北海道名古屋之旅～Day 8 札幌

去美瑛時路過旭川，艾菲就口痕問米高點解唔安排我哋去好出名嘅旭山動物園，佢嘅唯一解釋係唔鐘意嗰到勁多旅行團明呃遊客，咁帶得燒腩仔來北海道，除咗睇花都想帶佢接觸吓動物吖，之前又就唔到時間去牧場玩，於是喺艾菲不停爭取下，終於米高揀咗呢日嘅朝早帶我哋去札幌嘅円山動物園補數。 



睇地圖見動物園距離地鐵站唔係好遠，米高就決定帶我哋行過去，點知行到一半先發現要上斜路上山，幾經辛苦用咗大半個鐘先到，上到去大家都feel到熱，一入場見到隔離個館有冷氣就乜都唔理直衝入去行，原來呢到有D小遊戲例如畀你試吓拉大象，同上面個木池可以畀小朋友瞓落去感受吓木嘅質感，但燒腩仔只係肯喺側邊玩碌波。




動物園話大又唔係好大，但我哋都喺到消磨咗成個上午，雖然環境同設施睇落都有D殘舊，不過動物種類都算幾多，袋鼠，斑馬，長頸鹿，駝鳥，雪豹，狼，熊人，小浣態，馬騮，猩猩，獅子，老虎（艾菲好無聊咁教燒腩仔呢隻係巧虎嘅真身，kakaka...），羚羊，同應該無乜人識嘅貘等等等等，艾菲覺得親子遊的話都真係不妨一去﹗

北海道名古屋之旅～Day 7 札幌

原來已經成三個星期無寫遊記，但實情個遊記仲未完㗎，而艾菲亦好想堅持唔好畀佢爛尾，希望最終真係如願啦﹗:P



呢朝喺酒店食完早餐我哋就出發去馬場啦﹗我估大家去日本旅行都應該無諗過去馬場玩，但基於米高係個超級馬迷（唔係買馬D職業賭徒，係真係鐘意馬鐘意到會上網睇國際賽同睇書研究馬種嗰種），艾菲都唔係第一次同佢去日本馬場，而我哋今次去呢個札幌競馬場就係咁啱呢日裝修完重開，入場仲有個紀念匙扣送添﹗



香港嘅馬場係唔畀小朋友入場，但日本呢到嘅馬場就超級family friendly，除咗有家庭專用餐廳，大大個小朋友專用廁所，超舒服嘅換片區同餵奶區之外，場外仲有呢D扮到靚一靚嘅小馬畀小朋友近距離望吓。



而場內就有兩層遊戲室畀小朋友玩，下層係D波波池要走動嘅玩意，上層就有圖書同卡通任睇，可惜燒腩仔呢日狀態超差，異常不安嘅佢只係不停圍住個場跑，其餘咩都唔肯玩，叫佢唔好跑就轉陣去玩上落樓梯，再阻止佢就大叫發癲，結果艾菲覺得唔對路抱佢埋一邊傾偈，然後佢喺艾菲旁敲側擊吓終於表達咗好驚同好攰嘅message出來，嗰一刻艾菲真係忍唔住喊咗出來，帶佢來旅行一心諗住一家人開開心心玩，點知大人嘅快樂竟然建築喺小朋友嘅不安身上，唯有寄望來緊一星期都唔使再日日轉酒店，佢會感覺安心D啦﹗

自己瞓

雖然屋企有兩間房，但為咗方便照顧燒腩仔，由佢出世開始，一直都係瞓我哋房嘅BB床，直至佢歲半左右，艾菲都覺得係時候要佢自己一個去隔離房瞓，一來係張BB床已經唔夠大，佢成日瞓到叉咗對腳出床欄，二來係聽得太多朋友嘅case，到四五歲仲要同爸爸媽媽一齊瞓，艾菲實在接受唔到，所以決定襯燒腩仔宜家仲細，早D要佢自己返房瞓，免得大個瞓慣咗仲難分房瞓。



