四餐，就係艾菲成個trip覺得最煩嘅事，雖然佢已經大個仔可以食大人食物，但佢始終係鐘意食艾菲整嘅BB餐多D，艾菲實在唔想佢13日都食街外食物，所以決定帶埋米同象印個保溫壼過去，仲專登借埋燒腩仔公公個旅行電熱水壼（擔心住民宿拎熱水有時唔係咁方便），決定過到去再買料焗飯仔佢食，為咗呢樣嘢都畀米高「哦」咗好耐，但我哋已經無帶佢飲開嘅奶，打算買日本D奶畀佢飲就算，艾菲始終想堅持整餐飯仔佢食，就算只係兩日一餐都好吖﹗
最後要準備嘅仲有帶上機嘅物品，星星餅同蔬菜片都係畀佢可以係飛機起飛時食，等佢做吞嘢嘅動作唔使耳仔痛，另外帶多個吉樽過關，過關之後先買枝水畀佢慢慢飲，另外巴士，貼紙再加飛機D禮物包，估計都捱到一段時間，真係頂唔住時就出殺手鐧用部Surface播巧虎佢睇，艾菲最驚唔係佢要離開座位或者大叫，而係怕佢把口唔收大大聲咁講嘢會嘈到其他乘客囉（佢呢期坐親巴士都好嘈，會大大聲咁直播「停車」，「開車」，「轉灣」，「叔叔坐巴士」，「姐姐落車」，艾菲係咁殊佢都唔理）﹗
而艾菲為咗可以幫燒腩仔記低呢個trip嘅回憶，仲特登去無印買咗本薄仔畀佢，等佢去到D旅遊景點時可以吸吓印仔玩吓，無聊時又可以畀D顏色筆佢畫吓嘢，一舉兩得﹗
好啦﹗講到呢到都差唔多啦﹗大家兩星期後再見啦﹗希望艾菲返到來仲有心有力寫遊記啦﹗
沒有留言:
張貼留言