MaMa Mia X型揹帶試用之安睡寶寶

自燒腩仔月中打完一歲針之後，艾菲就好乖咁聽姑娘建議，要佢係屋企守咗12日行為，廢事佢感染病菌剩機發燒（打針詳情之後再講），等了又等終於等到今個weekend刑滿，米高梗係即刻安排節目帶佢出街玩啦，而今次嘅目的地就係赤柱。

我哋等燒腩仔食咗中午餐飯仔先出發，係明知星期日嘅赤柱例必多人嘅情況下，艾菲今次選擇咗用X型揹帶帶佢出街，一來當然係貪佢夠輕便，就算佢要落地自己行，艾菲就咁摺返埋條揹帶放落袋就OK，二來係貪佢夠貼身，最好就係用來氹燒腩仔瞓覺﹗嘻...係唔係估你唔到呢？

隨住呢個小朋友越來越大個，要佢出街都定時瞓晏覺真係有D難度，試過有次明明扭眼瞓想瞓，但氹咗成粒鐘仲係唔肯瞓，艾菲都明呢個係好正常嘅反應來，不過個心始終想佢定時定候瞓覺，因為佢一瞓唔夠，到夜晚就會發癲好難搞，諗起艾菲都怕怕﹗



出發時，艾菲專登將燒腩仔面向自己，將兩隻手都塞埋落條揹帶到，因為夠貼身佢點撐都無可能向後拗到腰，所以絕大部分嘅視線都會畀艾菲擋住，再加上艾菲會特登用手or帽擋埋佢側邊D視線，咁佢揀無可揀嘅情況下就唯有捱係艾菲個心口到，無嘢望無嘢搞又有D攰嘅情況下，當然係唔使兩個地鐵站嘅路程就瞓著啦﹗



專登影埋個背影畀大家睇，因為條X型揹帶塊布夠闊，可以令D重力平均分佈係兩邊膊頭，再加上夠貼身燒腩仔絕對唔會拋咗出去，D力就會更加集中唔會扯住個膊頭，所以揹住佢行咗兩個幾鐘都唔覺好攰。



呢個小朋友超級醒，一到達目的地就即刻醒，見佢咁乖肯瞓一陣，就畀佢向返前面一齊行街街啦﹗條揹帶包到去佢個心口，艾菲放晒手行街都唔驚佢跌出來，而佢兩隻手仲可以自己拎住水杯飲，不知幾咁free呢﹗



艾菲一心去赤柱係想買D冬天衫畀燒腩仔，但行晒成條街之後都睇唔啱，又或者睇上眼嘅就輪到價錢唔啱，咁唯有慢慢行返過去赤柱廣場那邊啦，而呢位小朋友就開始扭要落地，well...識行之後呢樣最煩，唔再一舊飯咁任你擺佈﹗



沿路見到好多狗仔，艾菲都估到燒腩仔會勁興奮，起初以為佢會唔識死撲埋去搞D狗仔仲叫米高要捉實佢，點知呢個小朋友就算大個咗都依然係安全系數超高，一直同D狗仔保持住一定距離咁手指指就算，真係完全估佢唔到﹗



買唔到嘢人又多，所以我哋同燒腩仔坐低食埋下午茶，去個逼爆人嘅公園玩咗一陣就閃人啦﹗離開時艾菲再一次將佢放返落條X型揹帶到面向自己，抱住即管一試嘅心態睇吓佢瞓唔瞓，米高仲笑只係艾菲一廂情願，點知係由赤柱廣場行返上巴士站嘅短短五分鐘路程入面，艾菲氹都無氹過燒腩仔，但佢已經自動波瞓到成隻豬咁﹗實在太Good啦﹗

Ma Ma Mia X型揹帶試用之實戰情況
Ma Ma Mia X型揹帶試用之點樣用

～～～～～～～～～～

Mamamia以實惠價錢提供一系列高質素母嬰用品，現於全線荷花親子店、新都城百貨公司、爸媽部落等各大商店火熱發售。 
http://www.facebook.com/mmm.hkg
查詢電話&電郵: 3520 2026 / sales@parakeet.com.hk
更多分享: www.Yes-Parents.com / http://www.facebook.com/YesParents