要燒腩仔去隔離房瞓，首先要預備好佢張龍床﹗由於燒腩仔出世前我哋請過姐姐，亦專登訂咗張上下格床畀姐姐瞓， 可惜姐姐做唔夠兩星期已經畀艾菲叮走咗，張床就一直放咗喺到擺，到後期燒腩仔出世後更加變成雜物架，米高曾經建議掉咗張床，買過張小朋友床畀燒腩仔瞓，但張床瞓都未瞓過就掉實在太浪費，反正燒腩仔過兩三年大個仔可能又有另一D新嘅需要，經一論商議後我哋決定宜家畀燒腩仔照瞓下格床，過多幾年先按佢需要再大執間房畀佢瞓啦﹗

於是艾菲用咗一個上午，好努力咁將床褥由上格床搬落來，然後將下格床嘅雜物全部搬晒去上格床，再徹底清潔成張床，喺窗台位置貼好防撞膠，換好新床單，再裝埋淘寶訂返來個床欄，鋪好好耐之前淘寶買落嘅大大塊超厚地墊，終於成功變返張床出來畀燒腩仔瞓。



整好張床之後當然第一時間叫燒腩仔入來過目啦﹗不過呢隻馬騮興奮到襯艾菲行出房拎D嘢，膽生毛咁自己爬上條梯到，仲連自己已經被卡住唔上唔落都唔知，後尾當然係要艾菲救返佢落來再訓話一論啦﹗

偷酒飲？﹗

細路﹗你做咩偷啤酒飲咁大膽呀？？？？？



仲飲到成口泡，偷食都唔抹咀？？？？？



飲勝到一滴不留添？？？？？

幼潛＠23M ~ 畢業啦﹗

由燒腩仔15個月大開始上幼潛，話咁快就上完最後一期嘅課程，本來燒腩仔可以升班讀佢哋嘅幼兒樂園，等佢哋慢慢習慣上堂同自己返學，不過因為已經有學校收咗佢讀N，所以我哋唯有同呢到講bye bye啦，最後一堂早咗到，叫佢喺大門口同走廊到影返張相留念。



一個月前已經開始同佢洗腦，解釋上埋呢堂就要升班去另一間學校返學，燒腩仔明顯出現不安情緒，最近發脾氣時最鐘意講嘅「唔要媽媽」已經變成「我要媽媽」，發癲時一定要艾菲攬返實佢先肯平伏情緒，但艾菲堅持出門口前同佢再講一次等佢接受現實，所以今堂keep住都有D唔捨得嘅情緒。



最後一堂有個簡單嘅考核，第一樣考嘅係吸印仔，因為之前去旅行miss咗兩堂，之後艾菲懶無同佢返屋企練習，仲以為佢實吸得唔靚，點知佢喺不知不覺間已經無師自通，由上一期唔夠力或者拖住吸，到今次吸得好四正，仲要全部吸喺格仔入面。

農暦生日

啱啱過咗嘅星期一係燒腩仔嘅農暦生日，雖然無心肝嘅艾菲都係上星期尾先醒起呢件事，但話晒都係佢嘅生日，簡簡單單都要同佢慶祝吓﹗



燒腩仔係個鐘意食嘅小朋友，想氹佢開心其實好容易，花D心機同時間整吓好嘢佢食就得，不過今年艾菲唔想整紅雞蛋，於是決定整個靚靚叮噹賀壽便當就算，個餐盤係之前去旅行喺新千歲機場嘅叮噹館買㗎，擺咗成個月終於有用武之地﹗而呢餐嘅主菜有熊貓飯糰，三文魚同車車造型烚蛋（無紅雞蛋都有專登畀蛋佢食呀），配菜係蕃茄薯蓉，另外仲有水果火龍果粒粒。



忙咗成朝先終於搞掂個便當，最擺命係呢一朝燒腩仔出奇地唔合作，艾菲喺廚房忙到頭都暈，佢就喺廳勁嗌媽媽，仲不時送D驚喜畀艾菲，例如自己拎搖控開電視話要睇巧虎，然後走來廚房同艾菲投訴電視播緊嘅唔係巧虎，同自己走去艾菲個櫃拎貼紙簿出來，要艾菲即刻畀好行為奬勵貼紙佢，又唔知自己連放貼紙簿上面部surface都拉埋落地差D整欄部機，不過無論佢幾搗蛋都好，見到佢食得咁滋味個樣，艾菲個心就即刻溶化晒，注定係要畀佢食住啦﹗



