嘩﹗又到七號啦﹗即係我又大一個月啦﹗唔知係唔係因為我開始咗一星期兩日嘅游水班，加埋本身一星期一日嘅playgroup，同爸爸放假時嘅一堆豐富節目，搞到我好似日日都唔黐家咁，連媽媽都覺得呢個月D時間過得特別快呀﹗
今個月嘅飲食狀況都無咩點變，照舊一日四餐夜晚無飲夜奶無食宵夜，早餐就飲七安奶加其他包餅或者cereal同糊仔，午餐晚餐食BB專用飯，不過最近天氣熱 同出牙搞到無咩胃口（艾菲：但宜家隻牙仲係完全無影，只係見佢成日流口水用手指撩個口同搵嘢咬先估佢應該係出牙），由上半個月一餐食一碗半飯，減到最近食到一碗飯媽媽都已經收貨讚我叻，至於下午茶就食零食加水果。
宜家會識得話畀媽媽知想食咩，又會識得將唔鐘意食嘅嘢吐出來，逢黑色同有渣嘅嘢我都唔會食（艾菲：例如藍梅，堤子乾同豆咁，不過你唔畀佢見到直接放入佢口佢又食㗎喎），仲多咗個習慣就係含住最後一啖食物唔吞﹗（艾菲：呢個壞習慣真係好惡搞，吞住啖食物係屋企走來走去真係驚佢瀆親，如果夾硬撩舊食物出來佢就實會爆喊，而且餐餐 都咁同佢嘈都唔係辦法，唯有用盡方法叫佢飲水，或者同佢講吞咗有咩玩同有咩食來氹佢吞咗去）
食大人食物方面都越食越好，媽媽唔煮BB餐食街外飯都開始食到一碗嘅份量，每次見到大人食嘢都會摞食，不過媽媽堅決唔畀嘅我都會好乖唔扭（艾菲：例如薯片同 蝦條，我會話辣嘅小朋友唔食得，佢就真係唔摞，但會好好笑咁話我食緊餅），但佢哋畀我試過一次嘅嘢，以後每次再出現我都會摞到佢哋畀我食為止囉﹗
瞓覺都係照舊十點左右就落床，但就經常性玩到十一點先瞓，瞓到第二朝九點半先起身，少咗半夜合埋眼爆喊嘅情況，但就多咗半夜醒咗眼碌碌個幾鐘都唔瞓返，搞到媽媽仲未敢畀我夜晚自己去隔離房瞓。至於一日一次嘅晏覺，因為搬咗去我張新床到瞓，我次次爬上床之後都會好興奮咁由床頭跑到床尾，再搵D被同枕頭遮住自己同媽媽講「我暱」，至少要玩半粒鐘暱埋玩到媽媽忍唔住發惡話唔玩先會乖乖地瞓（艾菲：唉...以前落BB床碌十分鐘就一定瞓），而起身時仲成日會合實對眼不停喊，要安撫好耐先平伏。
雖然宜家成日顧住玩唔願瞓，不過媽媽都話我今個月有樣嘢好抵讚，就係我終於戒咗趴係到瞓呢鋪癮（據講話趴係到瞓係做成入字腳嘅其中一個原因），以前我唔趴係到瞓係唔會瞓得著，媽媽試過無數次想將我反轉都會換來爆喊唔肯瞓返嘅場面，但自從睇咗 巧虎入面個哥哥瞓覺係就咁打平瞓之後，媽媽就同我講原來「大個仔」係唔會趴係到瞓，亦之所以佢同爸爸都唔會趴係到瞓喎，於是我就決定學哥哥做「大個仔」以 後要打平瞓啦﹗（艾菲：「大個仔」呢招暫時來講係超級work，有咩佢唔願做一同佢講話大個仔要點點點佢都會即聽）
入字腳嘅問題都係咁上下，一心急行到想跑時就會特別容易跌低，但畀媽媽下令慢慢走時對腳又會OK無咁內八，而我呢個月另一樣學識嘅就係自己著拖鞋啦，宜家一聽到大人話出街，我就會自己行去門口拎鞋著，有一日換好衫但媽媽臨行前去咗洗手間，我就自己拎咗對Crocs來著，仲要左右無調轉到著啱晒添呀﹗
學大人做嘢同記性強到幾乎嚇親媽媽，好多嘢都係講一次睇一次已經記得，一落車就認得係去婆婆屋企，仲會即刻叫媽媽帶我去探表妹（姨媽同婆婆住附近），記得姨媽屋企多咗個工人姐姐會特登去搵佢玩，記得playgroup同學仔屋企除咗有媽媽之外仲有個嫲嫲（只係教過佢叫一次），記得我好鐘意個保安員叔叔會係邊 到休息（又係見過一次第二日就記得），經過就會即刻搵佢同大叫叔叔，記得媽媽同婆婆講過我做表哥要錫表妹，一見到表妹就錫錫同抱抱，又會主動幫婆婆手抹地 同掃地（婆婆點做佢又係後面跟住做）。
自理能力都係keep住無退步，基本自己食嘢，返屋企自己除鞋放好，丟片丟 垃圾去垃圾桶，執玩具做埋分類呢D都係我自己做，朝早起身會同爸爸媽媽講早晨，瞓覺前又會同佢哋講night night，食飯前會叫人食飯，連potty training都係一切如常，宜家媽媽直情唔會定時定候捉我去廁所poo poo（艾菲：除非佢成日無poo，或者當日會出街唔方便poo先捉佢去廁所poo），而係我自己想poo poo時主動同大人講「唔唔」，至於wee wee就好間中咁有train幾次，基本上都未有一次係成功過，但媽媽話我肯著戒片學習褲，又肯試吓企係到wee，同開始講到自己wee緊（只限poo poo或者沖涼時講到）都已經好叻要讚。
