來到展覽嘅最後一星期，人潮可能無之前咁洶湧掛，我哋入場時連隊都唔使排，email都唔使show就可以直行直過，未入到展區已經見到牆上有好多唔同嘅熊貓布置。
至於燒腩仔呢，狀態簡直大勇超級興奮，艾菲只係早一星期開始同佢洗腦話佢知我哋會去睇熊貓，佢入到場即刻panda panda咁叫，仲擺晒chok pose畀艾菲影相添（但就成日唔肯望鏡頭囉）﹗
Are You Ready???
1600隻熊貓有大有細，亦有唔同造型動作，但震撼又唔係好覺，不過都真係幾cute嘅，至於燒腩仔就睇到超肉緊，趴係個欄到指天篤地，阻住晒後面D姨姨叔叔影相，搞到艾菲都有D唔好意思。
雖然話平日已經少D人，但呢個影相位都係逼到爆，再加埋超級悶熱嘅天氣，我哋企一陣已經全身濕晒，到燒腩仔終於肯畀返個正面艾菲影時，佢都開始熱到無晒表情，艾菲唯有快手影完即閃。
影完展區即刻上樓睇其他展覽順便散吓熱，艾菲之前來過兩年detour，都行慣行熟知道佢哋D setting係點，不過明顯今次商業味都幾重，絕大部分都係賣嘢嘅shop，放裝置藝術嘅少之又少，所以我哋只係主打行走廊就算，咁啱見到有隻吹氣熊貓，幾經辛苦先氹到燒腩仔同熊貓來個情深一吻。
之後見到牆上面D熊貓，佢D chok pose又來啦...
睇吓佢呢個樣，嗲到呢...
呢隻直情係自己衝埋去要艾菲影（但又唔會企定定畀你影㗎喎，你影得慢D佢就會走咗去）﹗
最後落埋去排抱抱熊貓專區，唔多人都等咗成十五分鐘（後面D腳就係排隊條人龍），每次放10 group人入去，影相時間只有一分鐘，而我哋係第十組，只係得返呢三隻一樣樣嘅熊貓無得揀。
燒腩仔起初唔知D熊貓係拎得起，所以勁含蓄只係摸住佢哋pat pat影就算，後尾工作人員幫我哋影完合照， 佢見艾菲拎起隻熊貓來玩又有樣學樣，話要同熊貓玩疊高喎﹗
我哋最終係到逗留咗一個鐘左右就走，雖然燒腩仔玩得好開心，但真係熱到一家三口都溶晒，要即刻去附近茶餐廳食返個tea抖一抖，再帶燒腩仔去IFC換過套衫先掂呀﹗
沒有留言:
張貼留言