個便當有咁多樣嘢食，呢個燒腩仔第一時間食嘅居然係火龍果，跟住佢好快手咁掃埋其他食物落肚，但兩個最花心機整嘅熊貓飯糰，食到尾時依然安然無恙咁放咗喺到，果然佢係唔鐘意用手拎住個飯糰來食（因為D日本米好黐手），艾菲最後唯有忍痛將兩個飯糰拆散畀佢畢來食啦﹗

Home Salon

燒腩仔天生多頭髮，好係細細個已經可以梳個一九分界蛋撻頭夠型仔，唔好係大熱天時頂住成堆頭髮超大汗，艾菲睇見佢不停R都覺得熱，勁想用個剷一口氣同佢剷走晒D頭髮就算。

自從佢六個月大，喺公公婆婆嘅幫忙下，艾菲同佢剪過一次頭髮之後，公公見艾菲剪到雞手鴨腳咁，以後每次艾菲話親燒腩仔要剪頭髮，佢都會自薦幫燒腩仔剪，難得有人肯主動幫艾菲手做D咁艱巨嘅任務，艾菲何樂而不為呢，更何況艾菲細個時個頭都係公公剪，所以絕對放心將燒腩仔個頭交畀佢。

每次同燒腩仔剪頭髮，艾菲同公公婆婆三個大人都會出盡法寶，公公負責剪，婆婆負責抱，艾菲負責做支援，但隨住燒腩仔反抗能力越來越大，佢已經由原先氹吓都會乖乖坐定畀你剪，到宜家會喊到拆天，周身郁同出手想撥走公公隻手，家陣我哋又開巧虎佢睇，又畀餅佢食，又唱歌又氹，搞一場大龍鳳先剪到少少，搞到公公都剪到無晒心機。



睇見燒腩仔搞到公公咁唔開心，艾菲做阿媽同做阿女嘅都唔好意思，但又知道燒腩仔宜家嘅狀態，再突然帶佢去街畀陌生人剪就更加係mission impossible，唯有把心一橫聽婆婆個髮型師教，帶佢返屋企一星期剪一次剪到佢慣啦﹗

然後艾菲抱住打死把就嘅心態同燒腩仔試剪，估唔到原來得艾菲同佢兩個獨處，無咗公公婆婆時佢又無咁扭喎，叫佢自己坐喺凳到圍埋垃圾袋做圍巾都無嘈（平時來到呢個位已經喊到拆天﹗），之後艾菲慢慢同佢由後面剪起，每剪一吓佢就喊幾聲，但艾菲解釋D頭髮根本無整到佢塊面，佢望吓鏡見艾菲無呃佢，唯有收聲坐定定由艾菲繼續剪，到修耳仔邊時佢就扭得勁少少（艾菲估佢應該係唔鐘意鉸剪開合嘅聲），不過艾菲同佢講數話好快剪完，跟住同佢一齊數十聲佢都勉強OK，最終第一次喺自己屋企試剪，燒腩仔剪完眼濕濕鼻紅紅咁，都叫做成功透薄咗D同修到兩邊耳仔位，有進步呀﹗！

DIY泥膠

自燒腩仔足歲半之後，艾菲一直都想畀泥膠佢玩，因為泥膠可以訓練手掌，手腕同手指仔嘅小肌肉，又可以畀佢發揮吓創意，之前上網見過人介紹可以DIY泥膠之後，就決定自己整畀燒腩仔玩，仲一早買齊麵粉同色素，連玩泥膠用嘅工具都已經淘咗返來好耐，但前排實在太多嘢忙，拖吓拖吓就無咗件事...