宜家講嘢講到唔停口，由起身講到瞓著先會收聲，特別係出街時見乜就講乜，就算無人同我講嘢都會照講，成日學大人講嘢（艾菲：跟過我講「衰仔」，又跟婆婆學識 咗講無著衫嘅潮州話），可以用簡單句子表達自己意願，講到「我玩車車」，「我坐巴巴士」，「的的士壞咗」，「去淋水」，「我食餅乾」，「唔好唔影（相）」，亦開始識得答問題，有人問我爸爸去咗邊，我就會答「返工」（艾菲：終於講返啱個音），之後佢再問我返工做咩，我會答「搵錢」（艾菲：我從來都無 教過佢講，真係好想知係邊個教佢囉），仲好鐘意唱歌，近期熱播就有「一閃一閃小星星」crossover「氹氹轉菊花園」，另外幼潛教嘅「太陽伯伯」都會 成日唱。
已經唔使提都講到自己個中文全名（但個音仲未正），一見到自己張相就會狂講自己個名，仲記得爸爸同媽媽個英 文名添，一講Michael就會叫爸爸，一講Ivy就會叫媽媽，媽媽見我都吸收到，就決定教埋我講爸爸媽媽爺爺嫲嫲公公婆婆嘅中文名，但由於實在太多唔同 組合啦，暫時只可以跟媽媽口水尾講，畀D時間我一定會好快記得晒﹗
呢個月我終於肯主動去學ABC，宜家已經認到 A，B，C，D，H，M，O，P，W同Z（艾菲：因為唔係順序教，所以佢未識得A-Z咁講出來），而跟媽媽數得多十聲之後（艾菲：每次要佢做D明知會唔願 做嘅指令前，或者要佢等一陣時，都會同佢數十聲畀D心理準備佢），我都終於學識順序數1-10啦﹗至於顏色就暫時只係認得綠色同黃色。
最後又係講情感發展嘅時候啦，媽媽話我呢個月嘅trouble 2進展，最明顯就係大人話咩我都會話「唔好」，好多時媽媽話做東我就會專登做西，好有主見最鐘意就係自己話事，所以媽媽宜家都會畀我自己揀鞋揀衫，買嘢畀 我都會叫我自己揀買邊個，仲會畀我負責分水果畀爸爸食添。（艾菲：幼潛老師教，要係大人嘅控制範圍下畀D嘢佢揀，例如我拎兩件衫出來畀佢揀一件，等佢覺得 自己都有話事權）
仲係會怕陌生人同陌生地方，去到新地方或者接觸新事物時，我都要warm up一下先接受到，去見醫生做入學身體檢查我直情喊足全程超唔合作大叫「唔好」，去個未去過嘅泳池游水都喊咗兩次先接受到個更衣室（艾菲：可能入面陰陰沈 沈掛），有時甚至樓下換咗個頂更嘅保安員，我都會嚇到唔肯入大堂，不過媽媽就讚我勇於嘗試，終於會主動叫夜晚個保安員叔叔，同肯同朝早個保安員姨姨講早 晨，佢話已經係一個大進步喎。
至於脾氣呢，上半個月都仲係好臭，有咩不滿就尖叫同摞地發癲，仲多咗個新招就係合實對 眼無聲抗議，最經典一次係三日內摞咗五次地，激到媽媽爆血管咁滯，不過自從婆婆唔知同佢講咗D咩之後（艾菲：其實都不過係提醒我唔可以成日同佢硬碰硬，怕 會傷害咗我哋兩母子關係都唔知），佢開始成日無端端搵D嘢來讚我，讚到我個人飄飄然咁，我最近就收斂咗D，有咩唔滿意都只係趴係地下一陣，媽媽捉我起身我 都會合作企返起身，連帶naughty corner都少用咗啦﹗
而之前我成日會大叫一聲來鬧人嘅情況，係媽媽嘅 開解下都改善咗好多啦﹗以前無論係去餐廳D哥哥姐姐收我D碟，抑或超級市場個收銀姨姨收咗媽媽D嘢去嘟，又或者坐電梯早過我出去，定D人上巴士行過走廊阻 到我睇風景，我都會好惡咁大叫一聲來鬧人，雖然媽媽事後會同我解釋一輪話咁做唔啱，但我下次都會唔記得咗繼續鬧人，不過自從媽媽宜家係我大叫之前就已經解 釋我知人哋做咩，仲教我講謝謝或者同人哋say hi，我就少咗再大叫一聲來鬧人啦﹗（艾菲：呢招係幼潛老師教嘅，佢話佢哋叫得多就會變成習慣，事後點講都好快會唔記得繼續做，解決方法係一定要快過佢出 手，係佢大叫前已經解釋佢知咩事stop咗佢，等佢慢慢摵甩呢鋪癮）
沒有留言:
張貼留言