直至早幾星期上幼潛玩手指畫，燒腩仔玩到爆喊唔肯畫（其實佢之前一直唔鐘意玩手指畫，但捉住佢手都勉強畫到，諗住有機會試多D就OK，點知越大就越識反抗），眼見其他小朋友都超級鐘意手指畫，艾菲明佢又係感覺統合嘅問題，唔鐘意顏料喺手個視覺效果同質感，或者都同艾菲平日怕污糟，成日佢隻手一掂到D飯餸or其他污糟嘢，怕佢由對手捽到去成身，就拿拿聲同佢抹乾淨有關，同燒腩仔婆婆同姨媽講開，佢哋問艾菲上次同佢整蛋糕同搓包咩反應，艾菲先醒起自己無畀佢直接用手搓過麵糰，於是拿拿聲開工整泥膠畀佢玩來訓練吓。

撐得太遠都係講返整泥膠先，整泥膠其實一D都唔難，做法求其上google search就搵到，而且價錢平過街買好多，可以要幾多整幾多同要咩色有咩色，仲可以當親子活動同小朋友一齊整，不過最重要都係全部用食得入口嘅食材整，就算小朋友唔小心吞咗都唔使驚，好似燒腩仔咁已經識得分邊D先係食物，唔會隨便放嘢入口食，都有一刻試過誤會舊泥膠係搓麵包嘅麵糰想放入口試味，所以畀佢哋玩嘅嘢都係小心D好。



艾菲求其喺網到搵咗個無用他他粉嘅做法（有D人話用他他粉可以增強佢嘅彈性，但艾菲覺得唔用都OK），首先預備2杯麵粉，2杯水，半杯鹽，4茶匙油同食物色素，然後將所有材料攪勻變糊狀，之後就開火加熱，不停攪拌到攪唔郁，冷卻拎出來按自己喜好分割，最後加幾滴食物色素搓勻就OK，不過呢個份量做出來原來都幾多，艾菲總共做咗四隻色，每隻色有200g，對燒腩仔呢D初學者來講實在太多玩唔晒。

釣魚友

艾菲細個時極鐘意玩會轉嘅釣魚機，仲珍藏咗部迷你版喺屋企，不過收得好到艾菲都唔記得放咗去邊，好彩燒腩仔都唔弱，表姨媽喺佢幾個月大時送咗成套釣魚玩具畀佢，有齊魚網同魚竿勁專業（表姨媽應該喺香港買，不過淘寶見過廿蚊有交易），但見佢當時仲細就一直無畀佢玩，只係將D魚拎晒來做沖涼玩具，沖涼時隨手放幾隻落水畀佢捉吓魚就算。

直至之前帶燒腩仔上幼潛，老師拆開一張地墊扮水池畀佢哋玩釣魚（木質嘅釣魚玩具），燒腩仔居然第一次釣就成功釣到好多魚，仲可以好專心咁坐定定喺「池邊」釣魚無跌落「水」（佢D同學釣咗陣就走晒佬或者踩晒入去個「水池」到徒手捉魚），於是艾菲就決定返屋企拎返呢套釣魚玩具出來畀佢玩，仲決定增加難度加水落去等D魚浮吓浮吓難釣D﹗



燒腩仔：等我表演徒手捉鴨仔啦﹗
艾菲：釣魚係用魚竿㗎﹗



燒腩仔：釣到啦﹗
艾菲：但你釣咗幾次都係釣同一隻鴨咋喎﹗釣條魚來食吓得唔得呀？

香港蝴蝶節2014

早排收到Green Power推廣email，話九月同十月第一個星期日，會喺城門郊野公園賞蝶園搞香港蝴蝶節，有D攤位遊戲同手工DIY咁，見燒腩仔睇巧虎都學過蝴蝶，望過地圖見應該唔難去，就決定帶燒腩仔去見識吓啦﹗



正所謂打鐵襯熱，難得米高話得閒，我哋就揀咗上個星期日去，但呢日個天一直好厚雲，間中仲有D雨，我哋跟大會指示坐82號小巴去到總站再沿樓梯行上去，行咗唔夠五分鐘已經到呢個遊客中心，見有幾滴雨就入去玩陣避咗陣雨。



出返來見無雨就繼續出發，初段嘅大石級都唔算難行，仲可以見到城門水塘同馬騮，不過過咗引水道之後就要上一條好長好長嘅樓梯先會到會場，上到去大家都已經一身濕晒﹗



我哋大概十一點左右到，現場都幾熱鬧但唔算好多人，仲有D枱凳放咗喺到畀人休息，真係幾適合一家大細來玩，我哋抖咗陣就捉咗燒腩仔去影相，大會仲好正咁預備咗D蝴蝶展板喺到畀人扮蝴蝶，艾菲梗係叫燒腩仔扮來睇吓啦，受過去日本旅行時嘅影相訓練真係唔同D，一拎上手就識得企定望返出來笑，勁專業呀﹗kakaka...



報咗導賞團同手工班之後就出動去排隊玩攤位遊戲啦﹗排隊一直係燒腩仔弱項，無論上堂叫佢排隊，還是去超市排隊畀錢，佢都好唔合作會走or嘈，難得呢日又肯乖乖地排隊玩遊戲喎，讚﹗



排隊時睇其他哥哥姐姐玩睇得勁留心，但到佢玩時竟然呆咗唔知發生咩事咁，仲玩玩吓射波企咗喺龍門前唔郁﹗



之後再排隊玩另一個射籃遊戲，期間有個小朋友忽然請佢食甘大枝，佢猶豫咗陣都有拎到，平時佢唔會隨便拎人哋D嘢食㗎，跟住要佢幫手射波，都係發呆唔太知點玩咁，但最後都有嘗試拋D波出去。



玩咗兩個ball games，見仲有時間剩就玩返D靜態遊戲，限時內將蝴蝶嘅幼蟲拼返落蝴蝶到，認形狀做配對，對燒腩仔來講無難度啦﹗



夠鐘就去咗join導賞團睇蝴蝶啦﹗燒腩仔應該係全團入面最細嘅團友，堅持自己行點都唔肯畀我哋拖，但為免佢走失有危險同拖慢進度，我哋只好強行抱起佢行。



出發前真係無諗過會影到蝴蝶，點知去到賞蝶園發現真係有唔少蝴蝶喺到飛同採花蜜，仲要個位置係唔遠可以行埋去靠近來影，只可惜我哋趕住參加下場整燈籠嘅workshop，如果唔係就可以再影多D靚靚蝴蝶相啦﹗



最後趕返落山參加workshop，由於我哋呢一日係中秋限定版，所以有得整蝴蝶燈籠，不過我哋遲咗報到無晒位坐，要自己拎材料同工具去後面D野餐枱同凳到整，燒腩仔坐得唔舒服唔太就手，仲要太陽伯伯喺呢個時候忽然走出來，真係熱到我哋溶咗咁滯。



基本上個燈籠都係任我哋自由發揮，一張印有蝴蝶圖案嘅紙，一個廁紙筒同兩張色紙，為咗令燒腩仔可以參與一齊整，又唔好搞太耐令我哋中暑，艾菲就決定叫米高先陪燒腩仔油一陣顏色，艾菲就將色紙剪碎，搞掂之後就叫佢哋兩父子一齊貼上廁紙筒，艾菲就盡快油返靚隻蝴蝶，然後話咁快就大功告成﹗YEAH！



我哋整完燈籠已經係點幾，玩咗兩個鐘乜都夠，於是換埋小禮物就走啦，呢個活動都幾適合小朋友參加，事後問返燒腩仔去過邊，佢都記得自己去咗睇蝴蝶，證明真係學到嘢㗎﹗如果大家有興趣參加，又唔怕曬同行樓梯的話，佢哋十月五日仲有一場，詳情同donwload入場券可以睇返大會網頁，不過出發前記得要帶定水，遮，風扇仔同做足防曬&防蚊措施，艾菲同燒腩仔今次噴晒蚊怕水，帶埋驅蚊手帶同貼蚊貼先出發，最終當然好安全無事啦，相反米高以為自己唔惹蚊而乜都無做嘅就中晒招啦﹗